Yesu Nopuonjo Ang’o e Wi Wach Mach?

Yesu nowacho niya: “Ka wang’i ema miyo itimo richo, to gole oko, nimar ber donjo e Piny Ruoth Nyasaye, ka in gi wang’ achiel, moloyo witi e mach ma ok rum ka in gi wengeni duto. Kuno kudni machamo ji ok thoe, kendo mach bende ok thoe.”​—MARIKO 9:47, 48, Luo Bible, 1976.

E kinde moro bende, Yesu nowuoyo kuom kinde moro mar bura, kinde ma ne odhi wacho ne joma richo niya: “Ayeuru kuoma, un jo mokwedi, udhi e mach ma nyaka chieng’, moik ni Satan kod malaika mage.” Nowacho bende ni jogi “nodhi e bura mochwere.”​—MATHAYO 25:41, 46.

KA NG’ATO ok onono weche ma Yesu nowacho malogo e yo matut, onyalo paro ni Yesu ne temo puonjo ni nitie kar mach misandoe ji. Onge kiawa ni Yesu ok ne dwar kwedo Wach Nyasaye, mawacho maler ni: “Jo motho ok ging’eyo gi moro.”​—Eklesiastes 9:5.

To kare Yesu ne temo wacho ang’o kane owuoyo kuom ng’at miwito e “mach ma ok rum”? Be “mach ma nyaka chieng’” ma Yesu nowuoyo kuome en mach masie, koso en mana ranyisi? Joma richo ‘dhi e bura mochwere’ e yo mane? We wanon ane penjogi moro ka moro.

En ang’o ma Yesu ne temo wacho kane owuoyo kuom ng’at miwito e “mach ma ok rum”? Wach molok ni “mach ma ok rum” e Mariko 9:47, en Geʹen·na e dho-Grik. To geʹen·na en wach mogol e Geh Hin·nomʹ, e dho-Hibrania matiende en “Hoho mar Hinnom.” Hoho mar Hinnom ne ni oko mar Jerusalem machon. E ndalo ruodhi mag Israel, hohono ne itiyo godo e wang’o nyithindo kaka misango​—tim mamono ma Nyasaye nokwero ahinya. Nyasaye nowacho ni, ne odhi ketho jogo ma ne timo tim ma kamano ma en kit lamo ma miriambo. Omiyo nochopo kama ne iluongo Hoho mar Hinnom ni, ‘hoho mar nek,’ kama ‘kitundu maggi’ ne dhi dong’ ka ok oyiki. (Yeremia 7:30-34) Kuom mano, Jehova nokoro ni Hoho mar Hinnom ne dhi bedo kama iwitoe ringre jo motho, to ok kar sando joma ngima.

E ndalo mag Yesu, joma nodak Jerusalem ne tiyo gi Hoho mar Hinnom kaka kar wito yugi. Ne gihinyo wito kitundu mag jo mahundu moko e hohono, kendo ne gihinyo neno ni mach liel kanyo kinde duto mondo omi giwang’ yugi gi ringre motho.

Kane Yesu wuoyo kuom kudni ma ok tho koda mach ma ok rum, nenre ni ne owuoyo kuom weche manie Isaiah 66:24. Kuom “kitundini mag jogo [mosetimo] marach” ne Nyasaye, Isaya wacho ni, “kudini mobedo kuomgi ok notho, kendo mach mobedo kuomgi ok anosim.” Yesu kaachiel gi jowinjone ne ong’eyo ni weche manie bug Isaiah ne wuoyo kuom kitundini mag jogo ma ok owinjore yudo yik.

Kuom mano, Yesu ne otiyo gi Hoho mar Hinnom, kata Gehenna, kaka ranyisi malero wach tho, ma ng’ato ok bed gi geno mar chier. Nonyiso maler tiend Gehenna kane osiemo ni, Nyasaye “nyalo tieko chuny gi ringruok bende e Gehenna.” (Mathayo 10:28) Gehenna en ranyisi mar tho manyaka chieng’, to ok sand mochwere.

