Ne Gichwowo Jatich Jehova—“Nikech Richowa”
Ne Gichwowo Jatich Jehova—“Nikech Richowa”
“Nochwowe nikech richowa, nogoye malit nikech timbewa mamono. . . . Kendo kuom riemo mage e mochangowa.”—ISA. 53:5.
1. En ang’o monego waket e paro seche mwatimo Rapar, to gin weche mage mokor mabiro konyowa timo kamano?
WAJOTIMO Rapar mondo wapargo tho Kristo kendo paro gigo duto ma tho koda chier mare osetimo. Timo Rapar paronwa wach ratiro ma Jehova nigo mar bedo jaloch e wi gik moko duto, koda kaka nyinge onego obed maler, kendo kaka dwaro mare chopo, koriwo koda warruok mar dhano. Wanyalo wacho ni onge weche moko mokor ei Muma manyiso e yo malong’o, wach misango mar Kristo koda gik ma misangono osetimo, maloyo weche mondiki e Isaiah 53:3-12. Isaya nokoro wach sand ma Jatichno ne dhi yudo, kendo nonyiso adimba weche mamoko kuom tho Kristo koda gweth ma owetene mowal kuom roho kaachiel gi ‘rombe mamoko’ ne dhi yudo.—Joh. 10:16.
2. Weche ma Isaya nokoro nyiso adiera mane, to gibiro konyowa e yo mane?
2 Chiegni higini 700, kane pok onyuol Yesu, Isaya nokoro kotelne gi much Jehova, ni Jatich ma Jehova ne oyiedho ne dhi chung’ motegno e bwo tem mager. Bedo ni Jehova nomiyo ondik wechegi, nyiso kaka Jehova ne nigi adier chuth ni Wuode ne dhi chung’ motegno. Sama wanono weche mokorgi, wabiro bedo mamor, kendo yiewa biro medo bedo motegno.
‘Ne Ochaye Kendo Ne Ok Odewe’
3. Ang’o momiyo ne owinjre mondo Jo-Yahudi orwak Yesu, to kar mano, ne gitimo ang’o?
3 Som Isaiah 53:3. Par ane kaka nyalo bedo ni Wuod Nyasaye ma miderma, nowinjo kane onyise mondo owe tich ma ne otiyo kanyachiel gi Wuon mare e polo, mondo obi e pinyka ochiw ngimane obed misango mareso dhano a e richo kod tho! (Fili. 2:5-8) Misengini mag le ma ne ichiwo kaluwore gi Chik Musa, ne gin mana tipo mar misangone ma ne biro kelo ng’wono madier kuom richo. (Hib. 10:1-4) Donge nowinjore orwake kendo omiye duong’, to ahinya wuon, gi Jo-Yahudi ma nosebedo karito Mesia ma ne osingi? (Joh. 6:14) Kar mano, mana kaka Isaya nokoro, Jo-Yahudi ‘nochayo’ Kristo, kendo ne ‘ok gidewe.’ Jaote Johana nondiko kama: “Nobiro ir [joggi], to joge ne ok orwake.” (Joh. 1:11) Jaote Petro nowacho ne Jo-Yahudi kama: “Nyasach kwerewa, osemiyo Jatichne Yesu duong’; ma un nundhogo, mukwede nyim Pilato, ka nosegolo wach ni mondo ogonye. To nukwedo Jal Maler kendo Makare.”—Tich 3:13, 14.
4. Yesu nong’eyo tuoche e yo mane?
4 Isaya bende ne okoro ni Yesu ne dhi ‘neno masira,’ matiende ni ng’eyo tuwo. En adier ni kane Yesu tiyo tije mar lendo, seche moko ne ool, to kata kamano onge gima nyiso kata matin ni ne obedo matuwo. (Joh. 4:6) Kata kamano, ne ong’eyo tuoche mag jogo ma ne olendonegi. Ne okechogi kendo ne ochango ji mang’eny. (Mari. 1:32-34) Kuom mano, Yesu nochopo wach ma nokor mawacho niya: ‘Adier oseting’o tuochewa, kendo osekawo chandruokwa.’—Isa. 53:4a; Math. 8:16, 17.
Ka Gima ‘Nyasaye Ne Ogoye’
5. Jo-Yahudi mang’eny ne neno tho Yesu e yo mane, to ang’o momiyo mano nomedone lit?
5 Som Isaiah 53:4b. Ng’eny jogo ma ne odak e kinde Yesu, ne ok ong’eyo gimomiyo ne osande mi otho. Ne giparo ni Nyasaye kume, mana ka gima Nyasaye ne goye gi tuwo moro marach. (Math. 27:38-44) Jo-Yahudi ne odonjo ne Yesu, ka giwacho ni ne oyanyo kendo piem gi Nyasaye. (Mari. 14:61-64; Joh. 10:33) En adier ni Yesu ok ne en jaricho, kendo ne ok opiem gi Nyasaye. Kata kamano, nikech hera maduong’ mane oherogo Wuon mare, tho kihango wach kuome ni oyanyo kendo piem gi Nyasaye, nyaka bed ni ne omedone lit kaka Jatich Jehova. Kata kamano, ne oyie bolore mondo otim dwach Jehova.—Math. 26:39.
