Timni Makare Miyo Chuny Jehova Mor

“Wuoda, bedi mariek, kendo mi chunya mor; mondo aduok wach ni jalo makwera.”—NGE. 27:11.

1, 2. (a) Bug Ayub nyiso ni Satan noketo kiawa mane? (b) Ang’o manyiso ni Satan podi ne dhi nyime kwedo Jehova kata bang’ kinde Ayub?

JEHOVA ne oyie ne Satan mondo otem Ayub, jal ma ne en jatich Nyasaye mochung’ motegno. Nikech mano, Ayub ne olalo jamni mage, nyithinde, kendo nobedo matuwo. Kata kamano, kane Satan oketo kiawa e wi Ayub nikech timne makare, ne en gi weche moko e paro ok mana Ayub kende. Satan nowacho kama: ‘Del kar del, ero, gik moko duto ma dhano nigo nochiw nikech ngimane.’ Wach ma Satan nowachoni, ne ok omulo mana Ayub kende, to noriwo koda jomoko, kendo wachno osebedo ka dhi nyime higini mang’eny bang’ tho mar Ayub.—Ayub 2:4.

² Chiegni higini 600 bang’ tembe ma ne Ayub oyudo, Nyasaye nokudho ne Suleman muche mondo ondik kama: “Wuoda, bedi mariek, kendo mi chunya mor; mondo aduok wach ni jalo makwera.” (Nge. 27:11) Nenore maler ni, kata e kinde ma ne indiko wechego, Satan podi ne kwero Jehova. E wi mano, e fweny ma ne omi jaote Johana, ne oneno Satan ka kwedo jotich Nyasaye bang’ wite a e polo, kane osechungi Pinyruodh Nyasaye e higa 1914. Ee, kata mana e kindegi, ma gin ndalo mag giko mar piny marachni, Satan podi keto kiawa kuom tim makare mar jotich Nyasaye!—Fwe. 12:10.

3. Gin puonj mage madongo ma wanyalo puonjre e bug Ayub?

³ Kuom mano, we wane ane puonj adek madongo ma wapuonjore e bug Ayub. Mokwongo, tembe mag Ayub konyowa ng’eyo jasigu madier mar dhano, kendo ng’eyo kama akwede ma jotich Nyasaye yudo wuokie. Satan Jachien e jasiguno. Mar ariyo, kata warom gi tembe machalo nade, bedo gi winjruok machiegni gi Nyasaye biro konyowa rito tim makare. Mar adek, seche ma wayudo tembe ma temowa e yo moro amora, Nyasaye biro konyowa nano mana kaka nokonyo Ayub. E kindegi, Jehova timo kamano kokalo kuom Wachne, riwruok mar oganda mare, koda roho mare maler.

Siki King’eyo Jasigu Madier

4. Ng’ano mamiyo gik maricho timore e piny?

⁴ Ji mang’eny ok ong’eyo ni Satan nitie. Kuom mano, kata obedo ni gik matimore e piny chando chunygi, ok ging’eyo ni Satan Jachien e ng’at mamiyo gik maricho timore. En adier ni, chandruok mang’eny mayudo dhano en nikech gin giwegi. Jonyuolwa mokwongo, Adam kod Hawa, noyiero mondo kik otagi gi  Jachwech. To chakre kindeno, tieng’ ka tieng’ mosebedoe ok osenyiso rieko e yoregi. Kata kamano, Jachien ema nowuondo Hawa e ng’anjo ne Nyasaye. En ema oseloso chenro mar piny manie bwo tekone, ne dhano morem. Nikech Satan e “nyasach pinyni,” oganda dhano nyiso kido machalo kaka mage: ng’ayi, piem, nyiego, guondo, miriambo, koda tim ng’anjo. (2 Kor. 4:4; 1 Tim. 2:⁠14; 3:6; som Jakobo 3:⁠14, 15.) Kido kaka mago osekelo lweny mag siasa koda mag din, sigu, timbe mag mibadhi, kod koko, magin gik makelo chandruok mang’eny ne dhano.

5. En ang’o mwadwaro timo gi ng’eyo maber ma wan-go?

⁵ Mano kaka wan jotich Jehova wan gi ng’eyo maber ahinya! Ee, wang’eyo ni en ng’ano mosemiyo piny okethore. Kuom mano, donge ng’eyo mano miyo chunywa bedo gi gombo mar dhi konyo ji ng’eyo ni jasigu madier en ng’a? To bende, donge wamor bedo korka Jehova, Nyasaye madier, kendo lero ne jomoko kaka obiro tieko Satan koda chandruoge mayudo dhano?

