Wach Jehova Ngima

Puonj Mayudore e Bug Fweny—II

EN ANG’O machiegni timore ne jogo malamo Jehova Nyasaye koda jogo maok lame? Ang’o mabiro timore ne Satan kod jochiendene? Gin gweth mage ma dhano makare biro nwang’o e kinde Loch Kristo mar Higini Gana Achiel? Dwoko mag penjogi gi mamoko madwarore wang’e, yudore e Fweny 13:1–​22:21. * Sulagi oting’o fweny 9 mogik kuom fweny 16 ma ne omi jaote Johana, chiegni e giko higini mag 90 E Ndalowa.

Johana ne ondiko kama: “En ng’at moguedhi ma somo weche mokorgi, kod jo ma chiko itgi kisomonigi, kendo mako wechegi mondiki.” (Fwe. 1:3; 22:7) Somo kendo tiyo gi gik ma wapuonjore e bug Fweny, nyalo mulo chunywa, tego yie ma wan-go kuom Nyasaye koda Wuode, Yesu Kristo, kendo miyo wabed gi geno maliw kuom kinde mabiro. *—Hib. 4:⁠12.

TEWINI ABIRIYO MAG MIRIMB NYASAYE IOLO

(Fwe. 13:1–​16:21)

Fweny 11:18 wacho ni, ‘mirima nomako ogendini, to mirimb Nyasaye nochopo, kod ndalo mikethoe joma ketho piny.’ E nyiso gima omiyo mirimb Nyasaye nobiro, fweny mar aboro nyiso gik ma ‘ondiek moro ma nigi tunge apar kod wiye abiriyo’ timo.—Fwe. 13:1.

E fweny mar ochiko, Johana neno “Nyarombo mochung’ e got Sayun” to ne en gi ji “gana piero apar achieI gi gana piero ang’wen gang’wen.” ‘Osewargi e kind ji duto.’ (Fwe. 14:⁠1, 4) Lendo mag malaike luwo fwenyni. E fweny maluwo, Johana neno ‘malaike abiriyo moting’o masiche abiriyo.’ Nenore maler ni Jehova owuon ema chiko malaikegi mondo ool “tewini abiriyo mag mirimb Nyasaye” kuonde mopogore opogore e piny ma Satan oteloeni. Tewinigo oting’o siem koda buche ma Nyasaye biro ng’ado. (Fwe. 15:1; 16:1) Fweny ariyogi lero matut wach buche mamoko mag Pinyruoth, motudore gi goyo tung’ mar abiriyo koda malit mar adek.—Fwe. 11:⁠14, 15.

Dwoko Penjo mag Ndiko:

13:8—“Kitap ngima mar Nyarombo” en ang’o? Mani en kitap ranyisi moting’o mana nyinge jogo mabiro locho gi Yesu Kristo e Pinyruodhe me polo. Kitabuno bende oting’o nyinge Jokristo mowal kuom roho mapod nie piny, to nigi geno mar yudo ngima e polo.

13:⁠11-​13—Ere kaka ondiek ma nigi tunge ariyo timore kaka thuol kendo omiyo mach lor koa e polo? Bedo ni ondiek ma nigi tunge ariyo, mochung’ne Riwruok mar Loch Ingresa gi Amerka wuoyo kaka thuol, nyiso ni otiyo gi achune koda gero e miyo ji oyie bedo e bwo lochne. Omiyo mach lor koa e polo, ma tiende ni owuondore ni en janabi madier kowacho ni oseloyo richo me piny kuom lwenje ariyo madongo ma ne otimore e piny, e higini mag 1900, kendo ni oseloyo loch mar jo Komunist.

16:17—“Kor polo” ma ioloe tawo mar abiriyo ochung’ne ang’o? “Kor polo” ochung’ne paro machalo mag Satan, “chuny [paro] ma tiyo koro kuom jogo ma dagi.”  Chenro duto mag piny marach ma Satan oteloeni, ywayo muya machalo sum manie kor polo kama ioloe tawo mar abiriyo.—Efe. 2:2.

