Puonj Monya Ahinya

“Ne aluor ahinya kaparo ni chieng’ moro nowang’a e kar mach misandoe ji! Ne ajaleko ni iwita e mach kendo ne ajachiew ka agoyo nduru. Ne atemo matek ahinya mondo kik atim richo.”​—⁠Arline.

BE IYIE gi puonj mar ni nitie kar mach misandoe joricho? Ji mang’eny oyie gi puonjno. Kuom ranyisi, e higa 2005, jasomo moro e Yunivasiti mar St. Andrews e piny Scotland, ne oyudo ni kuom jotend din adek, achiel kuomgi oyie gi puonj mar ni jogo ma onge winjruok gi Nyasaye ne dhi bedo gi sand “mar parruok nyaka chieng’ e kar mach misandoe ji.” To kuom jotend din abich, ne oyud ni achiel kuomgi ne oyie ni sandno ne dhi bedo mar ringruok.

E pinje mang’eny, puonj mar ni nitie kar mach misandoe ji en puonj monya ahinya. Kuom ranyisi, e piny Amerka, nonro ma ne otim e higa 2007, ne oyudo ni chiegni pasent 70 mar joma ne openji, ne oyie ni nitie kar mach misandoe ji. Kata mana e pinje ma ji ok luwre ahinya gi weche Nyasaye, puonjno podi onya. Nonro moro ma ne otim e piny Kanada e higa 2004, noyudo ni pasent 42 mar ji e pinyno, oyie ni nitie kar mach misandoe ji. To e piny Ingresa, pasent 32 mag ji ne nigi adier ni nitie kar mach makamano.

Gima Jotend Dinde Puonjo

Thoth jotend din oseweyo puonjo ni nitie kar mach misandoe ji. Sani, giriwo lwedo weche manie buk miluongo ni Catechism of the Catholic Church, ma ne ogo e higa 1994. Bugno wacho kama: “Kum maduong’ mar mach misandoe ji [hell ], en bedo maonge winjruok gi Nyasaye nyaka chieng’.”

Kata obedo ni bugno wacho kamano, ji mang’eny podi oyie ni nitie kar mach misandoe ringre kata pach ji. Jogo majiwo puonjni temo wacho ni oyudore ei Muma. R. Albert Mohler, jatelo mochung’ne Southern Baptist Theological Seminary, wacho ayanga kama: “Mano to e gima Ndiko puonjo.”

Ang’o Momiyo Onego Inon Ahinya Yie ma In-go Kuom Puonjni?

Ka kuom adier nitie kar mach misandoe ji, onge kiawa ni mano onego omiyi luoro. Kata kamano, ka puonjni ok en adier, to kare jotend din mapuonjo wachno chocho ji, kendo gikelo parruok ahinya kuom jogo moyie gi puonjno. Bende giketho nying’ Nyasaye kuom puonjo kamano.

Muma ma en Wach Nyasaye to wacho ang’o kuom puonjno? Sula maluwogi biro dwoko penjo adekgi: (1) Kuom adier ang’o matimore ne ng’ato ka otho? (2) Ang’o ma Yesu nopuonjo kuom wach mach? (3) Ere kaka ng’eyo adiera kuom wach mach nyalo konyi?