Neuru! Jatich ma Jehova Morgo

‘Neuru! Jatichna ma chunya morgo!’—ISA. 42:1.

1. Ijiwo oganda Jehova mondo otim ang’o, to moloyo e kinde ma Rapar okayo, to nikech ang’o?

SAMA kinde mar timo rapar mar tho Kristo sudo machiegni, dwarore ni oganda Nyasaye oluw puonj ma Paulo nochiwo kowacho ni, onego wateg ‘wang’wa kuom Yesu, ma Jatelo kendo Jachop mar yiewa.’ Paulo nomedo kama: “To paruru kuom Jal ma nodhil e piemruok mager ma kamano, ka ne joricho opiem kode, mondo un bende kik uol kendo kik chunyu a.” (Hib. 12:2, 3) Tego wang’wa kuom kaka Kristo ne ochung’ motegno mi gikone nochiwore kaka misango, biro konyo Jokristo mowal kuom roho kaachiel gi jowetegi ma gin rombe mamoko, mondo gidhi nyime nano e tiyo ne Jehova maok ‘chunygi a.’—Pim gi Jo Galatia 6:9.

2. Gin ang’o mwanyalo puonjore kuom weche ma Isaya nokoro mawuoyo kuom Wuod Nyasaye?

² Kokalo kuom janabi Isaya, Jehova nomiyo okor weche mamulo Wuode achiel kachiel. Weche mokorgi biro konyowa tego ‘wang’wa kuom Jatelo kendo Jachop mar yiewa’ ma en Kristo Yesu. * Wechego konyowa ng’eyo kite, sand ma noyudo, koda kaka ne omiye migawo maduong’ mar bedo Ruodhwa kendo Jawarwa. Gibiro konyowa medo ng’eyo tiend Rapar, ma e higani ibiro tim Tich Ang’wen, April 9, bang’ podho chieng’.

Kaka Ifwenyo Jatichno

3, 4. (a) E bug Isaiah, nying’ moti godo ni, ‘jatichna’ ochung’ne ng’a? (b) Ere kaka Muma wuon fwenyo Jatich miwuoyo kuome e Isaiah sula mag 42, 49, 50, 52, kod 53?

³ ‘Jatich’ en nying’ mayudore nyading’eny e bug Isaiah. Nitie sama janabino tiyo kod nying’ ni, ‘jatich’ kowuoyo kuome owuon. (Isa. 20:3; 44:26) To nitie seche mitiyo kod nying’no kiwuoyo kuom oganda duto mar Israel, kata Jakobo. (Isa. 41:8, 9; 44:1, 2, 21) To nade weche mokor e wi Jatich miwuoyo kuome e Isaiah sula mag 42, 49, 50, 52, kod 53? Ndiko mag Dho-Grik mag Jokristo konyowa fwenyo Jatich Jehova miwuoyo kuome e sulago. Ber ng’eyo ni, Ja-Ethiopia miwuoyo kuome e bug Tich Joote, ne oyudo somo achiel kuom weche mokorgo kane roho otayo Filipo jaland-injili mondo odhi ire. Kane Ja-Ethiopiano osesomo wechego manie Isaiah 53:7, 8 ei Muma, Filipo nopenjo kama: “Kiyie, apenji, janabi oluwo wachni kuom ng’a? Kuome owuon, koso kuom ng’at moro?” Gikanyono Filipo ne olero ni, Isaya ne wuoyo kuom Mesia, Yesu.—Tich 8:26-35.

⁴ Kane Yesu podi en nyathi, jal moro makare miluongo ni Simeon nowacho  ayanga kotelne gi roho maler ni, “nyathi ma Yesu” ne dhi bedo ‘ler ma nobed fwenyruok ne ogendini,’ mana kaka okor e Isaiah 42:6 kod 49:6. (Luka 2:25-32) E wi mano, timbe makelo wichkuot ma ne otim ne Yesu e otieno ma ne oyale, ne okor e Isaiah 50:6-9. (Math. 26:67; Luka 22:63) Bang’ odiechieng’ Pentekost mar higa 33 E Ndalowa, jaote Petro nonyiso ratiro ni Yesu en ‘Jatich’ Jehova. (Isa. 52:13; 53:11; som Tich Joote 3:13, 26.) Gin ang’o mwanyalo puonjore kuom wechego ma ne okor e wi Mesia?

