Puonj Mayudore e Barupe mag Johana kod mar Juda
Wach Jehova Ngima
Puonj Mayudore e Barupe mag Johana kod mar Juda
BARUPE adek mag Johana ma nenore ni ne ondik e higa mar 98 E Ndalowa, e Efeso, gin moko kuom buge mogik maloso Ndiko mokudhi gi much Nyasaye. Barupe ariyo mokwongo gin majiwo Jokristo mondo odhi nyime wuotho e ler, kendo gikwed puonj mag miriambo ma ne ochako donjo mos mos e kanyakla. E barua mar adek, Johana ok wuo mana kuom wuotho e adiera kende, to bende ojiwo Jokristo mondo otim gik moko ka gin gi winjruok achiel.
E barua ma nondiko ka en Palestina, nenore ni e higa mar 65 E Ndalowa, Juda ma en owadgi Yesu, siemo Jokristo wetene kuom wach joma richo ma ne osedonjo e yo maling’ling’ ei kanyakla, kendo ochiwo puonj makonyo kuom kaka onego ji okwed gik maricho manyalo kethogi. Chiko itwa ne puonj mayudore e barupe adek mag Johana kod barua mar Juda, nyalo konyowa dong’ ka wachung’ motegno e yie kata obedo ni waromo gi chandruoge.—Hib. 4:12.
DHIURU NYIME WUOTHO E LER, E HERA KODA E YIE
Barua mokwongo mar Johana ma en barua mondik ne riwruok duto mar jogo manie achiel gi Kristo, chiwo puonj mabeyo makonyo Jokristo mondo okwed jopuonj mag miriambo, kendo gidong’ ka gichung’ motegno e adiera koda e tim makare. Ojiwo gimomiyo ber ka wadhi nyime wuotho e ler, e hera, koda e yie.
Johana ndiko kama: “Kwawuotho e ler, kaka [Nyasaye ni] e i ler, walalore ng’ato gi ng’ato.” Kendo nikech Nyasaye e Soko mar hera, jaoteno wacho kama: “Mondo waheroreuru ng’ato gi ng’ato.” Kata obedo ni “hero Nyasaye” ema miyo ‘wamako chikene,’ wanyalo loyo piny kokalo kuom “yie marwa” kuom Jehova Nyasaye, Wachne, koda kuom Wuode.—1 Joh. 1:7; 4:7; 5:3, 4.
Dwoko Penjo mag Ndiko:
2:2; 4:10—Ere kaka Yesu en “misango mar richowa” ? Misango en gima ihinyo chiw mondo “olombgo ng’ato” kata “olosgo winjruok.” Kuom chiwo ngimane kaka misango, Yesu noloso winjruok maber e kind dhano gi Nyasaye kaka chik makare chuth ne dwaro. Kokalo kuom misangono, Nyasaye koro ne nyalo nyiso dhano ng’wono, kendo nonyalo weyo richo ne jogo maketo yie kuom Yesu.—Joh. 3:16; Rumi 6:23.
2:7, 8—En chik mane ma Johana wuoyo kuome kaka “chik machon” kendo kaka “chik manyien”? Johana wuoyo kuom chik mar hera mar owete mamiyo ng’ato chiwore chuth. (Joh. 13:34) Owuoyo kuome kaka “chik machon” nikech Yesu nochiwe higini 60 ma ne osekalo kapok Johana ondiko baruane mokwongo. Kuom mano, Jokristo ne osewinjo wach chikno “nyaka a chakruok,” mar ngimagi kaka Jokristo. Chikno bende en “chik manyien,” nimar ok owach mana ni ng’ato ‘oher jabute kaka en owuon,’ to bende ochiko ni ng’ato onyis hera koikore chuth kata mar chiwo ngimane.—Lawi 19:18; Joh. 15:12, 13.
3:2—En ang’o ma “pok ofwenyore” ne Jokristo mowal kuom roho, to en ng’ano ma gibiro neno “kaka obet”? Gima pok ofwenyorenegi en kaka gibiro chalo bang’ ka osechiergi ma gidhi e polo ka gin gi ringruok mag roho. (Fili. 3:20, 21) Kata kamano, gima ging’eyo en ni “ka [Nyasaye] nofwenyre, [ginibed] ma chalo kode, nikech [gininene] kaka obet,” tiende ni, kaka “Roho.”—2 Kor. 3:17, 18.
