Hera mar Kristo Miyo Wahero Jomoko
Hera mar Kristo Miyo Wahero Jomoko
‘Yesu kosehero joge owuon manie piny, noherogi nyaka giko.’—JOH. 13:1.
1, 2. (a) Ere kaka hera ma Yesu nonyiso en hera makende ahinya? (b) Gin yore mage mag nyiso hera mwabiro nono e sulani?
YESU noketo ranyisi maber kuom nyiso hera e yo makare chuth. Gik moko duto e ngimane—gik ma notimo, kaka nowuoyo, kaka nopuonjo, kaachiel gi thone mar misango—duto nonyiso herane. Nyaka e giko mar ngimane e piny, Yesu nonyiso ji duto hera, to moloyo notimo kamano ne jopuonjrene.
2 Ranyisi maber ma Yesu noketo kuom nyiso hera, keto ne jolupne rang’iny mamalo monego gichopie. Ranyisino bende jiwowa mondo wanyis hera ma kamano ne owete koda nyiminewa ma Jokristo, kaachiel gi jomamoko duto. E sulani, wabiro nono gik ma jodong-kanyakla nyalo puonjore kuom Yesu, e wi wach nyiso hera ne jogo modonjo e ketho, kata mana jogo modonjo e ketho madongo. Wabiro nono bende kaka hera mar Yesu miyo Jokristo kawo okang’ mar konyo owetegi koda jomamoko e kinde ma masira oyudogi kata sama gituwo.
3. Kata obedo ni Petro ne oketho e yo maduong’, Yesu ne otimone nade?
3 E otieno mogik kapok notho, jaote Yesu owuon miluongo ni Petro ne okwede nyadidek. (Mari. 14:66-72) Kata kamano, bang’ kane Petro oselokore moduogo mana kaka Yesu nokoro ni ne odhi timo, Yesu nong’wonone. Yesu nomiyo Petro migepe madongo. (Luka 22:32; Tich 2:14; 8:14-17; 10:44, 45) Ang’o mwapuonjore kuom paro ma Yesu ne nigo, kaluwore kod kaka notimo ne jogo ma nigi ketho kata nyawo moko madongo?
Nyis Hera Kaka mar Kristo ne Joketho
4. En kinde kaka mane madwarore wanyis paro kaka mar Kristo e okang’ moloyo?
4 Kuom yore mang’eny manyalo dwarore ni mondo wanyisie paro kaka mar Kristo, nitie achiel maok yot ahinya timo, ma en sama ng’ato odonjo e ketho maduong’, obed achiel kuom joodwa kata ei kanyakla. Gima lit en ni, kaka ndalo giko mar piny ma Satan oteloeni dhi ka rumo, paro mar pinyni medo ketho timbe mabeyo. Paro maricho mag pinyni nyalo ketho joma tindo koda joma dongo bende, kendo mano nyalo duoko chien jing’o margi mar wuotho e yo madiny. E kinde mag Jokristo mokwongo, ne ochuno ni nyaka gol jomoko oko mar kanyakla, kendo jomoko ne omi siem mager. Kamano bende e kaka en ndalogi. (1 Kor. 5:11-13; 1 Tim. 5:20) Kata kamano, sama jodongo mayalo wechegi nyiso hera kaka mar Kristo, mano nyalo konyo jakethono ahinya.
5. Ere kaka jodongo onego onyis paro kaka mar Kristo ne joketho?
5 Mana kaka Yesu, jodongo nyaka makre gi chike koda puonj mag Jehova kinde duto. Sama gitimo kamano, ginyiso muolo, ng’wono koda hera kaka Jehova. Ka ng’ato oloko chunye gadier, mi ‘chunye onyosore chuth’ kendo ‘chunye olokore kuom richone,’ ok bi bedo matek ne jodongo ‘duogo jalo gi chuny mamuol.’ (Zab. 34:18; Gal. 6:1) To nade ng’at ma wiye tek kendo maok nyis ni oloko chunye?
6. Jodongo nyaka tang’ kik gitim nade ne jogo moketho, to nikech ang’o?
6 Sama jal moketho tamore luwo siem manie Ndiko, kotemo keto ketho mare kuom jomoko, jodongo kaachiel gi jomamoko nyalo winjo marach. Ka giparo ketho ma jalo osetimo, mano nyalo miyo ginyis lit ma gin-go kuom timbe koda kido mag jalo. Kata kamano, mirima jaketh gik moko, kendo en kido maok nyis “paro mar Kristo.” (1 Kor. 2:16; som Jakobo 1:19, 20.) Yesu nochiwo siem e yo ma ratiro ne jomoko ma nodak e ndalone, to kata kamano ok notimo kata wacho gimoro e yo manyiso sigu kata manyiso ni nodwaro hinyo jomoko. (1 Pet. 2:23) Kar mano, nomiyo joketho thuolo mar loko chunygi kendo dok ir Jehova. Kuom adier, achiel kuom gik madongo ma nomiyo Yesu obiro e piny ne en ni mondo “owar joricho.”—1 Tim. 1:15.
7, 8. En ang’o monego ota jodongo seche ma giyalo jogo modonjo e ketho?