Jehova Tiego Jatichne

5. Jatich miwuoyo kuome ne oyudo tiegruok mane?

⁵ Achiel kuom weche ma Isaya nokoro e wi Jatich Nyasaye, konyowa ng’eyo wach winjruok machiegni ma ne nie kind Jehova gi Wuode makayo, e kinde mago ma Wuode pok ne obedo dhano. (Som Isaiah 50:4-9.) Jatichno owuon wacho kama konyiso ni Jehova ne siko ka tiege: “Oyawo ita mondo awinj kaka jo mopuonjore.” (Isa. 50:4) Kuom kindeno duto, Jatich Jehova ne winjo Wuon mare kendo ne opuonjore kuome, kobedo japuonjre mabolore. Mano kaka Jatichno ne nigi thuolo makende kipuonje gi Jachwech gik moko duto!

6. Ere kaka Jatichno nonyiso ni nobolore chuth ne Wuon mare?

⁶ E weche ma Isaya nokorogo, Jatichno wuoyo konyiso ni Wuon mare en “Jehova Nyasaye.” Mani nyiso ni Jatich miwuoyoeno nong’eyo maler ni Jehova ema nigi ratiro mar bedo Jaloch e wi gik moko duto. Konyiso kaka obolore chuth ne Wuon mare, Jatichno wacho kama: “Jehova Nyasaye oseyawo ita, ne ok adagi, kata loko dieng’eya.” (Isa. 50:5) “Ne an bute [Jehova] gi kanyono ka jatich molony” e kinde ma ne ichweyo gik moko duto koda dhano. ‘Jatich molonyni ne oil e nyim Jehova ndalo duto, kendo Wuod Nyasaye ne oil kuom piny ma ji odakie; mi ne omor gi yawuot ji.’—Nge. 8:22-31.

7. Ang’o manyiso ni Jatichno ne nigi adier ni Wuon mare ne dhi tege e bwo tembe?

⁷ Tiegruok ma Jatichno ne oyudo kaachiel gi hera ma nohero godo dhano, ne oike maber mar biro e piny kendo nyagore gi akwede mager. Ne odhi nyime timo dwach Wuon mare gi mor, kata mana e bwo sand mager. (Zab. 40:8; Math. 26:42; Joh. 6:38) Kuom tembe duto ma noyudo e piny, Yesu ne nigi adier ni Wuon mare ne dhi tege, kendo riwe lwedo. Mana kaka Isaya nokoro, Yesu ne nyalo wacho kama: “Ng’a mapogo wachna kare ochiegini; ng’a mabiro piem koda? . . . Neuru, Jehova Nyasaye nokonya.” (Isa. 50:8, 9) Kuoma adier, Jehova nokonyo Jatichne kuom kinde duto mag tich ma notiyo, mana kaka weche mamoko ma Isaya nokoro nyiso.

Tich ma Jatichno Notiyo e Piny

8. Ang’o manyiso ni Yesu e ‘ng’at moyiedhi,’ mana kaka ne okor e Isaiah 42:1?

⁸ Weche mondik ei Muma nyisowa gima ne otimore kane obatis Yesu e higa 29 E Ndalowa: ‘Roho maler nolor kuome kendo dwol noa e polo niya: “In e Wuoda mahero, chunya mor kodi.”’ (Luka 3:21, 22) Kuom mano, Jehova nohulo owuon wach ‘ng’at moseyiedho,’ ma e ng’at ma Isaya nokoro wachne. (Som Isaiah 42:1-7.) E kinde mag tije mar lendo e piny, Yesu nochopo weche mokorgo e yo makende ahinya. Kaluwore gi Injili ma Mathayo nondiko, ne oluwo weche mayudore e Isaiah 42:1-4, kendo nonyiso ni gichopo kuom Yesu.—Math. 12:15-21.

9, 10. (a) Ere kaka Yesu nochopo weche manie Isaiah 42:3 e tije mar lendo? (b) Ere kaka Kristo ‘ne ng’ado bura gadiera’ kane en e piny, to e kinde mane ma obiro ‘ketoe bura e piny’?

⁹ Jotend din mar Jo-Yahudi ne ochayo ji. (Joh. 7:47-49) Ne itimo ne ji malit, kendo ne inyalo pimgi gi “odundu motore” kata “yuk tuoro” makoro chiegni sim. Kata kamano, Yesu ne kecho jochan gi joma chandore. (Math. 9:35, 36) Ne ogwelo joma kamago kowacho niya: “Biuru ira, un duto mujony kendo  mugangoru mapek, to anamiu yueyo.” (Math. 11:28) E wi mano, Yesu ‘ne ng’ado bura gadiera,’ kopuonjo chike ma Jehova oketo kuom wach gik makare koda maok kare. (Isa. 42:3) Bende nomedo nyiso ni ne dwarore ji oti gi Chik Nyasaye e yo mowinjore maok gikal tong’, kendo ginyis ng’wono. (Math. 23:23) Yesu bende ne onyiso ni ok odew wang’ ji kolendo ne ji duto, jo mewo koda jodhier.—Math. 11:5; Luka 18:18-23.