5:5-8—Ere kaka pi, remo, kod roho doko joneno ni “Yesu en Wuod Nyasaye”? Pi nodoko janeno, nikech kane obatisi Yesu e pi, Jehova owuon ne owacho ni Yesu en Wuode kendo chunye mor kode. (Math. 3:17) Remb Yesu, tiende ni ngimane, ma ne ochiwo kaka “rawar ni ji duto,” bende nonyiso ni Yes en Wuod Nyasaye. (1 Tim. 2:5, 6) To roho maler ne ochiwo neno ni Yesu e Wuod Nyasaye, kane rohono olor kuome sama ne ibatisoe, kendo rohono nomiye teko mar ‘wuotho kotimo maber, kendo kochango ji duto ma ne Satan osando.’—Joh. 1:29-34; Tich 10:38.
Puonj Mwayudo:
2:9-11; 3:15. Ka Jakristo weyo gimoro amora, kata ng’ato ang’ata mondo oketh hera ma en-go kuom owete, mano nyiso ni owuotho e mudho, ma ok ong’eyo kuma odhiye.
DHIURU NYIME “WUOTHO E ADIERA”
Johana chako baruane mar ariyo kowacho kama: “An jaduong’, andiko ne minwa moyier, kendo ni nyithinde.” Onyiso mor ma en-go bang’ nwang’o ‘nyithind miyono moko ka wuotho e adiera.’—2 Joh. 1, 4.
Bang’ jiwo Jokristo mondo onyag kido mar hera, Johana ndiko kama: “Hera e ma, ni wawuothi kaka chikne dwaro.” Johana bende chiwo siem mondo ji otang’ gi jal ma ‘jawuond, kendo antikristo’ tiende ni ng’at ma kwedo Kristo.—2 Joh. 5-7.
Dwoko Penjo mag Ndiko:
1, 13—Ng’ano ma en “minwa moyier”? Nyalo bedo ni Johana wuoyo kuom dhako moro sama otiyo gi wach ni, Kyria, ma en wach mochung’ne ‘miyo’ e dho-Grik. Kata nyalo bedo ni otiyo gi nying’no e yor ngero sama owuoyo gi kanyakla moro mondo omi ochochgo pach josand. Ka nyalo bedo ni Johana notiyo gi nying’no kuom kanyakla moro, to nyithinde ne nyalo bedo jokanyo mag kanyaklano, kendo ‘nyithind nyamin-gi’ ne nyalo bedo jokanyo mag kanyakla machielo.
7—En ‘biro’ mane mar Yesu ma Johana wuoyoe kae, to ere kaka jowuond “ok hul” wachno? ‘Birono’ ok en biro mar Yesu ma ne dhi timore e kinde mabiro e yo ma ne ok dhi ne gi wang’ dhano. Kar mano, en birone e ringruok kaachiel gi wale kuom roho maler kaka Kristo. (1 Joh. 4:2) Jowuond ok hul birone mar ringruok. Dibed ni gikwedo ni Yesu ne ok odak ngang’, kata gitamore ni ne owale gi roho maler.
Puonj Mwayudo:
2, 4. Ng’eyo “adiera”—tiende ni puonj duto mag Jokristo mayudore ei Muma, kendo dak kaluwore kod puonjgo, gin gik madwarore mondo omi wayud warruok.—3 Joh. 3, 4.
8-11. Ka ok wadwar lalo ‘ng’wono, gi miwafu, gi kuwe moa kuom Nyasaye Wuoro, kendo kuom Yesu Kristo,’ kaachiel gi hera mwayudo kowuok e riwruok marwa mar owete, onego ‘waritre’ wan wawegi kendo neno ni wasiko e puonj mar Kristo, kendo tamore jogo ma ok ‘sik e puonjne.’—2 Joh. 3.
BEDURU ‘JOMA NYWAKO TICH MAR LANDO ADIERA’
Barua mar adek mar Johana, ondiko ne osiepne ma en Gayo. Johana ndiko kama: “Aonge mor moloyo ma, kawinjo ni nyithinda wuotho e adiera.”—3 Joh. 4.
Johana puoyo Gayo kuom “gik moko duto” mosetimo kokonyo owete ma jolimbe. Jaoteno wacho kama: “Onego wakony jo ma kamago, mondo wanywak kodgi tich mar lando adiera.”—3 Joh. 5-8.
Dwoko Penjo mag Ndiko:
11—Ang’o mamiyo jomoko donjo e tim marach? Nikech ok gitegno e adiera, jomoko onge gi ng’eyo matut mamiyo gineno Nyasaye e yor ranyisi. To nikech ok ginyal neno Nyasaye gi wengegi masie, gitimo gik moko ka gima Nyasaye ok negi.—Ezek. 9:9.
