Be Weche Yesu Chiko Lamo Magi?
Be Weche Yesu Chiko Lamo Magi?
“Ka ne Yesu otieko wechegi, oganda nowuoro ngang’ kuom puonjne.”—MATH. 7:28.
1, 2. Ang’o momiyo ji ne hum kuom yo ma Yesu ne puonjogo?
DWARORE wayie gi weche Yesu Kristo, Wuod Nyasaye ma miderma, kendo wati kod wechego e ngimawa. Kuom adier, onge dhano moro amora ma ne nyalo wuoyo maloye. Ji ne hum nono kuom yo ma ne opuonjogo e Twak mar Got.—Som Mathayo 7:28, 29.
2 Wuod Jehova ok ne puonj kaka jondiko ma ndalone, ma ne tiyo gi weche mang’eny moting’o rieko mag dhano morem. Kristo ne puonjo “kaka ng’at man gi teko,” nimar gik ma nowacho ne oa kuom Nyasaye. (Joh. 12:50) Omiyo, weuru wane ane kaka weche mamoko ma Yesu nowacho e Twak mar Got, nyalo, kendo onego omul lamo magwa.
Kik Ilem Ngang’ Kaka Jogang Wach Timo
3. Ket ane e yo machuok puonj manie weche Yesu mondiki e Mathayo 6:5.
3 Lamo en gima dwarore ahinya, kendo onego wawuo gi Jehova e lamo pile. Kata kamano, weche ma Yesu nowacho e Twak ma ne ogolo e Got, onego ochik yo ma walemogo. Nowacho kama: “Kulemo, kik ubed kaka jo ma gango wach; nikech gihero lemo ka gichungo e sunagoke kendo e akek yore madongo, mondo ji onegi. Adier awachonu ni, giseyudo pokgi.”—Math. 6:5.
4-6. (a) Ang’o momiyo jo Farisai ne ohero lemo “ka gichungo e sunagoke kendo e akek yore madongo”? (b) Jogang wachgo ne ‘oseyudo pokgi’ e yo mane?
4 Jopuonjre Yesu ok ne onego olem ka “jo ma gango wach” kaka jo Farisai, ma ne kawore ni gin joma kare, ka ginyisore e lela to kare ne en mana wuondruok. (Math. 23:13-32) Jogang wachgo nohero lemo “ka gichungo e sunagoke kendo e akek yore madongo.” Nikech ang’o? Eka mondo “ji onegi.” Jo-Yahudi ma nodak e kinde Yesu nohero lemo kagin kanyachiel sama ne gichiwo misango miwang’o e hekalu (chakre gimoro sa adek okinyi, nyaka sa ochiko odhiambo). Thoth joma ne odak Jerusalem ne hinyo lemo kaachiel gi jogo ma ne lemo e alwora mar hekalu. Oko mar dalano, Jo-Yahudi ma ne ochiwore moloyo, ne ohero lemo nyadiriyo e odiechieng’, “ka gichungo e sunagoke.”—Pim gi Luka 18:11, 13.
5 To nikech ng’eny ji ok ne yudore machiegni gi hekalu, kata e sunagogi e kinde mar lamo moa nyisgo, ne ginyalo lamo kamoro amora ma ne gintie e sechego. Moko nohero mondo seche mag lemo oyudgi ka gin “e akek yore madongo.” Ne gidwaro mondo joma kalo e akek yorego “onegi.” Jogang wachgo ne ‘lemo aming’a e yor wuondruok’ mondo omi opuogi gi joma kalo. (Luka 20:47) Ok onego wabed gi chuny makamano.
6 Yesu nowacho maler ni jogang wach makamago ‘oseyudo pokgi.’ Ne gigombo ahinya mondo dhano wetegi opuogi kendo opakgi—to mano kende e pok ma ne gidhi yudo. Mano ema ne dhi bedo pok margi duto, nimar Jehova ok ne nyal dwoko lamo mag joma wuondore. To mopogore gi mano, Nyasaye ne dhi dwoko lamo mag jolup Kristo madier, mana kaka weche Yesu maluwo nyiso.
7. Tiend puonj mar ni walem e ‘odwa maiye’ en ang’o?
7 “To in, kilemo, donji e odi maiye, to kiseloro dho ot, lam Wuoru mobet apanda; to Wuoru ma neno apanda nomiyi.” (Math. 6:6) Puonj ma Yesu nochiwo ni walem e odwa maiye bang’ loro dhoot, ok ne nyis ni ng’ato ok nyal wuoyo gi Nyasaye e lamo e nyim kanyakla. Ne ochiwo puonjno mondo okwer godo lamo ma ne itimo e lela mondo ng’at ma lemono oyud pak koa kuom jomoko. Onego wapar wachni ahinya seche ma omiwa thuolo mar wuoyo gi Nyasaye e lamo e lo ogandane. Weuru bende mondo waluw weche mamoko ma Yesu nopuonjo kuom wach lamo.
