Gik Mwapuonjore Kuom Yesu

Kuom Wach “Giko”

Giko mar ang’o?

Jopuonjre Yesu nopenje niya: “Ang’o ma nobed ranyis mar biro mari, kendo mar giko mar ndalo?” (Mathayo 24:3) Sama nodwoko penjono, Yesu ok nowacho ni piny, ma en lowo mwadakieni biro chopo e gikone. Motelo ne mano, ne oyudo osewuoyo kuom “giko mar ndalo,” kendo ne otiyo gi wachno kowuoyo kuom chenro koda riwruoge duto mag dhano michiko gi Satan. (Mathayo 13:⁠22, 40, 49) Omiyo, mago e gik ma ne en godo e paro sama nowacho ni: “Giko nobi.”—Mathayo 24:14.

Yesu nolero nade wach giko?

Ng’eyo ni chenro mag piny marachni biro chopo e gikogi, en ‘wach maber.’ Yesu nowacho ni: ‘Wach maberni mar pinyruoth nolandre e pinje duto, mondo obed ranyis ni ogendini duto; eka giko nobi.’ Yesu nolero giko mar piny marachni kama: “Masira maduong’ nobedie, ma pok nobedoe nyaka a chakruok piny nyaka chil kawuono, kendo ok nochak obedie ngang’. Dine ndalogo ok ong’adi, onge ng’a ma dotony.”—Mathayo 24:⁠14, 21, 22.

Jomage mibiro kethi?

Mana jogo maok ohero kendo maok tine Jehova kod Yesu ema ibiro kethi. Joma kamago ok winj Nyasaye. Yesu nowacho niya: ‘Kaka ndalo mag Noa nobet, e kaka biro mar Wuod dhano nobedi. Nikech e kaka ndalogo kane ataro mar pi podi, ne ok odonjonigi nyaka ataro nobiro, kendo yuoyogi giduto.’ (Mathayo 24:⁠36-​39) Yesu nowacho ni,  thoth ji ni e yo madhi e kethruok. Kata kamano, nosingo ni nitie ‘yo madiny ma dhi e ngima.’—Mathayo 7:⁠13, 14.

Giko mar pinyni nobed karang’o?

Kane openjo wach ranyis mar bedoe mare e loch koda ranyis “mar giko mar ndalo,” Yesu nodwoko niya: ‘Oganda noked gi oganda, kendo pinyruoth gi pinyruoth; kuonde moko kech nobedie, kendo piny noyiengini, kendo nikech richo nomedre, hera mar ji mang’eny nodok mang’ich.’ (Mathayo 24:⁠3-​12) Kuom mano, gik moko duto maricho mwawinjo wechegi sani, miyowa jip—tiendeni sirkal mar Pinyruodh Nyasaye chiegni kelo kuwe ne dhano mawinjo chik. Yesu nowacho ni: “Kuneno ka magi timore, ng’euru ni pinyruodh Nyasaye chiegni.”—Luka 21:31.

En ang’o monego itim?

Yesu nowacho ni, Nyasaye “nochiwo Wuode ma miderma, mondo ng’a ma oyie kuome kik lal, to obed gi ngima mochwere.” (Johana 3:⁠16) Mondo omi inyis yie kuom Nyasaye koda Wuode, dwarore ni ing’egi maber. Omiyo, Yesu nowacho kama: “Mani e ngima mochwere, ni ging’eyi, in Nyasaye makende maradier, kod jal ma nioro, Yesu Kristo.”—Johana 17:3.

Tang’ ahinya mondo parruok gi chandruoge mag ngima kik moni puonjori yore monego inyisgo ni ihero Nyasaye. Yesu nowacho niya: ‘Ritreuru uwegi, dipo ka chunyu opong’ gi parruok mag ngimani, mi ndalono upo kochopo kuomu kaka obadho. Nikech ndalono nobi.’ Ka itiyo gi siem ma Yesu nochiwono, to iniyud “teko mar tony e magi duto ma nobi.”—Luka 21:⁠34-​36.

Mondo iyud weche momedore, ne sula mar 9, kama wacho ni “Be Wadak e ‘Ndalo mag Giko’?” ei bug Ang’o ma Muma Puonjo Kuom Adier? *

[Weche moler piny]