Migawo mar Mariam e Chopo Dwaro mar Nyasaye

KINDE moro ka Yesu lendo, dhako moro ne oting’o dwonde e kind oganda ma ne opong’ gi koko, kowacho kama: ‘Ich ma ne oting’i nigi gweth, koda thunde ma nidhodho!’ Dine bed ni Yesu dwaro ni min mare omi duong’, mano dine obedo thuolo maber ahinya mar timo kamano. Kar mano, ne odwoko kama: ‘Ee, to ber moloyo wacho niya, gin jo mogwedhi ma winjo wach Nyasaye, kendo mako.’—Luka 11:⁠27, 28.

Yesu ne ok omiyo min mare duong’ moro makende; to bende ne ok onyiso jolupne mondo otim kamano. Be mae owinjore gi duong’ ma thoth ji miyo Mariam? We wanon ane gigo ma Muma wacho kuom weche moko ma ji thoro puonjo e wi Mariam min Yesu.

“Ipong’ gi Nema,” ‘In Ng’a Mogwedhi e Kind Mon’

Malaika Gabriel ne olando ne Mariam wach migawo ma ne odhi bedogo e chopo dwaro mar Nyasaye. E kindeno, nomose kowacho kama: “Misawa, in ng’a motimni ng’wono, Ruoth obet kodi.” (Luka 1:⁠28) Mosno bende inyalo lok kama: ‘Amosi, in mipong’ gi nema, Ruoth nikodi.’ Mapiyo bang’ mano, Elisabeth ne omoso Mariam kowacho kama: “In ng’a moguedhi e kind mon, kendo nyathi mibiro nywolo bende en ng’a moguedhi.” (Luka 1:⁠42) Be wechegi nyiso ni nitie duong’ moro ma onego omi Mariam?

Kuom adier, ok en kamano. Kata obedo ni Jo-Katholik tiyo gi wechegi e lamo ma gikwayogo Mariam, Muma ok nyis ni onego walame. Gabriel kod Elisabeth ne ong’eyo ni Mariam ne nigi migawo makende mar nyuolo Mesia, to kata kamano wach mar lamo Mariam ok en gima Ndiko oyiego. Mopogore gi mano, kane jopuonjre Yesu okwaye mondo opuonjgi lemo, ne onyiso ni lamo onego odhi ne Wuon mare. Kuom adier, lamo mong’ere ahinya ma Yesu nochiwo kaka ranyisi, chako gi wechegi: ‘Wuonwa manie polo.’—Mathayo 6:9.

En Achiel Kuom Joloch

Wach machielo monya, mipuonjo e wi Mariam en ni, sani en “Ruoth ma dhako e polo.” Muma ok miye nying’ telo kata duong’ ma kamano. Kata kamano, Muma nyiso ni Mariam nigi migawo makende e chenro mar Nyasaye me polo. Migawono en mane?

Yesu nonyiso ni moko kuom jopuonjrene mochung’ motegno ne dhi locho kode e Pinyruodhe. (Luka 22:⁠28-​30) Yesu biro miyo jo moseyiergo, teko mar bedo ‘jodolo matiyo ne Nyasachwa, kendo ginibed gi loch e wi piny.’ (Fweny 5:⁠10) Muma konyowa neno maler ni Mariam en achiel kuom jogo mosemi migawo makendeni. Ere kaka wanyalo wacho kamano?

Ber ng’eyo ni bang’ tho Yesu, Mariam ‘noketo chunye e lamo,’ kotimo kamano kanyachiel gi jopuonjre koda omine Yesu. Ji madirom 120 ne ochokore mar timo kamano, moriwo nyaka “mon moko.” (Tich Joote 1:⁠12-​15) Muma wacho ni kane “Pentekost osechopo, giduto ne gin kanyachiel” sama ne ool roho maler mar Nyasaye kuomgi, mi ne giyudo nyalo mar wacho dhok mopogore opogore.—Tich Joote 2:⁠1-4.

Bedoni Mariam ne en achiel kuom jogo ma ne ogwedhi e yorni, nyiso ni ne oyiere kaachiel gi mon mamoko ma ne oyudo roho maler, mondo gibed jokanyo mag Pinyruodh Yesu e polo. Omiyo, nitie gimomiyo wanyalo bedo gadier ni Mariam osemi duong’ kendo koro obet gi Yesu e polo. (Jo Rumi 8:⁠14-​17) Par  ane moko kuom migepe ma Mariam kod jomamoko malocho gi Yesu, biro bedogo e chopo dwaro mar Nyasaye.

Chiwo Gweth Mabeyo Miwuoro

Bug Fweny ei Muma wacho ni ibiro chier ji 144,000, mondo giyud duong’ e polo ka gitiyo kanyachiel gi Yesu kaka jodolo, jong’ad bura, kendo ruodhi. (Fweny 14:⁠1, 4; 20:⁠4, 6) Kaka jodolo, gibiro tiyo e konyo mondo misango Yesu omi dhano duto mawinjo chik obed kare chuth, e winjruokgi gi Nyasaye, e timbegi, koda e ringruok. (Fweny 21:⁠1-4) To mano kaka nobed thuolo makende ne jogo duto malamo Jehova gadier, sama gidak e kinde ma jaberno! *

Mariam ne ochopo migawone, kendo pod odhi nyime timo migawone e chopo dwaro mag Jehova. Nikech kido ma nonyiso kaka bolruok, yie, winjo wach, koda nano e bwo tembe, kaachiel gi chiwruokne e tijene kaka miyo, Mariam en ranyisi maber monego waluw. Migawo ma ne ochopo mar nyuolo Mesia, kendo bedo ni en achiel kuom jogo makonyo e chiwo gweth manyaka chieng’ ne dhano, nyiso ni owinjore wamiye luor ahinya.

Kata kamano, gima duong’ ma wapuonjore kuom Mariam en ni, en kaachiel gi jotich Nyasaye mamoko duto mochung’ motegno, gilamo Jehova to ok nyasaye moro machielo. Mariam kaachiel gi jomoko mabiro locho gi Kristo e polo, kok gi dwol maduong’ kama: “Pak gi luor, gi duong’ kod loch, obed ni [Jehova Nyasaye] Jal mobet e kom duong’no, kendo obed ni [Yesu Kristo] Nyarombo, nyaka chieng’.”—Fweny 5:⁠13; 19:10.

[Weche moler piny]

[Weche manie ite mar 4]

Kido ma Mariam nonyiso kaka bolruok, yie, winjo wach, gin ranyisi monego waluw