 Be “mach ma nyaka chieng’” ma Yesu nowuoyo kuome en mach masie, koso en mana ranyisi? Ne ni “mach ma nyaka chieng’” ma Yesu nohulo wachne, kendo mondiki e Mathayo 25:41, en mach ma oiki ne “Satan kod malaika mage.” Be iparo ni mach masie nyalo wang’o chwech mag roho? Koso Yesu ne tiyo mana gi “mach” kaka ranyisi? Kuom adier, “rombe” kod “diek” miwuoyoe e twak nogono ok gin rombe gi diek masie; to gin mana ranyisi mar lero ji ma nigi kido ariyo mopogore. (Mathayo 25:32, 33) Mach manyaka chieng’ ma Yesu nowuoyoe, en mana ranyisi mar kaka ibiro tiek joma richo chuth.

Joma richo ‘dhi e bura mochwere’ e yo mane? Kata obedo ni loko mang’eny mag Muma wuoyo kuom “bura,” kata kum e Mathayo 25:⁠46, wach molok kanyo e dho-Grik en  koʹla·sin, to tiend wachno en “nono kaka yien dongo,” kata ng’ado oko bede ma ok owinjore. Omiyo, kata obedo ni jogo manyiso kido kaka mag rombe yudo ngima mochwere, joma ok lok chunygi manyiso kido kaka mag diek ikumo, ka gidhi e “bura mochwere,” ma ok giyud ngima ngang’ nyaka chieng’.

Ineno Nade Wachni?

Yesu ne ok opuonjo ngang’ ni dhano nigi gimoro ni chuny ma ok nyal tho. Kata kamano, kinde mang’eny ne opuonjo ji wach chier mar jo motho. (Luka 14:13, 14; Johana 5:25-29; 11:25) Be Yesu ne nyalo puonjo wach chier mar jo motho ka koni to ong’eyo ni chunjegi ok tho?

Yesu ne ok opuonjo ni Nyasaye ne dhi sando jomaricho nyaka chieng’. Kar mano, Yesu nowacho niya: “Nyasaye nohero piny ahinya, omiyo nochiwo Wuode ma miderma, mondo ng’a ma oyie kuome kik lal, to obed gi ngima mochwere.” (Johana 3:16) Ang’o momiyo Yesu ne nyalo wuoyo e yo manyiso ni jogo ma ne ok dhi keto yie kuome ne dhi tho? Ka gadier ne gidhi bedo mangima nyaka chieng’, kisandogi e mach, donge Yesu dine owacho kamano?

Puonj mar ni nitie kar mach misandoe ji ok en puonj ma Muma osiro. Kar mano, en puonj mar jo malamo nyiseche manono ka giwuondo ji ni mano en puonj mar Jokristo. (Ne sanduk mawacho ni, “Sigana Machuok e Wi Mach Misandoe Ji,” e ite mar 6.) Ooyo, onge kar mach mochwere ma Nyasaye sandoe ji. Ere kaka ng’eyo adiera kuom wach mach nyalo konyi kuom kaka ineno Nyasaye?

[Sanduk manie ite 6]

SIGANA MACHUOK E WI MACH MISANDOE JI

PUONJNI NOCHAKORE E DINDE MALAMO NYISECHE MANONO: Jo-Misri machon noyie kuom puonj mar mach misandoe ji. Buk miluongo ni Ȧm-Ṭuat, mar higa 1375 Ka Ndalowa Podi, wuoyo kuom jogo “ma ibiro wit piny e buche mag mach; kendo . . . ok ginitony wuok kuno, kendo . . . ok ginibed gi nyalo mar ringo a e mach.” Jasomo moro ma Ja-Grik miluongo ni Plutarch (chiegni higa 46-120 E Ndalowa) nondiko e wi jogo manie piny ma mwalo kama: “[Jogo] nogoyo nduru ka giywak nikech sand gi kum mager ma ne giyudo.”

