Odiechieng’ Migweloe Ji Mondo Olim Ofis

“EN TICH mane ma gitimo kanyo?” Mani e penjo ma ji mathoth ohero penjre sama gikalo machiegni gi ofis mar Joneno mag Jehova e Mogale City (Krugersdorp), machiegni gi Johannesburg, e piny South Africa. Kuom mano, Joneno noyango odiechienge ariyo mag gwelo ji mondo olim ofisno, tarik 12 kod 13 Oktoba, 2007. Ne gitimo kamano nikech gik moko ariyo​—Mokwongo, ne gidwaro tieko paro maok kare ma ji ne nigo, kendo nyiso ji kaka tije mitiyo e ofisno gin mariwo lwedo tich ma Yesu Kristo nochiko.​—Mathayo 28:19, 20.

Jogo matiyo e ofisno noketo sain madongo mag gwelo ji e dho rangach, kendo ne gichiwo kalatese makende mag gwelo joma nodak machiegni. Jotim ohala ma ne gisebedo ka ging’iepo kuomgi bende ne ogwel kaachiel gi jo utegi. Be ji ne obiro? Ee, welo mokalo 500 ma ok gin Joneno ne olimo ofisno.

Gima nomako wang’ welo ahinya ne en masin miluongo ni, MAN Roland Lithoman web-offset press, magoyo gasede machopo 90,000 e sa achiel kende. Ot malach mikanoe buge kaachiel gi kar loso buge, ne omoro welo ahinya, kendo buge mikano kendo kowo oko pile ka pile, pekgi okalo tan 14 (kilo 14,000). Joneno matiyo e migepe mopogore opogore e ofis kanyo, ne oloso kalatese mabeyo mag sain mopogore opogore kaachiel gi mano malero e yo machuok masinde ma ne itiyogo chon, kochakre gi masin mar Gutenberg, nyaka chop masin masani miluongo ni, litho-offset printing. Sain machielo ne en mano manyiso kaka ofis rito ler mar alwora. Kuom ranyisi, nitie masin ma ywayo muya moting’o sum kagolo e masin mar goyo buge, kendo chungo buru mag kalatese mondo owitgi e yo maber.

Gaset moro mar pinyno nondiko kanyiso ni ji 700 matiyo kendo modak e dalano gin “jotich mopwodhi mosechiwore ne Jehova.” Bende gasedno nowuoyo kuom “ler mamalo koda kaka gik moko ne itimo e yo mochanore maber” kama igoyoe buge. Jal moro mosebedo ka kwedo Joneno mag Jehova, bende nobiro timo limbe. Bang’e nondiko barua kowacho kama: “Apuoyou ahinya. Kinde mang’eny, ok yot yudo kama itiyoe tich e rang’iny mamalo kamano.”

Welo mang’eny ne opuoyo ahinya gik ma ne gineno, kendo ne giwuoro bang’ neno ni ofisno ne nigi buge malero Muma e dhok 151, kendo ni ofisno goyo buge mikowo ne pinje 18 mayudore e Afrika ma milambo koda pinje manie e Afrika madiere. Ofise mag Joneno mag Jehova e piny mangima, rwako welo madwaro timo limbe seche mago mag tich. Donge inyalo nono seche mitimoe limbe e ofis man machiegni kodi?

[Picha manie ite 11]

Welo kadonjo

[Picha manie ite 11]

Gwelo welo

 [Piche manie ite 10]

Ofis manie Mogale City e piny South Africa

[Picha manie ite 10]

Masin mar MAN Roland Lithoman web-offset press

[Picha manie ite 10]

Kar loso buge

[Picha manie ite 10]

Od kano buge