Magi e Kinde mag Timo Yiero

“Nyasaye nochweyo dhano gi kite owuon, nochweye e kido machalo kode; nochweyogi dichwo gi dhako.”—Chakruok 1:⁠27.

WECHEGO, ma gin weche mong’ere manie ite motelo mag Muma, nyiso achiel kuom tije madongo ahinya ma Nyasaye notimo “gi bergi maler e ndalogi”—tiende ni chweyo dichwo gi dhako makare chuth, Adam gi Hawa. (Eklesiastes 3:⁠11) Kaka Jachwechgi, Jehova Nyasaye nowachonegi kama: “Nyuoluru, kendo medreuru, upong’ piny, kendo ubedi gi loch kuome; kendo mondo ubedi gi teko kuom rech ma ni e nam, kendo kuom winy mahuyo e kor polo, kendo kuom gik mangima duto mawuotho e piny.”—Chakruok 1:⁠28.

Kuom wacho ne dhano ariyo mokwongogo kamano, Nyasaye nonyiso ayanga dwaro ma ne en-go kuomgi. Ne onego gimedre kendo girit piny, ka gitime bedo dala mar paradis mokwako piny ngima, ne gin koda kothgi. Onge kinde ma ne oseng’adnegi mar bedo mangima kata mar tho. Kar mano, Nyasaye nosingonegi gimoro maber ahinya. Kane ginyalo timo yiero makare kendo siko ka girito winjruokgi gi Nyasaye, ne gidhi dak gi kuwe koda mor nyaka chieng’.

 Ne gitimo yiero marach, kendo mano osemiyo ji duto ti kendo tho. Kuom adier, Ayub jaduong’ machon nowacho ayanga niya: “Dhano ma dhako onyuolo ndalone nok, kendo ochandore pile.” (Ayub 14:1) Ang’o ma ne odhi marach?

Muma lero ni: “Richo nobiro e piny kuom ng’at achiel, kendo tho nobiro e piny kuom richo, kamano bende tho nobiro ni ji duto, nikech ji duto ne otimo richo.” (Jo Rumi 5:⁠12) Onge kiawa ni, ‘ng’at achielno’ ne en Adam, ma ema noyiero mar ketho goyiem chik mayot ma Nyasaye nomiyogi. (Chakruok 2:⁠17) Nikech yiero ma notimono, Adam noketho thuolo ma ne odhi bedogo mar dak nyaka chieng’ e paradis e piny. Noketho bende ne kothe thuolo mar yudo gikeni majaber, mi okelonegi mana richo kod tho. Bang’ mano, ne nenore ka gima geno duto nolal nono.

Kinde mar Chweyo Gik Moko Manyien

Higini mang’eny bang’e, jandik-zaburi nondiko kotelne gi roho mar Nyasaye kama: “Jo matir ginicham piny, mi ginidagie nyaka chieng’.” (Zaburi 37:29) Konyiso kaka singruokne mar Eden biro chopo gadier, Wach Nyasaye lero maber gima obiro timo machiegni kama: “Nyasaye noywe pi wang’ duto e wengegi; tho ok nobedie kendo, kata ywak, kata nduru, kata rem ok nobedie, nikech gik machon osekadho.” Kae to Nyasaye owuon wacho ni: “Neuru! Achueyo gik moko duto obed manyien.”—Fweny 21:⁠4, 5.

Bedo ni gik moko duto nigi ndalogi, penjo ma wachni nyuolo en niya, Kinde mar chweyo gik moko manyienno nobed karang’o, mondo eka singo mabeyo ahinya mag Nyasaye obi ochopi gadier? Jogo gasedni ma gin Joneno mag Jehova, osebedo ka temo ahinya lando ne ji ni wadak e ndalo ma Muma luongo ni “ndalo mag giko,” kendo ni kinde ma Nyasaye biro kawoe okang’ mar ‘chweyo gik moko duto obed manyien’ chiegni. (2 Timotheo 3:1) Wajiwi ni mondo inon Muma kendo ipuonjri kuom gweth mabeyo ma in bende inyalo yudo. Bende wajiwi ni mondo irwak gwel ma igweligo niya: “Dwaruru Jehova ka podi kinde nitie minyalo yudego, luong nyinge ka pod ochiegini.” (Isaiah 55:6) Kar pong’o ngimani gi paro mar ni osechan kaka gik moko biro bedo e ngimani, ng’e ni ngimani koda geno mari kuom kinde mabiro ni mana e lweti iwuon!

[Weche manie ite mar 8]

“Neuru! Achueyo gik moko duto obed manyien”