14—Gin ng’a gini ma Johana luongo ni “osiepewa”? Wach ma otigo kanyo ni “osiepewa” ok en wach mawuoyo mana kuom jogo ma nigi winjruok machiegni ahinya e kind ng’ato gi nyawadgi. Johana tiyo gi wachno kowuoyo kuom Jokristo wetene duto.
Puonj Mwayudo:
4. Jokristo motegno e kanyakla bedo gi mor maduong’ sama gineno ka Jokristo mapodi rowere dhi nyime “wuotho e adiera.” To mano kaka jonyuol bende bedo mamor bang’ konyo nyithindgi bedo jotich Jehova!
5-8. Moko kuom jogo matiyo matek ne owetegi nikech gihero owetego kaachiel gi Jehova, gin ji kaka jorit malworo, jo misonari, jogo matiyo e Bethel, koda jogo matiyo tij painia. Yie ma ginyiso en ranyisi monego waluw, kendo owinjore wariwgi lwedo.
9-12. Onego waluw ranyisi maber mar Demetrio jal ma ne oluoro Nyasaye, to ok tim marach mar Diotrefe, jal ma ne ohero wuoyo ka chwogo weche manono, kendo ja andhoga.
“RITREURU E HERA MAR NYASAYE”
Juda luongo jogo madwaro chiko kanyakla e yo maling’ling’ ni, “jo ma ng’ur, jokeko, jo ma wuotho kaka gombogi dwaro.” Giwacho “weche madongo mag pakruok, ka giluoro wang’ ji.”—Juda 4, 16.
Jokristo nyalo kwedo nade gik maricho manyalo kethogi? Juda ndiko kama: “Joherana, paruru weche ma joote mag Ruodhwa Yesu Kristo nowachonu chon.” Omedo wacho kama: “Ritreuru e hera mar Nyasaye.”—Juda 17-21.
Dwoko Penjo mag Ndiko:
3, 4—Ang’o momiyo Juda nojiwo Jokristo mondo ‘oked matek ni yie’? En nikech ‘joma ok oluoro Nyasaye ne osedonjo maling’ling’ ei kanyakla.’ Jogi ne ‘loko ng’wono mar Nyasaye mondo odok tich anjawo.’
20, 21—Ere kaka wan wawegi wanyalo ‘ritre e hera mar Nyasaye’? Wanyalo timo mano e yore adek: (1) kuom gerore wawegi e ‘yiewa maler moloyo’ kokalo kuom puonjruok Wach Nyasaye kendo tiyo tij lendo gi kinda; (2) kuom kwayo ka walamo gi ‘roho maler,’ kata lamo ka waluwo kaka roho maler chikowa; kendo (3) kuom keto yie e gino mamiyo yudo ngima mochwere nyalore—tiende ni rawar mar misango Yesu Kristo.—Joh. 3:16, 36.
Puonj Mwayudo:
5-7. Be jomaricho nyalo tony e odiechieng’ kum mar Jehova? Kaluwore gi ranyisi adek moting’o siem, mayudore e bug Juda, mano en gima ok nyalre.
8-10. Onego waluw ranyisi mar Mikael malaika motelo kata maduong’, ka wanyiso luor ne jogo ma Jehova omiyo teko chikowa.
12. Joma ong’anjo moweyo adiera mawuondore ni gin gi hera, nyalo kelo hinyruok ahinya mana kaka lwendini ma pi oumo nyalo kelo hinyruok ne meli kata ne ng’at ma kwang’. Jopuonj mag miriambo nyalo nenore kaka joma ng’won, to kare gin mana kaka boche polo ma onge pi, tiende ni gionge gi wach Nyasaye. Gichalo kaka yedhe ma ok nyak ndalo mag oro. Gichomo e kethruok mana kaka yedhe mopudh gi tiendgi. Wanyiso rieko ka watang’ kendo tamore wechegi chuth.
22, 23. Jokristo madier sin gi gik maricho. Ka gitemo ‘reso jomoko mariwo gi kiawa’ a e mach mar kethruok manyaka chieng’, jogo molony manie kanyakla—to moloyo jodongo moseketi—konyo joma kamago mondo gibed gi yie kendo.
[Piche manie ite 30]
Pi, roho, kod remo nodoko joneno ni, “Yesu en Wuod Nyasaye”