¹⁰ Weche Isaya bende koro ni, ‘ng’at moyiedhi’ mar Jehova, ‘nyaka noket bura e piny.’ (Isa. 42:4) Mani obiro timo machiegni, e kinde ma en kaka Ruodh Pinyruodh Mesia, enoketh pinjeruodhi duto mag siasa, kendo kargi ibiro kaw gi lochne owuon makare. Obiro rwako ji e piny manyien, “ka ma wach makare odakie.”—2 Pet. 3:13; Dan. 2:44.

Iluonge Ni “Ler” Kendo Ni “Singruok”

11. Kane en e piny,Yesu ne ‘kelo ni ogendini ler’ e yo mane, to otimo kamano nade nyaka e ndalogi?

¹¹ Kaluwore gi weche manie Isaiah 42:6, Yesu nobedo jal “makelo ni ogendini ler” gadier. E kinde ma ne en e piny, ne okelo ne ji ler mar wach Nyasaye, to moloyo ne Jo-Yahudi. (Math. 15:24; Tich 3:26) To Yesu nowacho niya: ‘An e ler mar piny.’ (Joh. 8:12) Ne obedo ler ne Jo-Yahudi koda ne ogendini, ok mana kuom miyogi ler mar wach Nyasaye kende, to bende kuom chiwo ngimane makare chuth kaka rawar mar oganda dhano duto. (Math. 20:28) Bang’ chierne, ne omiyo jopuonjrene tij bedo jonenone “nyaka tung’ piny.” (Tich 1:8) E kinde ma ne gilendo, Paulo gi Barnaba noluwo weche mawuoyo kuom kelo “ni ogendini ler,” kendo ne ginyiso ni wechego ne chopo kuom tij lendo ma ne gitimo e kind joma ne ok gin Jo-Yahudi. (Tich 13:46-48; pim gi Isaiah 49:6.) Tijno podi dhi nyime e ndalogi ma owete Yesu mowal kuom roho kaachiel gi jowetegi ma gin rombe mamoko, lando wach maber kendo konyo ji keto yie kuom Yesu jal “makelo ni ogendini ler.”

12. Ere kaka Jehova osechiwo Jatichne kaka “singruok mar ji”?

¹² E weche ma Isaya nokorogo, Jehova nowacho ne Jatichne moyiedhi kama: “Nariti, namii bedo singruok mar ji.” (Isa. 42:6) Satan notemo ahinya mondo oneg Yesu kodwaro mone chopo tich ma ne okele e piny, kata kamano Jehova ne orite nyaka nochopo kinde mago ma ne oketne mar tho. (Math. 2:13; Joh. 7:30) Bang’e, Jehova nochiero Yesu kendo chiwe kaka “singruok,” kata muma ne jo manie piny. Singruokno ne onyiso gadier ni Jatich Nyasaye ma ne ochung’ motegnono, ne dhi siko kaka jal “makelo ni ogendini ler,” kogonyo jogo manie mudho mar wach Nyasaye.—Som Isaiah 49:8, 9. *

13. Kane en e piny, Yesu noreso nade “jo manie mudho,” to odhi nyime timo kamano nade?

¹³ Kaluwore gi singruokni, Jatich Jehova moyiedhino, ne dhi bedo jal “mayawo wang’ jogo mak nen, magolo oko jo motwe manie od twech,” kendo mareso “jo manie mudho.”  (Isa. 42:7) Kane en e piny, Yesu ne otimo mae kuom elo puonj mag miriambo mag jodin, kendo kuom lando wach maber mar Pinyruoth. (Math. 15:3; Luka 8:1) E timo kamano, ne oreso Jo-Yahudi ma nobedo jopuonjrene, mi ogologi kuom din mar miriambo. (Joh. 8:31, 32) E yo machalo kamano, Yesu osekonyo ji tara mang’eny maok gin Jo-Yahudi, opuonjore adiera. Osechiko jolupne mondo ‘odhi otim ogendini duto jopuonjrene,’ kendo osingo ni obiro bedo gi jolupne “ndalo duto nyaka giko mar ndalo.” (Math. 28:19, 20) Ka en e polo, Kristo Yesu tayo tij lendo ma dhi nyime e piny mangima.

Jehova Noting’o ‘Jatichno’ Malo

14, 15. Ang’o momiyo Jehova ne oting’o Jatichne malo, to ne otimo kamano nade?