Puonj Mwayudo:

13:⁠1-4, 18. “Ondiek” mochung’ne sirkande mag dhano a “e nam,” tiende ni, kuom oganda dhano ma nigi tungini. (Isa. 17:⁠12, 13; Dan. 7:⁠2-8, 17) Ondiegni, ma ne ochak kendo omi teko gi Satan, nigi namba 666, manyiso ahinya kaka orem chuth. Ng’eyo gima ondiegni ochung’ne konyowa mondo kik waluwe ka wagene kata lame kaka dhano manie bwo teko mar pinyni timo.—Joh. 12:31; 15:19.

13:⁠16, 17. Kata obedo ni wanyalo romo gi chandruoge e ngimawa mapile, kaka e yore mag ‘ng’iepo kata loko,’ kik wawe mondo ondiegni ochikwa kendo oketwa e bwo tekone. Yie bedo gi ‘kido e luetewa ma korachwich, kata e lela wang’wa’ biro nyiso ni wayie mondo ondiegno ochik timbewa koda parowa.

14:⁠6, 7. Wach ma malaika lando puonjowa ni, onego waland mapiyo wach maber mar Pinyruodh Nyasaye mosechungi. Onego wakony jopuonjrewa mag Muma mondo gibed gi luor mowinjore ne Nyasaye kendo mondo gimi Jehova duong’.

14:⁠14-​20. Seche ma ‘keyo mar piny,’ tiende ni, keyo mar jogo ma ibiro resi ochopo e gikone, mano biro bedo sa mar malaika olo gik mochoki kuom “mizabibu mag piny,” “e rabi maduong’ mar mirimb Nyasaye.” Mzabibuno, tiende ni, sirkande maricho mag Satan malocho e wi dhano, kaachiel gi ‘olembene’ maricho, bang’e ibiro kethi nyaka chieng’. Onego watem matek mondo kik wabed e bwo teko mar mzabibu mar piny.

16:⁠13-​16. ‘Chuny mochido’ ochung’ne wuond mag jochiende ma gitiyogo mondo gine ni ruodhi mag piny ok lok pachgi kata bang’ ka oseol tewini abiriyo mag mirimb Nyasaye, to kar mano, iwuondogi mondo gikwed Jehova.—Math. 24:⁠42, 44.

16:21. Kaka giko mar pinyni medo sudo machiegni, nyalo bedo ni lendo mag buche ma Jehova biro ng’ado ne piny ma Satan oteloeni, biro ting’o weche mapek minyalo por gi pe. Kata kamano, dhano mathoth podi biro dhi nyime timo gik manyiso ni gichayo Nyasaye.

RUOTH MOSELOCHO KORO BEDO JALOCH

(Fwe. 17:1–​22:21)

‘Babulon Maduong’,’ ma en nying’ mochung’ne dinde duto mag mirimambo, en achiel kuom riwruoge mochido manie piny ma Satan oteloeni. Fweny mar 11 nyiso wach “jaterruok maduong’,” ma en ranyisi mar dhako ma timbene ochido, “moidho ondiek.” “Tunge apar” mag ondiek biro kethe chuth. (Fwe. 17:⁠1, 3, 5, 16) Jaterruokni iporo gi “dala maduong’,” kendo e fweny maluwo ilando wach podhone, ka ijiwo oganda Nyasaye mondo ‘oa kuome.’ Ji mang’eny yuago podho mar dala maduong’no. Kata kamano, nitie mor e polo, nikech “kend mar Nyarombo.” (Fwe. 18:⁠4, 9, 10, 15-​19; 19:7) E fweny mar 13, jal moidho “ambuor marachar” dhi kedo e lweny gi ogendini. Okelo piny ma Satan oteloeni e gikone.—Fwe. 19:⁠11-​16.

To nade ‘thuol machonno, miluongo ni Jachien kendo Satan’? En karang’o mibiro wite “e ataro mar ligek mach”? Mano en achiel kuom weche miwuoyoe e fweny mar 14. (Fwe. 20:⁠2, 10) Fweny ariyo mogik, nyisowa kaka ngima biro bedo e kinde mar Higini Gana Achielgo. Ka “fweny” chomo e gikone, Johana neno ‘aora mar pi mar ngima maluwo e dier yo,’ kendo igwelo gi mor ng’at ang’ata man gi “riyo.”—Fwe. 1:1; 22:⁠1, 2, 17.