8. Kaluwore gi Mathayo 6:7, en yo mane mar lamo maok owinjore?
8 “Kulemo, kik uthor wacho weche manono, kaka jo ma ok oyie; ma paro ni nowinjgi nikech wechegi ng’eny.” (Math. 6:7) Kuom mano, Yesu nowuoyo kuom yo machielo maok owinjore e lamo—tiende ni nworuok. Mano ok ne nyis ni ok onego wanwo kwayo manie chunywa kata dwoko erokamano. Kane en e puodho mar Gethsemane, e otieno ma ne othoe, Yesu ne olamo konwoyo ‘weche.’—Mari. 14:32-39.
9, 10. Ok onego wanwo lamo magwa e yo mane?
9 Ok nyal bedo gimaber ka wanwoyo lamo mag “jo ma ok oyie.” Githoro nwoyo “weche manono” mang’eny. Timo kamano ne ok okonyo jogo ma ne lamo Baal, nyasach miriambo, “nyaka a okinyi nyaka chop odiechieng’ tir, ka giwacho, Yaye Baal, winjwa.” (1 Ruo. 18:26) Ndalogi, dhano tara gi tara thoro tiyo gi weche mang’eny minwoyo sama gilemo ka giparo “ni nowinjgi.” Kata kamano, Yesu konyowa ng’eyo ni tiyo ‘gi weche mang’eny’ e lamo mabor kendo minwoyo, ok en gima duong’ e wang’ Jehova. Yesu nomedo wacho kama:
10 “Kik ubed kaka jogo; nikech Wuonu ong’eyo gigo muchando ka pok ukwaye.” (Math. 6:8) Thoth jotend din mar Jo-Yahudi notimore giwegi kaka ogendini mamoko kokalo kuom tiyo gi weche mang’eny e lamo. Tiyo gi weche mawuok e chunywa sama wawuoyo gi Nyasaye, ka wapake, wapuoye, kendo wakwaye, en gima dwarore ahinya e lamo madier. (Fili. 4:6) Kata kamano, ok dibed gimaber ka wasiko wanwoyo weche ka waparo ni timo kamano dwarore mondo eka wanyis Nyasaye gigo ma wachando. Sama walemo, onego wang’e ni wawuoyo gi Jal ‘mong’eyo gigo ma wachando kapok wakwaye.’
11. Gin ang’o monego wang’e sama omiwa thuolo mar lamo e nyim ji?
11 Weche Yesu mawuoyo kuom lamo maok owinjore, onego oparnwa ni Nyasaye ok en ng’ama inyalo wuondi gi weche ma tekregi ng’eny. Bende onego wang’e ni lamo mitimo e nyim ji ok en kinde mar temo moro jowinjo, kata miyo lamo obed mabor mamiyo jowinjo chako wuoro ni gibiro wacho “Amina” sa adi. Tiyo gi lamo e timo lendo moko kata chiwo siem moro ne jowinjo, ok bi winjore gi weche ma Yesu ne ogolo e Twak mar Got.
Yesu Puonjowa Kaka Onego Walem
12. Inyalo lero nade tiend kwayo mawacho ni “nyingi mondo obed maler”?
12 Kata obedo ni Yesu nokwero wach tiyo gi thuolo mar lamo e yo maok kare, ne opuonjo jopuonjrene kaka onego gilem. (Som Mathayo 6:9-13.) Lamo ma nochiwo kaka ranyisi, ok en lamo monego obed kinwoyo anwoya. Kar mano, en mana ranyisi mar kaka onego walem. Kuom ranyisi, Yesu noketo Nyasaye motelo e weche ma ne ochakogo niya: “Wuonwa manie polo, nyingi mondo obed maler.” (Math. 6:9) En gima owinjore luongo Jehova ni “Wuonwa,” nimar en e Jachwechwa, modak e “polo,” mabor ahinya gi piny. (Rapar 32:6; 2 Weche 6:21; Tich 17:24, 28) Bedo ni owacho ni “Wuonwa” to ok ni Wuora, onego oparnwa ni Jokristo wetewa bende nigi winjruok machiegni gi Nyasaye. Wacho ni “nyingi mondo obed maler,” en kwayo Jehova mondo okaw okang’ mar tieko ayany duto mosewach kuome chakre ng’anjo ma ne otimore e Eden. Kodwoko lamono, Jehova biro tieko gik maricho e piny, kendo kuom timo mano, nyinge biro dong’ maler.—Eze. 36:23.
