“Chieng’ Thona ne Pok Ochopo”

Jal moro ne oyudo aksident kane oriembo lori maduong’ mar choko yugi. Lorino nowuok e ndara, mi ogweyo dichwo gi dhako moro koda jal moro ma jahigini 23 kane giwuotho e bath ndara. Kaluwore gi ripot mar gaset mar New York City, dichwo gi dhakono ne otho gi kanyono, to rawerano ne ogwe, mi pache ne olal. Kane pache oduogone mi oneno gima ne oa timore, gima nobiro e pache mokwongo ne en ni: ‘Ok anyal yie ni gima kama timore. Akwayi, Nyasaye, konya mondo akwo.’ Bang’e ne owacho ni, “Chieng’ thona ne pok ochopo.”

NYALO bedo ni isewinjo weche madwaro chalo kaka mago. Seche ma ng’ato otony e masira moro, ji hinyo wacho ni, ‘Chieng’ thone pok ochopo,’ to ka ng’ato otho e masira malich ahinya, giwacho ni, ‘Chieng’ thone osechopo’ kata ni ‘Mano en dwaro mar Nyasaye.’ Kata bed ni giwacho ni tho mar ng’ato ne otimore nikech ne ong’adne chon, kata ni en hawi marach, kata ni ne osechanne, kata ni en dwaro mar Nyasaye, pile gimomiyo giwacho kamano en nikech gimoro achiel. Ji mang’eny neno ni gik matimore e ngimagi nosechan negi, kendo ni ok ginyal loko gima osechanno. Kendo paro ma kamano ok bedie mana sama tho kata aksident moro otimore; to bende ok en paro ma ne ochakore e ndalogi.

Kuom ranyisi, Jo-Babulon machon noneno ni ngima dhano ne ichiko gi sulwe koda kaka sulwego chanore malo. Kuom mano, ne ging’iyo polo malo mondo gine ranyisi manyalo konyogi ng’eyo ndalo mabiro. Jo-Grik koda Jo-Rumi ne lamo nyasaye madhako mar hawi, ma ne nigi teko mar miyo ng’ato hawi maber kata marach, kendo seche moko ne nenore ni ne en gi teko mohingo kata mana mag Zeu kod Jupiter ma ne gin nyiseche maggi madongo.

E Asia, Jo-Hindu koda Jo-Budha puonjo ni gima ng’ato kadhoe e ngimane sani en nikech gik ma notimo e ngimane mokalo, kendo gik ma otimo e ngimane sani biro chiko kaka ngimane bang’ kosetho nobed. Dinde mamoko—moriwo nyaka kanise mag jogo maluongore ni Jokristo, bende puonjo ni gik matimore ne ji gin gik ma noseng’adnegi chon.

Kuom mano, ok kawwa gi wuoro ni kata mana e kindewagi ma gin kinde ma ji osomo ahinya kendo ma ji ok yie ayiea kuom gik ma giwinjo, podi ji mang’eny oyie ni chal mar ngimagi, gik matimore e ngimagi odiechieng’ kodiechieng’, koda giko mar ngimagi en gima nosechan kendo ok ginyal loko. Be in bende ineno ngima e yo machalo kamano? Be gik matimore e ngima, gik madhi maber koda maok dhi maber—kata mana nyuol koda tho—gin gik ma kuom adier nosechan chon? Be paro mar ni weche duto nosechan chon ema chiko ngimani? Weuru wane ane kaka Muma nyalo konyowa dwoko penjogo.

[Picha En mar e ite mar 3]

Ken Murray/New York Daily News