6, 7. (a) En ng’ano mamiyo isando jogo malamo Nyasaye gadier? (b) Ere kaka wanyalo luwo ranyisi mar Elihu?

⁶ Satan ok kel mana chandruoge mayudo dhano e piny kende, to bende en ema okelo akwede ma oganda Nyasaye yudo. Satan oramo ni nyaka oketwa e tem. Yesu Kristo nowacho ne jaote Petro kama: “Simon, Simon, Satan nokwayo thuolo, mondo opiedhu kaka ipiedho ngano.” (Luka 22:31) E yo machalo kamano, ng’ato ka ng’ato kuomwa maluwo ndach Yesu biro romo gi tembe e yo moro. Petro nopimo Jachien gi “sibuor ma goyo asumbi, kodwaro ng’a ma dongam.” To Paulo nowacho kama: “Jogo duto ma dwaro doko jo modembore e Kristo Yesu nosandgi.”—1 Pet. 5:8; 2 Tim. 3:⁠12.

⁷ Ere kaka wanyalo nyiso ni wang’eyo jal ma e jasigu madier, sama masira moro oyudo Jakristo wadwa? Kar bedo gi chuny maok dew kuom owadwa moyudo masirano, onego wabed kaka Elihu, ma nowuoyo gi Ayub kaka osiep madier. Wariwo owadwa lwedo e kedo gi jal ma e jasikwa waduto, tiende ni Satan. (Nge. 3:⁠27; 1 Thes. 5:⁠25) Dwarowa en konyo Jakristo wadwa rito timne makare, kata ang’o matimre, mondo omi chuny Jehova mor.

8. Ang’o momiyo Satan ne ok nyal mono Ayub miyo Jehova duong’?

⁸ Mwandu mokwongo ma Satan nomiyo Ayub olalo, ne gin jamni mage. Ne gin jamni ma nengogi duong’, nyalo bedo ni ne gikelone yuto. To bende, Ayub ne tiyo kodgi e weche mag lamo. Bang’ ka Ayub nosepwodho nyithinde, ‘nochiew chon gokinyi timo misengini mowang’ kaka kar rombgi duto obet, nimar Ayub noko niya, “dipo ka yawuota oseketho, mi giyanyo Nyasaye e chunygi.” Kamano e kaka Ayub ne timoga.’ (Ayub 1:⁠4, 5) Kuom mano, Ayub ne jachiwo misango mag le ne Jehova pile. Kane tembe ochakore, koro ne ok onyal timo kamano. Ayub ne onge gi ‘chiwo’ monyalo pakogo Jehova. (Nge. 3:9) Kata kamano, podi ne onyalo pako Jehova, kendo ne otimo kamano gi dhoge!

Bed gi Winjruok Machiegni e Kindi gi Jehova

9. Mwandu maduong’ie moloyo ma wan-go en ang’o?

⁹ Kata bed ni wan jomwandu, jodhier, rowere kata joma dongo, joma nigi midekre kata maongego, wanyalo bedo gi winjruok machiegni e kindwa gi Jehova. Kata kapo ni wayudo tembe machalo nade, bedo gi tudruok machiegni gi Nyasaye biro konyowa rito timwa makare, kendo miyo chuny Jehova obed mamor. Kata mana, joma moko ma ne ok ong’eyo mathoth e wi adiera, podi ne ochung’ motegno kendo ne girito timgi makare.

10, 11. (a) Ere kaka nyaminwa moro ne otimo kane timne makare nie bwo tem? (b) Nyaminwano ne ochiwo dwoko mane maber ahinya ne Satan?

¹⁰ Kaw ane ranyisi mar Nyaminwa Valentina Garnovskaya, ma kaachiel gi Joneno mamoko mang’eny e piny Russia, norito timgi makare kata obedo ni ne giyudo tembe mager, mana  kaka Ayub jal ma ne ochung’ motegno. E higa 1945, kane en jahigini 20, owadwa moro nolendone. Ne odok lime diriyo mondo giwuo e wi Muma, to bang’e ne ok ochako oneno owadwano kendo. Kata kamano, Valentina ne ochako lendo ne joma ne odak e alworane. Nikech timo kamano, ne omake mi otweye higini aboro e kambi moro mar twech. E higa 1953, ne ogonye mi ochako tij lendo achiel kachiel. Kendo ne ochak omake, wang’ni to koro ne omiye twech mar higini apar. Bang’ tieko higini mogwaro e kambi achiel, ne otere e kambi machielo. E kambino, ne nitie nyimine moko ma ne nigi Muma. Chieng’ moro nyaminwa moro ne onyiso Valentina Muma. Yaye, mano kaka nomor ahinya! Par ane ni, Muma ma Valentina ne oyudo osenenoe, ne en mana ma ne nie lwet owadwa ma ne olendone e higa 1945!