6, 7. Tiende ang’o wacho ni Jehova ‘nogoyo’ Jatichne, to ang’o momiyo mano ne “long’o” ne Nyasaye?
6 Weche ma Isaya koro ni, jomoko ne dhi kawo ni “Nyasaye nogoyo” Kristo, opogore gi weche ma nokoro bende niya: “Ne long’o ni Jehova mondo ogoye.” (Isa. 53:10) To nikech Jehova bende noyudo osewacho ni: “Neuru jatichna, . . . maseyiedho, ma chunya mor kode,” ere kaka wanyalo wacho ni tho Yesu ne “long’o ni Jehova”? (Isa. 42:1) Wanyalo wacho ni mano ne okelone Jehova mor e yo mane?
7 Mondo wang’e tiend wach ma ne okorni, onego wang’e ni kane Satan okwedo ratiro ma Jehova nigo mar bedo jaloch, Satan noketo kiawa kabe jotich Nyasaye duto manie polo koda e piny, ne nyalo chung’ motegno. (Ayub 1:9-11; 2:3-5) Kuom chung’ motegno nyaka e tho, Yesu ne ochiwo dwoko makare chuth kuom kiawa ma Satan noketono. Kuom mano, kata obedo ni Jehova ne oyie mondo jowasike oneg Kristo, onge kiawa ngang’ ni Jehova ne owinjo malit sama noneno Jatichne moyiedho kinego. Kata kamano, neno Wuode ka chung’ motegno chuth, nomiyo Jehova mor mang’eny. (Nge. 27:11) E wi mano, ng’eyo ber mago ma tho Wuode ne dhi kelo ne oganda dhano moloko chunygi, ne okelo ne Jehova mor mogundho.—Luka 15:7.
‘Ne Ochwowe Nikech Richowa’
8, 9. (a) Ere kaka ‘ne ochwo Yesu nikech richowa’? (b) To ere kaka Petro lero wachno?
8 Som Isaiah 53:6. Mana kaka rombe molal, dhano ma joricho osechandore ka gimanyo resruok kuom tuwo kod tho ma ne oa kuom Adam. (1 Pet. 2:25) Bedo ni ne onyuolgi e richo, onge kata ng’at achiel kuom koth Adam ma ne nyalo ng’iewo kendo ngima ma Adam ne olalo. (Zab. 49:7) Kata kamano, nikech herane maduong’, ‘Jehova oseketo richowa duto,’ kuom Wuode mohero ma en Jatichne moyiedhi. Kuom yie mondo ‘ochwowe nikech richowa’ kendo mondo ‘ogoye malit nikech timbewa mamono,’ Kristo noting’o richowa kuome e yadh-sand, kendo ne othonwa.
9 Jaote Petro nondiko kama: “Nikech mano e ma noluongune; nimar Kristo bende noneno masira nikech un, koweyonu ranyis mondo uluw ndache. . . . En owuon noting’o richowa e ringre e yath, mondo watho ni richo, eka wabed mangima ni wach makare.” Kae to ka oluwo weche ma Isaya nokoro, Petro nomedo kama: “Kuom riemo mar chwatne osechangu.” (1 Pet. 2:21, 24; Isa. 53:5) Mano ne oyawo ne joricho thuolo mar bedo gi winjruok kendo gi Nyasaye, mana kaka Petro nomedo wacho kama: “Kristo bende noneno masira dichiel nikech richo, ng’at makare nikech jo ma ok kare, mondo okelwa ir Nyasaye.”—1 Pet. 3:18.
Ne Otere “Kaka Nyarombo Mitero Kar Yeng’o”
10. (a) Johana Jabatiso ne owacho ang’o kuom Yesu? (b) Ang’o momiyo weche ma Johana nowacho ne owinjore ndi?