PUONJNI NODONJO E DIN JO-YAHUDI: Josephus ma en jasomo manono weche machon (higa 37-chiegni 100 E Ndalowa), nondiko ni, jo Essenes, ma ne en din moro mar Jo-Yahudi ne puonjo ni “chunje ok nyal tho, kendo gidak nyaka chieng’.” Nomedo kama: “Mani bende e paro ma Jo-Grik ne nigo . . . Giparo ni chunje maricho itweyo kar mudho malich, kama ikumogie gi kum mosiko.”

PUONJNO NODONJO E DINDE MALUONGORE NI “JOKRISTO”: E higini mag 100-200 E Ndalowa, buk moro miluongo ni Apocalypse of Peter moting’o sigendini ma ok adier, nowacho kama kuom jo maricho: “Mach motak maok nyal tho oritogi.” Bugno bende nowacho kama: “Ezrael, malaika mar mirima, kelo chwo gi mon ka nus mar dendgi wang’, kendo owitogi e kar mudho, kar sando ji, kendo malaika moro mar mirima kumogi.” E higinigo bende, jandiko miluongo ni Theophilus mar Antioch nonwoyo weche janabi moro madhako mar Grik miluongo ni Sibyl, ma nokoro wach kumo joma richo, kowacho niya: “Mach maliel nobi kuomu, kendo pile unuwang’ e mach.” Magi gin moko kuom weche ma Theophilus wacho ni gin “adier, kendo mabeyo, kendo makare, kendo makonyo ji duto.”

PUONJ MAR MACH MISANDOE JI NE MIYO ITIMO NE JI TIMBE GERO E KIND HIGINI MAG 500-1500 E NDALOWA: Mary I, ruoth madhako mar Ingresa (higa 1553-1558), iluongo ni “Mary Jachwer remb ji” nikech nowang’o chiegni jo Protestant 300 mogur e yien. Wachre ni nowacho kama: “Nikech chunje jodin magala galagi ibiro wang’o nyaka chieng’ e mach misandoe ji, dibedna gima ber ka aluwo ranyisi mar kum mar Nyasaye kuom wang’ogi e piny ka.”

KAKA ILERO TIEND PUONJNO NDALOGI: E higini mokalo machiegni, dinde moko koro osetemo lero wach mach misandoe ji e yo machielo. Kuom ranyisi, riwruok mar Doctrine Commission of the Church of England nowacho e higa 1995 kama: “Mach misandoe ji ok en kar wang’o ji, to en bura mogik ming’ado ne ng’ato ang’ata makwedo Nyasaye, ma gikone en mana bedo maonge.”

[Sanduk/Picha manie ite 7]

“ATARO MAR LIGEK MACH” EN ANG’O?

Fweny 20:10 wacho ni ibiro wit Jachien e “ataro mar ligek mach” kendo ‘kanyo nosandee odiechieng’ gi otieno nyaka chieng’.’ Ka dibed ni ibiro sand Jachien nyaka chieng’, mano nyalo chuno ni Nyasaye owe Jachien ka ngima nyaka chieng’. Kata kamano, Muma wacho ni Yesu biro ‘ketho Satan.’ (Jo Hibrania 2:⁠14) Ataro mar ligek mach en mana ranyisi mar ‘tho mar ariyo.’ (Fweny 21:8) Mani ok e tho mokwongo ma Muma wuoyoe​—tho mikelo gi richo Adam​—ma en tho minyalo gonyie ng’ato kokalo kuom chier. (1 Jo Korintho 15:21, 22) To nikech Muma ok wach ni “ataro mar ligek mach” biro gonyo joma ni e iye, nyaka bed ni “tho mar ariyo” ochung’ne tho moro machielo, tho maonge geno mar chier.

Jogo manie “ataro mar ligek mach” isando nyaka chieng’ e yo mane? Nitie sama kowach ei Muma ni “isando” ng’ato, tiende en “geng’one.” E kinde moro jochiende nowacho ne Yesu ka gikok niya: “Isebiro ka eri mondo isandwa [mondo igeng’nwa e abiso], ka ndalo podi koso?” (Mathayo 8:29; Luka 8:30, 31) Omiyo jogo duto manie “ataro mar ligek mach” noyud ‘sand’ kogeng’negi nyaka chieng’, kata “tho mar ariyo.”