Dwoko Penjo mag Ndiko:

17:16; 18:⁠9, 10—Ang’o momiyo “ruodhi mag piny” yuago riwruok ma gin giwegi ema giketho? Gimomiyo giyuak en mana nikech gilalo gik ma ne giyudo kuome. Bang’ ka oseketh Babulon Maduong’, ruodhi mag  piny fwenyo ni kare ne okonyogi ahinya. Babulon Maduong’ ema ne miyo gik maricho ma ne gitimo e nying din onenre makare. Ne okonyogi bende e choko rowere mondo odhi e lweny. E wi mano, ne okonyo kama duong’ ka omiyo ji bolore e bwo lochgi.

19:12—Ere kaka onge ng’ato mak mana Yesu, mong’eyo nyinge owuon maok ohul e ndikono? Nying’ni nenore ni ochung’ ne migepe makende, kaka mago miwuoyoe e Isaiah 9:⁠6, ma Yesu biro timo e odiechieng’no mar Ruoth. Onge ng’at mong’eyo nying’no, mak mana en owuon nikech migepene gin makende, kendo en kende ema onyalo ng’eyo tiend bedo gi migepe madongo kaka mago. Kata kamano, Yesu miyo jokanyo mag kweth mar miaha mare moko kuom migepe ma en-go, kendo kuom timo kamano, ‘ondiko kuomgi nyinge manyienno.’—Fwe. 3:⁠12.

19:14—Ng’a gini mabiro idho ambuoche kaachiel gi Yesu e Har–​Magedon? Malaike nobed achiel kuom “ogend lweny me polo” mariwo Yesu lwedo e lweny mar Nyasaye, kaachiel gi Jokristo mowal ma oselocho mi oyudo mich margi mar polo.—Math. 25:⁠31, 32; Fwe. 2:⁠26, 27.

20:⁠11-​15—Ng’a gini ma ondik nyingegi e “kitap ngima”? Mani en kitabu moting’o nyinge mag jogo duto mabiro yudo ngima ma nyaka chieng’—ma gin Jokristo mowal, koda jokanyo mag oganda mang’ongo, kaachiel gi jotich Nyasaye ma ne ochung’ motegno, to biro yudo “chier mar jo makare.” (Tich 24:15; Fwe. 2:⁠10; 7:9) Jogo mibiro chier e ‘chier mar joma ok kare,’ nyingegi ibiro ndiki e “kitap ngima” mana ka gitimo kaluwore gi chike “mondiki e kitepego” mibiro el e kinde mag Higini Gana Achielgo. Kata kamano, nyingego ok ndiki gi wino maok nyal ruchi. Nyinge Jokristo mowal kuom roho bedo mosiko mana ka gichung’ motegno nyaka e tho. (Fwe. 3:5) Nyinge jogo mayudo ngima e piny siko e kitabuno mana ka gisekalo tem mogik e giko higini gana achielgo.—Fwe. 20:⁠7, 8.

Puonj Mwayudo:

17:⁠3, 5, 7, 16. “Rieko moa e polo malo” konyowa ng’eyo tiend “wach [“mopondo,” NW ] mar dhakono kod ondiek moidho.” (Jak. 3:⁠17) Ondiek mar ranyisini ne ochakore kaka Riwruok Matudo Pinje (League of Nations) kae to bang’e ne ochiere kaka Riwruok mar Pinje (United Nations). Donge ng’eyo tiend wachni onego ojiwwa bedo gi kinda e lando wach maber mar Pinyruodh Nyasaye kendo lando odiechieng’ bura mar Jehova?

21:⁠1-6. Wanyalo bedo gadier chuth ni gweth mokor mabiro bedoe e bwo loch mar Pinyruoth, biro timore adier. Nikech ang’o? Nikech iwuoyo kuom gwethgo kama: ‘Gisechopo!’

22:⁠1, 17. “Aora mar pi mar ngima” ochung’ne chenro ma Jehova osetimo mar chango dhano mawinjo wach, kuom richo kod tho. Pigni yudore e okang’ moro kata mana gie sani. Kik wanyis mana ni wadwoko erokamano kuom gwel momiwa mar yudo “pi mar ngima nono,” to bende dwarore wagwel jomoko mondo otim kamano!

[Weche moler piny]

[Picha manie ite mar 25]

Mano kaka gin gweth mabeyo ma dhano ma winjo Nyasaye biro nwang’o e bwo Pinyruoth!