¹¹ E higa1967, ne ogony Valentina mi koro ne oyudo thuolo mar nyiso chiwruok mare ne Jehova kuom batiso mar pi. Ne otiyo gi thuolono ma ne oyudo e timo tij lendo gi kinda nyaka 1969. Kata kamano, ne omake e higano, kendo ne omiye twech mar higini adek e jela. Podi, Valentina ne odhi mana nyime gi tij lendo. Kapok ne otho e higa 2001, ne oyudo osekonyo ji 44 ng’eyo adiera. Ne oyudo osedak e jela koda e kembe mag twech mopogore opogore kuom higini 21. Ne oikore mar weyo gik moko duto, moriwo thuolone, mondo orit timne makare. E giko mar ngimane, Valentina nowacho kama: “Pok ne abedoe gi kara awuon mar dak. Mwanduna duto ne nyalo mana romo e sanduk achiel, kata kamano gigo ne oroma kendo ne amor e tiyo ne Jehova.” Mano kaka Valentina ne ochiwo dwoko maber ahinya ne Satan, ma nowacho ni dhano ok bi siko kochung’ motegno e bwo tembe! (Ayub 1:⁠9-11) Wanyalo bedo gadier ni ne omiyo chuny Jehova mor, kendo ni Jehova rito ahinya chieng’ mobiro chieroe Valentina kod joma moko mosetho ma ne ochung’ motegno.—Ayub 14:15.

12. Hera konyo nade e winjruokwa gi Jehova?

¹² Bedowa osiepe Jehova otenore kuom hera ma wan-go kuome. Wamor gi kido mag Nyasaye kendo watimo duto mwanyalo mondo wadag kaluwore gi dwaro mare. Mopogre gi gima Jachien wacho, wanyiso Jehova hera ma wan-go kuome nikech wadwaro, kendo wamor timo kamano. Hera makamano mawuok e chuny jiwowa mondo warit tim makare kata ka wan e bwo tem. To Jehova to biro ‘geng’o richo ne yor joge maler.’—Nge. 2:8; Zab. 97:10.

13. Ere kaka Jehova neno gik ma watimone?

¹³ Hera jiwowa mondo wami nying’ Jehova duong’, kata kapo ni ok wanyal timo mathoth. Oneno chuny makare ma wan-go mar timo dwarone, kendo ok ong’adnwa bura ka ok wanyal timo duto ma chunywa gombo timo. Gima duong’ ok en mana gigo ma watimo, to bende chuny ma watime godo. Kata obedo ni Ayub ne oromo gi masira kendo ne dwarore ni onan ahinya, podi nowuoyo gi joma ne kwede e wi yore mag Jehova ma ne ohero ahinya. (Som Ayub 10:12; 28:28.) E sula mogik mar bug  Ayub, Nyasaye ne onyiso mirima ma ne en-go kuom Elifaz, Bildad, kod Zofar nikech ne ok giwacho adier. E kindeno bende, Jehova ne onyiso ni ne oyie gi Ayub kane oluonge ni “jatichna,” kendo ne ochiko Ayub ni okwa ne jorichogo e lamo. (Ayub 42:⁠7-9) Weuru wabende wabed gi tim kaka mar Ayub mondo Jehova obed mamor kodwa.

Jehova Konyo Jotichne Mochung’ Motegno

14. Ere kaka Jehova nokonyo Ayub neno gik moko e yo makare?

¹⁴ Ayub ne orito timne makare kata obedo ni ne en dhano monyuol e richo. Nitie kinde moko, kane en kama tek ahinya, ne ok oneno gik moko e yo makare. Kuom ranyisi, nowacho ne Jehova kama: “Ayuakni, to ok iduokona wach . . . Gi teko ma lueti nigo e misandago.” E wi mano, Ayub nokawo wach kwedo weche ma ne iwacho kuome kaka gima duong’ ahinya, kane owacho kama: “Ok an ng’at marach,” kendo “ok an ng’ato ma luete kwiny, kendo kwayona ler.” (Ayub 10:7; 16:17; 30:⁠20, 21) Kata kamano, Jehova nokonyo Ayub e yo mang’won kopenjo Ayub penjo moko ma ne omiyo Ayub ogolo pache kuome owuon. Penjogo bende nokonye neno maler ni Nyasaye e ng’at maduong’ ahinya, kendo neno kaka dhano en gima tin ahinya. Ayub norwako kony ma ne omiye, mi ne olokore.—Som Ayub 40:8; 42:⁠2, 6.