10 Som Isaiah 53:7, 8. Kane Johana Jabatiso oneno Yesu kabiro, nowacho kama: ‘Neuru, Nyarombo mar Nyasaye, ma golo richo mag piny!’ (Joh. 1:29) Nyalo bedo ni sama Johana ne wuoyo kuom Yesu kaka Nyarombo, e pache ne en gi weche ma Isaya nokoro kama: ‘Nosande kaka nyarombo mitero kar yeng’o.’ (Isa. 53:7) Isaya nokoro niya: “Nowito ngimane nyaka tho.” (Isa. 53:12) Ber ng’eyo ni e otieno ma Yesu nochakoe nyasi mar Rapar thone, nomiyo jootene 11 ma ne ochung’ motegno, okombe mar divai mi owachonegi kama: “Ma e remba mar Muma, mochuer ni ji mang’eny mondo owenigi richogi.”—Math. 26:28.
11, 12. (a) Bedo ni Isaka ne oikore mar mondo ochiwe kaka misango, mano nobedo tipo nade kuom misango mar Kristo? (b) Sama watimo Rapar, en wach mane monego waket e paro kuom Jehova, ma en kaka Ibrahim Maduong’?
11 Mana kaka Isaka, Yesu ne oikore mar chiwo ngimane kaka misango mondo otim dwach Jehova. (Chak. 22:1, 2, 9-13; Hib. 10:5-10) Kata obedo ni Isaka noyie mondo ochiwe kaka misango, Ibrahim ema ne dwaro chiwe kaka misango. (Hib. 11:17) Kamano bende, Yesu ne oyie mondo otho, to kata kamano Jehova ema ne en Jachak chenrono mar chiwo rawar. Misango mar Wuode ne en yo ma Nyasaye nyiso godo kaka ohero dhano e yo matut.
12 Yesu owuon ne owacho kama: “Nyasaye nohero piny ahinya, omiyo nochiwo Wuode ma miderma, mondo ng’a ma oyie kuome kik lal, to obed gi ngima mochwere.” (Joh. 3:16) Jaote Paulo nondiko kama: “Nyasaye onyisowa hera moherowago kama, ni Kristo nothonwa, ka ne pod wan joricho.” (Rumi 5:8) Kuom mano, kata obedo ni wamiyo Kristo duong’ sama waparo thone, kik wiwa wil ngang’ ni Jehova, ma en kaka Ibrahim Maduong’, ema nochako chenrono mar chiwo misango. Watimo nyasi mar Rapar mondo pak gi duong’ odhi ne Jehova.
Jatichno Miyo “Ji Mang’eny Bedo Makare”
13, 14. Ere kaka Jatich Jehova osemiyo ‘ji mang’eny obedo makare’?
13 Som Isaiah 53:11, 12. Kowuoyo kuom Jatichne moyiedhi, Jehova wacho kama: “Jatichna makare nomi ji mang’eny bedo makare.” E yo mane? Giko mar kwan matindo 12, konyowa ng’eyo dwoko. Owacho kama: “Kendo [Jatichno] nosayo ni jo maricho.” Koth Adam duto inyuolo e richo, gin “jo maricho,” omiyo gikayo “misach richo,” ma en tho. (Rumi 5:12; 6:23) Duoko winjruok e kind Jehova gi dhano ma joricho, en gima dwarore. Weche ma Isaya nokoro e sula mar 53 nyiso kaka Yesu ‘nosayo’ ne jo maricho kama: “Nochwade mondo wan wayud kuwe; kendo kuom riemo mage e mochangowa.”—Isa. 53:5.
14 Kuom ting’o richowa kuome owuon, kendo thonwa, Kristo ne omiyo ‘ji mang’eny obedo makare.’ Paulo nondiko kama: “Ne long’o ni Nyasaye yiero mondo kite owuon chuth odag e i Kristo, kendo noyiero mondo, kuom Kristo, olos winjruok e kind en owuon kod gik moko duto manie piny kata e polo, kosekelo kuwe kuom rembe ma nochuer” e yadh-sand.—Kol. 1:19, 20.
15. (a) Ng’a gini ma gin ‘gik manie polo’ ma Paulo nowuoyo kuomgi? (b) Ng’a gini kende ma nigi ratiro mar chamo mkate kendo madho divai mag Rapar, to nikech ang’o?
15 ‘Gik manie polo’ mikelo e winjruok gi Jehova kokalo kuom remb Kristo ma ne ochuer, gin Jokristo mowal kuom roho, mabiro locho gi Kristo e polo. Jokristo ma ‘nigi luong moa kuom Nyasaye,’ ‘iketo kare mondo omigi ngima.’ (Hib. 3:1; Rumi 5:1, 18) Jehova bedo wuon-gi, to gin gibedo yawuote kuom roho. Roho maler bedo negi janeno ni gin “jocham gikeni kaachiel gi Kristo,” mondo gibi gibed ruodhi gi jodolo e Pinyruodh polo. (Rumi 8:15-17; Fwe. 5:9, 10) Gibedo jokanyo mag “Israel mar Nyasaye,” kendo irwakogi e “singruok manyien.” (Yer. 31:31-34; Gal. 6:16) Kaka jokanyo mag singruok manyien, gin ema gin gi ratiro mar chamo mkate kendo madho divai ma gin ranyisi mitiyogo e nyasi mar Rapar, kendo Yesu nowacho kama kuom kikombe mar divai: “Kikombeni e muma manyien kuom remba, mochuernu.”—Luka 22:20.