13. (a) Kwayo mar mondo ‘pinyruoth obi’ biro chopo nade? (b) Nyasaye biro chopo dwaro mare e piny kuom timo ang’o?
13 “Pinyruodhi mondo obi, gi midwaro mondo otimre e piny kaka e polo.” (Math. 6:10) Kaluwore gi kwayoni, onego wang’e ni ‘pinyruoth’ en sirkand Mesia e polo e lwet Kristo kaachiel kod “jo maler” mosechier mabiro bedo kode. (Dan. 7:13, 14, 18; Isa. 9:6, 7) Lamo mondo pinyruodhno “obi,” en kwayo mondo Pinyruodh Nyasaye obi oketh jogo duto makwedo loch Nyasaye e piny. Mano en gima biro timore machiegni, ka oyawo thuolo mar mondo piny duto obed paradis kama tim makare, kuwe, koda ngima maber ogundhoe. (Zab. 72:1-15; Dan. 2:44; 2 Pet. 3:13) Dwaro mar Jehova timore e polo, omiyo, sama walamo mondo dwarono otimore e piny, wanyiso ni wakwayo mondo Nyasaye ochop dwaro mage kuom piny, moriwo koda golo jowasike masani, kaka ne otimo e kinde machon.—Som Zaburi 83:1, 2, 13-18.
14. Ang’o momiyo en gima owinjore kwayo “chiembwa ma ndalo duto”?
14 “Imiwa tinende chiembwa ma ndalo duto.” (Math. 6:11; Luka 11:3) Kuom timo kwayo makamano, en gima nyiso ni wakwayo Nyasaye mondo ochiwnwa “chiembwa ma ndalo duto,” tiende ni mar odiechieng’ kodiechieng’. Mano nyiso ni wan gi yie kuom nyalo ma Jehova nigo mar ritowa kendo miyowa dwarowa mapile. Mani ok en lamo mar kwayo chiwo mokalo mago madwarore. Kwayo mar mondo wayud chiembwa mapile, nyalo paronwa kaka Nyasaye nochiko Jo-Israel mondo ochok manna “moromo chieng’ achiel ndalo ka ndalo.”—Wuok 16:4.
15. Ler ane tiend kwayo ni, “iwenwa gopewa, kaka wan bende waseweyo ni jogopewa.”
15 Kwayo maluwo e lamo mar ranyisini, ywayo pachwa e gimachielo monego watim. Yesu nowacho kama: “Iwenwa gopewa, kaka wan bende waseweyo ni jogopewa.” (Math. 6:12) Injili mar Luka nyiso ni ‘gope’ miwuoyoe kae gin “richo.” (Luka 11:4) Man ka “waseweyo” ne jogo motimonwa richo eka wanyalo geno ni Jehova bende biro weyonwa. (Som Mathayo 6:14, 15.) Onego wabed thuolo yie weyo ne ji richogi.—Efe. 4:32; Kol. 3:13.
16. Tiend kwayo mondo kik terwa kar tem kendo oreswa kuom ng’a marachno en ang’o?
16 ‘Kendo kik iterwa kar tem, to ireswa kuom ng’a marachno.’ (Math. 6:13) Ere kaka wanyalo ng’eyo tiend kwayo ariyo machalre mayudore e lamo mar ranyisi ma Yesu nochiwo? Nitie gimoro maber ka wang’eyo: Jehova ok tem ng’ato mondo otim richo. (Som Jakobo 1:13.) Satan—‘ng’a marachno’—e ‘Jatem’ madier. (Math. 4:3) Kata kamano, nitie gik moko ma Muma wuoyo kuomgi ka gima Nyasaye ema otimogi, to kuom adier, gin mana gik moweyo aweya mondo otimre. (Ruth 1:20, 21; Ekl. 11:5) Kuom mano, wacho ni “kik iterwa kar tem” en kwayo mondo Jehova kik wewa mondo watim gima nyalo miyo waketh chikene sama wan e bwo tem. Mogik, wacho ni ‘ireswa kuom ng’a marachno’ en kwayo mondo Jehova kik owe Satan mondo olowa. Kendo wanyalo bedo gadier ni ‘Nyasaye ok noyie mondo otemwa moloyo tekrewa.’—Som 1 Jo Korintho 10:13.
‘Kwauru, Dwaruru, Dwong’uru’
17, 18. Tiend dhi nyime ‘kwayo, dwaro, kendo dwong’o’ en ang’o?
