2 Ng’e Nyasaye e Yo Malong’o Chuth

“Mani e ngima mochwere, ni ging’eyi, in Nyasaye makende maradier.”—Johana 17:3.

GIMOMIYO MANO NYALO BEDO MATEK. Jomoko nigi paro maketo kiawa kabe Nyasaye nitie. Moko wacho ni Nyasaye ok en ng’ato, to ni en teko moro maduong’ miwuoro. Kata mana jogo mapuonjo ni Nyasaye en ng’ato mantie adier, pod puonjo gik mopogore ahinya maok winjre malong’o e wi Nyasaye koda kido ma en-go.

ERE KAKA INYALO LOYO PAROGO? Yo achiel mar ng’eyo Nyasaye e yo malong’o chuth, en ng’iyo gik mosechweyo. Jaote Paulo nowacho kama: “Nyaka a chuech piny gik ma ok ne mag Nyasaye, kaka tekone mochwere, gi kite, mineno, kuom gik ma en nochueyo, nenore ratiro.” (Jo Rumi 1:⁠20) Kuom ng’iyo kendo nono mos gik mochwe manie piny, inyalo puonjri gik mathoth kuom rieko koda teko ma Jachwechwa nigodo.—Zaburi 104:24; Isaiah 40:26.

 Kata kamano, mondo wang’e kit Nyasaye e yo malong’o chuth, ng’ato ka ng’ato onego oel Wach Nyasaye ma en Muma, kendo nonogo en owuon. Kik iwe mondo jomoko ema ochik pachi. Kar timo kamano, luw puonj ma Muma chiwo niya: ‘Kik uluw tim pinyni, to lokreuru ka parou doko manyien; eka ununyal ng’eyo gino ma Nyasaye dwaro en gi maber, malong’o, molony.’ (Jo Rumi 12:2) Kuom ranyisi, par ane matut kuom adieragi ma Muma fwenyonwa kuom Nyasaye.

Nyasaye nigi nying ma mare owuon. Kane indiko Muma, nying’ Nyasaye owuon ne yudore nyadi gana gi gana ei Muma duto. Loko mang’eny otiyo kode e Zaburi 83:⁠18, kama wacho niya: “Ni mondo ging’e ni in, ma nyingi Jehova, in kendi e ng’a Ma Malo Chutho e piny ngima.”

Timbe ma dhano timo nyalo miyo chuny Jehova Nyasaye obed mamor kata owinj lit. Bang’ kane Jehova osegolo joge owe bedo wasumbini Misri, seche moko ne gidagi luwo puonj mariek ma ne ochiwonegi. Timbegi mag ng’anjogo, ne ‘chido chunye.’ Timbegi ne ‘nyoro chuny Jaler mar Israel.’—Zaburi 78:⁠40, 41.

Jehova dewowa ng’ato ka ng’ato. Kowuoyo kod jopuonjrene, Yesu nowacho kama: “To oyundi ariyo ok ing’iewo gi hela achiel koso? Kata kamano achiel kuomgi ok nolwar piny ma ok Wuonu ong’eyo. To kata mana yie wiu osekwan duto. Kuom mano kik uluor; un uloyo winy mang’eny.”—Mathayo 10:⁠29-​31.

Nyasaye rwako dhano mowuok e ogendini duto. Jaote Paulo nonyiso Jo-Grik ma ne ni Athene ni, ‘kuom ng’at achiel Nyasaye nochweyo ogendini duto mag ji, mondo gidag e piny duto.’ Bende nowacho ni Nyasaye ‘ok bor kodwa ng’ato ka ng’ato.’ (Tich Joote 17:⁠26, 27) Jaote Petro to nowacho kama: “Nyasaye ok odewo wang’ ji; to kuom ogendini duto ng’at moluore, kendo matimo tim makare, e moyiego.”—Tich Joote 10:⁠34, 35.

GIN GWETH MAGE MWAYUDO? Jomoko gin “jokinda kuom Nyasaye, to en kinda ma onge gi ng’eyo.” (Jo Rumi 10:2) Ka ing’eyo gadier gima Muma puonjo kuom Nyasaye, ok ibi yie mondo owuondi kendo ibiro ‘sudo machiegni ir Nyasaye.’—Jakobo 4:8.

Mondo iyud weche momedore, ne sula mokwongo, kama wacho ni, “Ang’o Monego Wang’e e Wi Nyasaye?” ei bug Ang’o ma Muma Puonjo Kuom Adier? *

[Weche moler piny]

[Picha manie ite mar 6]

Achiel kuom yo mwanyalo ng’eyogo Nyasaye en kuom ng’iyo gik mosechweyo