Timuru Dongruok Kaka Joot e Tiyo ne Nyasaye

BEDO gi chuny mar tiyo kanyachiel en gima dwarore ahinya kuom jogo madwaro mondo gibed gi joot mohero kendo lamo Jehova. Kane Jehova ochweyo dhano ariyo mokwongo, nojiwo kaka dwarore mondo giti kanyachiel. Hawa ne onego oti kod Adam kaka “jakony mowinjorene.” (Chak. 2:⁠18) Kend en riwruok, ma dichwo gi dhako konyore kanyachiel ng’ato gi nyawadgi. (Ekl. 4:⁠9-​12) Chopo migawo ma Jehova omiyo jonyuol koda nyithindo, en gima bende dwaro mondo giti kanyachiel.

Lamo mar Joot

Barry kod Heidi nigi nyithindo abich. Giyudo ni tiyo kanyachiel mondo omi gibed gi puonjruok Muma mar joot konyogi timo dongruok. Barry lero kama: “Kuom wach puonjruok mar joot, ahinyo miyo nyithindo migepe matindo tindo kinde ka kinde. Anyalo kwayogi mondo giik paro ma ginyalo chiwo koa e sula mag Amkeni! Bende wabedo gi kinde mag tiegruok kwatimo ikruok ne tij lendo mondo omi nyathi ka nyathi obed moikore gi gima onyalo wacho.” Heidi medo kama: “Waduto wan kod chenro moko mwadwaro chopo e tij Nyasaye, kendo wahinyo nonogi kinde ka kinde sama watimo puonjruokwa mar joot mondo wane ane dongruok mwasetimo.” Barry kod Heidi yudo ni weyo maok giyawo televison kuom odhiambo moko, miyo joot duto thuolo mar somo ma onge koko machandogi.

Chokruoge mag Kanyakla

Mike kod Denise chiege, nopidho nyithindo ang’wen. Ere kaka joodgi noyudo konyruok kuom tiyo kanyachiel? Mike wacho kama: “Nitie kinde moko, ma kata chenro maber ma ne watimo, ok ne tinwa maber, to kata kamano ne wayudo ni tiyo kanyachiel ne konyowa chopo e chokruoge e sa.” Denise lero niya: “Kane nyithindo medo dongo, moro ka moro kuomgi ne nikod tije mag ot momiye. Nyarwa miluongo ni Kim, ne konyo korka tedo koda iko mesa.” Wuodgi miluongo ni Michael paro kama: “Tich Ariyo ne wabedo gi chokruok moro mar kanyakla e odwa. Omiyo, ne waiko ot koda kombe kama ne dwarore.” Wuodgi machielo miluongo ni Matthew, medo niya: “Baba ne neno ni oduogo koa e tich chon e odhiambo ma ne wabedoe gi chokruok mondo otawa e ikruok ne chokruogno.” Timo kamano nokonyogi nade?

Tiyo Kanyachiel Konyo Ahinya

Mike wacho niya: “E higa 1987, an kaachiel gi Denise, ne wachako tiyo kaka jopainia. E kindeno, adek kuom nyithindwa pod ne odak kodwa. Ariyo kuom adekgo bende nobedo jopainia, to nyithindo modong’ osetiyo e tije mag gero Bethel mopogore opogore. Mor machielo mwaseyudo kaka joot en ni wasekonyo ji 40 mi gichopo e okang’ mar chiwruok koda batiso. Bende wasebedo gi thuolo makende mar tiyo kaka joot e konyo tije mag gedo, kata mana e pinje mamoko.”

Kuom adier, tiyo kanyachiel kaka joot en gima konyo ahinya. Donge inyalo manyo yore mamoko ma unyalo tiyoe kanyachiel ng’ato gi ng’ato kaka joot? Unyalo bedo gadier ni bedo gi chuny mar tiyo kanyachiel kaka joot biro konyou medo timo dongruok e tiyone Nyasaye.

[Picha manie ite mar 29]

Bedo gi kinde mag tiegruok ka utimo ikruok ne lendo konyo e timo dongruok