17 Jaote Paulo nojiwo Jokristo wetene niya: “Ketreuru kuom lamo.” (Rumi 12:12) Yesu bende nochiwo puonj moro maduong’ kuom wachni, kane owacho kama: “Kwauru, eka nomiu; dwaruru, eka ununwang’; dwong’uru, eka noyawnu. Nikech ng’ato ka ng’ato ma kwayo, yudo; kendo ng’at ma dwong’o, iyawone.” (Math. 7:7, 8) En gima kare dhi nyime ‘kwayo’ gimoro amora mowinjore gi dwaro mar Nyasaye. Kaluwore kod weche Yesu, jaote Johana nondiko kama: “Ma eri e chir ma wan go kuome, ni kwakwayo gimoro kaka dwaro mare obet, to owinjowa.”—1 Joh. 5:14.
18 Tiend puonj ma Yesu nochiwo kowacho ni dhiuru nyime ‘kwayo,’ en ni onego walem gi kinda maok wawe. Dwarore bende ni wadhi nyime ‘dwong’o’ mondo omi wadonj e Pinyruoth kendo wayud gweth, ber, koda pok mobiro kelo. Kata kamano, be wanyalo bedo gadier ni Nyasaye biro dwoko lamo magwa? Ee, wanyalo bedo gadier ka wamakore chuth gi Jehova, nimar Kristo nowacho kama: “Ng’ato ka ng’ato ma kwayo, yudo; kendo ng’at ma dwong’o, iyawone.” Thoth gik mosetimore e ngima jotich Jehova osenyiso gadier ni Nyasaye e ‘Jawinj kwayo mar ji.”—Zab. 65:2.
19, 20. Kaluwore gi weche Yesu e Mathayo 7:9-11, Jehova en kaka wuoro ma jahera e yo mane?
19 Yesu nonyiso ni Nyasaye en kaka wuoro ma jahera machiwo gik mabeyo ne nyithinde. Par ane kane dibed ni in achiel kuom jowinjo ma ne winjo Twak mar Got, kendo winjo Yesu kawacho kama: “Ere ng’ato kuomu ma ka wuode okwaye kuon, to enomiye kidi? Kata kokwaye rech to enomiye thuol? Ka un jo maricho ung’eyo miyo nyithindu mich mabeyo, Wuonu me polo ok nochiw gik mabeyo moloyo ni jo ma kwaye koso?”—Math. 7:9-11.
20 Kata obedo ni inyalo wach ni wuoro ma en dhano en ‘jaricho’ nikech ne onyuole e richo, pile ginyiso nyithindgi hera. Ok ginyal wuondo nyithindgi, to kar mano gibiro temo matek mondo gichiwnegi “mich mabeyo.” Konyiso hera kaka mar Wuoro, Wuonwa me polo chiwonwa “mich mabeyo,” machalo kaka roho mare maler. (Luka 11:13) Rohono nyalo tegowa e timo tich ma Jehova oyiego, nimar en Jachiwo mar “mich mabeyo duto, gi chiwo malong’o duto.”—Jak. 1:17.
Dhi Nyime Yudo Konyruok Kokalo Kuom Weche Yesu
21, 22. Ang’o manenre ahinya e Twak mar Got, to in ineno nade weche Yesu?
21 Kuom adier, Twak mar Got e twak maberie moloyo duto mosegol e piny. Twagno ong’ere maber nikech puonj moting’o e wi Nyasaye, koda kaka weche manie iye winjore maler. Mana kaka osenyis kaluwore gi gigo mwasepuonjore e sulani gi mamoko motelo, wanyalo konyore ahinya ka watiyo gi puonj manie twagno. Wechegi, ma gin weche Yesu, nyalo miyo wabed gi ngima maber gie sani, kendo miyowa geno mar bedo gi mor e kinde mabiro.
22 E sula mwasepuonjregi, wasenono mana puonj manok e Twak ma Yesu nogolo e Got. Omiyo, ok kawwa gi wuoro ni jogo ma nowinjo twagno “nowuoro ngang’ kuom puonjne.” (Math. 7:28) Kuom adier, mano e kaka wabende wabiro bedo ka wapong’o pachwa koda chunywa gi weche mabeyogi, ma gin weche ma ne owach gi Japuonj Maduong’, Yesu Kristo.
Inyalo Chiwo Dwoko Mage?
• Yesu nowacho ang’o kuom wach lamo mag wuondruok?
• Ang’o momiyo ok onego obed ni wanwoyo anwoya weche mag lamowa?
• Lamo mar ranyisi ma Yesu nochiwo oting’o kwayo mage?
• Ere kaka wanyalo dhi nyime ‘kwayo, dwaro, kendo dwong’o’?
[Penjo mag Puonjruok]
[Picha manie ite mar 15]
Be ing’eyo gimomiyo owinjore lamo mondo wayud chiembwa mar odiechieng’ kodiechieng’?