16. ‘Gik manie piny’ gin ang’o, to iketogi kare e nyim Jehova e yo mane?
16 ‘Gik manie piny’ gin rombe mamoko mag Kristo, ma nigi geno mar dak nyaka chieng’ e piny. Gin bende, Jatich moyiedhi mar Jehova, rwakogi e winjruok maber gi Jehova. Nikech giketo yie kuom rawar mar misango Kristo, mano nyiso ni “giselwoko nenggi, kendo miyogi doko marachere gi remb Nyarombo,” Jehova ketogi kare, ok kaka yawuote kuom roho, to oketogi kare kaka osiepene, komiyogi geno majaber mar tony e “sand maduong’no.” (Fwe. 7:9, 10, 14; Jak. 2:23) Nikech ok gin jokanyo mag singruok manyien, kendo ok gin gi geno mar dhi dak e polo, rombe mamokogi ok cham mkate kendo ok gimadh divai mag Rapar, to kata kamano gibedo e nyasino mana kaka joma neno.
Pak Duto Dhi Ne Jehova gi Jatichne Momorgo!
17. Ere kaka puonjruok weche ma Isaya nokoro mawuoyo kuom Jatichno, osekonyowa iko pachwa ne Rapar?
17 Nono weche ma Isaya nokoro mawuoyo kuom Jatichno, osekonyowa ahinya e iko pachwa ne Rapar mar tho Kristo. Timo kamano osekonyowa ‘tego wang’wa kuom Yesu, ma Jatelo kendo Jachop mar yiewa.’ (Hib. 12:2) Wasepuonjore ni Wuod Nyasaye ok en wuowi ma jang’anjo. Mopogore gi Satan, omor kuom puonj ma Jehova miye, koyie ni Jehova e Ruoth kendo Jaloch. Waseneno ni e kinde mago ma Yesu ne lendo e piny, ne okecho jogo ma ne olendoni, kochango thothgi, kendo konyogi bedo gi winjruok gi Nyasaye. Kuom mano, ne onyiso gigo mobiro timo e chenro manyien kaka Mesia Ruoth, e kinde ma ‘noketie bura e piny.’ (Isa. 42:4) Kinda ma nonyiso e tij lando wach Pinyruoth, ma nobedo kaka gino “makelo ni ogendini ler,” en gima paro ne jolupne mondo oland wach maber gi kinda e piny duto.—Isa. 42:6.
18. Ang’o momiyo weche ma Isaya nokoro miyo chunywa mor kwaduoko erokamano ne Jehova koda ne Jatichne mogeno?
18 Weche ma Isaya nokoro bende medo konyowa ng’eyo wach chiwruok maduong’ ma Jehova otimo, kane ooro Wuode mohero e piny mondo osandi kendo othonwa. Jehova ne mor, ok e neno kisando Wuode, to e neno kaka Yesu chung’ motegno nyaka e tho. Onego wabed mamor kaka Jehova, kwang’eyo ni duto ma Yesu notimo e nyiso ni Satan en jamiriambo, kendo keto nying’ Jehova obedo maler, nonyiso ni Jehova ema nigi ratiro mar bedo Jaloch. E wi mano, Kristo noting’o richowa kuome owuon, mi ne othonwa. E yo makamano, nomiyo kweth matin mar owetene mowal kuom roho koda rombe mamoko, obedo gi winjruok makare e nyim Jehova. Sama wabiro chokore kanyachiel kwatimo Rapar, mad chunywa pong’ gi mor koda erokamano ne Jehova koda ne Jatichne mogeno.
E Yor Nwoyo
• “Ne long’o ni Jehova” mondo ogo Wuode e yo mane?
• Ere kaka Yesu ‘ne ochwo nikech richowa’?
• Ere kaka Jatichno ne omiyo “ji mang’eny bedo makare”?
• Ere kaka puonjruok weche mokor mawuoyo kuom Jatichno, osekonyowa iko pachwa ne Rapar?
[Penjo mag Puonjruok]
[Picha manie ite mar 26]
‘Ji ne ochaye, to ne ok wadewe’
[Picha manie ite mar 28]
“Nowito ngimane nyaka tho”
[Picha manie ite mar 29]
‘Rombe mamoko’ bedo e nyasi mar Rapar kaka jogo ma neno gi luor