15, 16. Jehova chiwo kony ne jotichne kindegi e yore mage?

¹⁵ Jehova bende chiwo kony e yo mang’won ne jotichne e kindegi. E wi mano, wayudo gweth koda ber mang’eny. Kuom ranyisi, Yesu Kristo nochiwo misango kaka rawar, mi mano nobedo chakruok mar yudo ng’wono kuom richo. Kokalo kuom misangono, wanyalo bedo gi winjruok machiegni gi Nyasaye kata obedo ni wan joma onyuol e richo. (Jak. 4:8; 1 Joh. 2:1) Seche ma wayudo tembe, wakwayo Nyasaye e lamo bende mondo omiwa kony koda teko kokalo kuom roho mare maler. E wi mano, wan gi Muma moting’o buge te, kendo ka wasome kendo paro matut kuom gik ma wasomo, mano miyo waikore ne tembe mwayudo nikech yiewa. Puonjruok Muma konyowa ng’eyo wach mar ni, ng’ano mowinjore bedo jaloch e wi gik moko duto, kendo konyowa e rito timwa makare ng’ato ka ng’ato.

¹⁶ E wi mano, wayudo ber mang’eny kuom bedo jakanyo mag riwruok mar owete e piny mangima ma Jehova chiwonegi chiemb chuny kokalo kuom “jatichno mogen, kendo mariek.” (Math. 24:⁠45-​47) Moro ka moro kuom kanyakla machiegni 100,000 mag Joneno mag Jehova, itimoe chokruoge ma puonjowa kendo tiegowa nano e bwo tembe ma wayudo nikech yiewa. Mae nyalo nenore kuom gima ne otimore ne Sheila, Janeno ma rawera modak e piny Jerman ma wachne wabiro nono e paragraf maluwo.

17. Chiw ane ranyisi manyiso ber mar luwo ahinya puonj ma wayudo e riwruok mar oganda Jehova e kindegi.

¹⁷ Odiechieng’ moro ka en e skul, klasgi Sheila ne onge japuonj kuom seche matin kama. Jopuonjre wetene ne okawo thuolono mondo gitem tiyo gi gima iluongo ni Ouija board ma en gima otudore gi timbe juok, ma ji tiyogo e ng’eyo wach kuom kinde mabiro. Gikanyono Sheila ne owuok oko mar klas, kendo gima nowinjo bang’e nomiyo obedo mamor kuom gima notimono. Seche ma ne gitiyo gi Ouija board, jopuonjre moko nowinjo ka nitie jochiende kanyo, mi ne giringo nikech luoro. Kata kamano, en ang’o ma ne okonyo Sheila  mondo oyier wuok e klas mapiyo? Sheila nolero niya: “Matin ka pok wachni otimore, noyudo wasepuonjre e chokruogewa ma watimo e Od Romo, rach mar tiyo gi Ouija board. Omiyo ne ang’eyo gima ne onego atim. Ne adwaro moro Jehova, mana kaka Muma wacho e Ngeche 27:11.” Mano kaka ne en gima ber ni Sheila ne nie chokruok chieng’no kendo ne ochiko ite kuom gima ne ipuonjo!

18. In iwuon iseng’ado mar timo ang’o?

¹⁸ Weuru mondo ng’ato ka ng’ato kuomwa ong’ad mar makore motegno gi puonj koda chike mwayudo koa kuom riwruok mar oganda Nyasaye. Kuom dhi e chokruoge pile ka pile, somo Muma, puonjruok kwatiyo gi buge malero Muma, wuoyo gi Nyasaye e lamo, kod mako osiep gi Jokristo mochung’ motegno, wabiro yudo kony koda jip madwarore. Jehova dwaro ni warit timwa makare, kendo en gadier ni wabiro dhi nyime ka wamakore kode. Mano kaka wan gi thuolo majaber mar pako nying’ Jehova, rito tim makare, kendo miyo chuny Jehova obed mamor!

Be Iparo?

• Gin tembe koda gik mage ma Satan ema kelo?

• Mwandu maduong’ie moloyo ahinya ma wan-go en ang’o?

• En ang’o mamiyo wabedo osiepe Jehova?

• Moko kuom yore ma Jehova konyowago e kindegi gin mage?

[Penjo mag Puonjruok]

[Picha manie ite mar 15]

Wanyalo konyo Jokristo wetewa rito timgi makare