¹⁴ To podi e weche mamoko ma Nyasaye ne omiyo okor wach Jatichne ma Mesia, Jehova wacho kama: ‘Neuru! Jatichna notim gi rieko, noting’e malo, nomie duong’, mi nobedi kar duong’ ma malo.’ (Isa. 52:13) Jehova ne oting’e malo, nikech Wuodeno ne obolore e bwo lochne, kendo ne ochung’ motegno e bwo tem matek ahinya.

¹⁵ Jaote Petro nondiko e wi Yesu kama: ‘Ne osedhi e polo, obet kor bat marachwich mar Nyasaye, kendo oket malaika gi loch gi teko mondo owinje.’ (1 Pet. 3:22) Kamano bende, jaote Paulo nondiko ni: “Nobet mamuol, kodoko ng’a ma winjo wach nyaka tho; ee, tho mar [“yadh-sand,” NW]. E momiyo Nyasaye ne oting’e malo ahinya, kendo ne omiye nying’ moloyo nying’ duto, ni mondo e nying Yesu gik moko duto ogo chonggi piny, gik manie polo, kod gik manie piny, kod gik manie bwo piny, kendo lep ka lep ohul ni Yesu Kristo en Ruoth, mondo Nyasaye Wuoro omi duong’.”—Fili. 2:8-11.

16. Ere kaka ne ‘oting’ Yesu malo ahinya’ e higa 1914, to ang’o ma osechopo nyaka a kanyo?

¹⁶ E higa 1914, Jehova noting’o Yesu malo e okang’ momedore. Ne ‘oting’e malo ahinya’ kane Jehova okete kaka Ruoth mar Pinyruodh Mesia. (Zab. 2:6; Dan. 7:13, 14) Nyaka a kanyo, Kristo osebedo ka dhi nyime ‘bedo gi loch e dier wasike.’ (Zab. 110:2) Mokwongo, noloyo Satan gi jochiendene kane owitogi e alwora mar piny. (Fwe. 12:7-12) Kae to kotiyo kaka Kuro Maduong’, Kristo noreso owetene modong’  mowal kuom roho man e piny, mondo giwuogi e twech mar ‘Babulon Maduong’.’ (Fwe. 18:2; Isa. 44:28) Osebedo kotayo tij lendo mar piny mangima, ma en tich mosemiyo ochok jo “modong’” mag owetene mowal kuom roho, kaachiel gi choko tara mang’eny mag ‘rombe mamoko’ ma gin jowete ‘kwethno matin’ momakore kodgi.—Fwe. 12:17; Joh. 10:16; Luka 12:32.

17. Ang’o mwasepuonjore nyaka chop sani kuom nono weche mokor e Isaiah mawuoyo kuom ‘jatichno’?

¹⁷ Kuom adier, puonjruok weche mabeyo mokor e bug Isaiah osekonyowa medo ng’eyo Ruodhwa kendo Jawarwa, Kristo Yesu. Kane en piny, yo ma ne obolorego kare nonyiso maber tiegruok ma ne oyudo ir Wuon mare kapok ne obiro e piny. Osenyiso gadier ni en e jal “makelo ni ogendini ler” kokalo kuom tich ma owuon ne otimo, kendo kokalo kuom tij lendo mosebedo kotayo nyaka chop kawuononi. Mana kaka wabiro neno e sula maluwo, weche mamoko ma ne okor e wi Jatichno ma en Mesia, nyiso ni ne idhi sande, kendo ne odhi chiwo ngimane mondo omi okonywa. To magi gin weche monego ‘wategie wang’wa’ kaka odiechieng’no mar Rapar mar thone sudo machiegni.—Hib. 12:2, 3.

[Weche moler piny]

E Yor Nwoyo

• ‘Jatichno’ miwuoyo kuome e weche ma Isaya nokoro en ng’a, to ere kaka wang’eyo mano?

• En tiegruok mane ma Jatichno ne oyudo kuom Jehova?

• Ere kaka Yesu en jal “makelo ni ogendini ler”?

• Ere kaka ne oting’ Jatichno malo?

[Penjo mag Puonjruok]

[Picha manie ite mar 21]

Filipo nonyiso ratiro ni jal ma Isaya luongo ni ‘jatichno’ en Yesu, Mesia

[Picha manie ite mar 23]

Kaka Jatich Jehova moyiedhi, Yesu nokecho jochan gi joma nie chandruok

[Picha manie ite mar 24]

Ne oting’ Yesu malo gi Wuon mare, kendo ne okete Ruoth mar Pinyruodh Mesia