7 Ere kaka ranyisi mar Yesu kuom wachni onego omul paro ma wabedogo kuom jogo mochuno ni kanyakla nyaka mi kum? Ber ng’eyo ni chenro mar Ndiko madwaro ni okaw okang’ mar kumo joketho en chenro marito kanyakla, kendo mano miyo jal momi kum olok chunye. (2 Kor. 2:6-8) En gima lit ni nitie jomoko matamore loko chunygi, kendo mano miyo nyaka golgi oko mar kanyakla, to kata kamano ber ng’eyo ni kwan mang’eny kuom jogi bang’e duogo ir Jehova kendo ei kanyakla mare. Sama jodongo nyiso paro kaka mar Kristo, gikonyo e loso yo manyalo miyo jalo olok chunye, mi gikone oduogi ei kanyakla. Bang’ kinde, nyalo bedo ni moko kuom jokethogi ok bi paro puonj gi siem duto mag Ndiko ma jodongo nomiyogi, to onge kiawa ni gibiro paro luor ma jodongo nonyisogi koda kaka jodongo nonyisogi hera.
8 Kuom mano, jodongo nyaka nyis ‘nyak mar roho,’ to maduong’ moloyo, ginyis hera kaka mar Kristo, kata mana kapo ni jal mokethono otamore rwako siem koda puonj ma gisemiye. (Gal. 5:22, 23) Kik girikni ngang’ mar golo jakethono oko mar kanyakla. Onego ginyis ni gidwaro mondo joma oketho odog ir Jehova. Omiyo, sama jaketho moro oloko chunye bang’e, mana kaka thothgi jotimo, onyalo duoko erokamano maduong’ ne Jehova, koda ne “chwo ma gin kaka mich” ma ne omiyo obedone mayot duogo ei kanyakla.—Efe. 4:8, 11, 12, NW.
Nyiso Hera Kaka mar Kristo e Ndalo mag Giko
9. Chiw ane ranyisi manyiso kaka Yesu notimo ne jopuonjrene gima nyiso hera.
9 Luka ndiko kanyiso kaka chieng’ moro Yesu notimo gimoro manyiso hera. Kong’eyo ni bang’ kinde, jolweny mag Rumi ne dhi lworo dala mar Jerusalem, ka gigeng’o ne ji kik wuogi, Yesu nonyiso hera kuom miyo jopuonjrene siem niya: “Ka unune Jerusalem kolwor gi ogend lweny, eka ng’euru ni ochiegni dong’ gunda.” Ang’o ma nonego gitim? Yesu nonyisogi chon kendo e yo maler gigo madwarore gitim. “Eka jo manie Judea mondo giringi gidhi e gode; kendo jo man e kuonde mokiewogo, kik gidonjie; nikech ndalogo nobed ndalo mag chulo kuor, mondo weche duto ma nondiki ochopi.” (Luka 21:20-22) Bang’ ka jolweny mag Rumi noselworo Jerusalem e higa 66 E Ndalowa, jogo ma nowinjo siem nokawo okang’ madwarore.
10, 11. Ere kaka nono kaka Jokristo noringo koa Jerusalem nyalo konyowa ikruok ne ‘masira maduong’no’?
10 Sama ne giringo gia Jerusalem, ne dwarore ni Jokristo onyisre hera kaka mar Kristo ng’ato gi ng’ato, mana kaka Kristo nosenyisogi hera. Kuom adier, ne nyaka gikonyore gi gik moko ng’ato gi nyawadgi. Kata kamano, gima Yesu nokoro ne ok en mana kethruok mar dalano kende. Nokoro bende kama: “Masira maduong’ nobedie, ma pok nobedoe nyaka a chakruok piny nyaka chil kawuono, kendo ok nochak obedie ngang’.” (Math. 24:17, 18, 21) Kapok ‘masira maduong’no’ ochopo koda e kinde mar masirano mapod en gima biro nyime, wan bende nyalo bedo ni wanayud pek moko kendo wanachand gige ringruok. Bedo gi paro kaka mar Kristo biro konyowa nano.
11 E kindeno, biro dwarore mondo waluw ranyisi mar Yesu mar bedo gi hera ma onge guondo. Kuom wachni, Paulo nochiwo puonj niya: “Ng’ato ka ng’ato kuomwa mondo otim gi ma long’o ni owadgi mondo okonye, kendo osire. Nikech Kristo bende ne ok otimo gi ma nohero . . . To Nyasaye ma wuon kinda gi hoch mondo omiu bedo gi winjruok achiel ng’ato kod ng’ato, kaka Kristo Yesu dwaro.”—Rumi 15:2, 3, 5.
12. En hera machalo nade madwarore wabedgo sani, to nikech ang’o?
12 Petro ma en jal ma Yesu nonyiso hera, bende nojiwo Jokristo mondo obed gi hera “ma onge miganga” kendo gibed joma “winjo wach mar adiera.” Jokristo onego ‘oherore ng’ato gi ng’ato gi chunygi duto chuth.’ (1 Pet. 1:22) Ndalogi ema dwarore moloyo kinde mamoko mosekalo, mondo wabed gi kido ma kamago kaka mag Kristo. Gie sani, oganda duto mar Nyasaye medo yudo pek mang’eny. Ng’ato ok onego oket genone kuom gimoro amora manie piny machonni, mana kaka wanyalo neno wachni maler kuom chandruoge mag yuto ma nyocha otimore e piny. (Som 1 Johana 2:15-17.) Kar mano, kaka giko mar pinyni medo sudo machiegni, dwarore wamed sudo machiegni gi Jehova koda gi owetewa, kwamako osiepe madier ei kanyakla. Paulo nopuonjo niya: “Herreuru ng’ato gi ng’ato kaka owete; ng’ato ka ng’ato mondo omi owadgi duong’ moloyo en owuon.” (Rumi 12:10) Kendo Petro nomedo jiwo wachno kowacho niya: “To moloyo duto herreuru chutho ng’ato gi ng’ato, nikech hera umo richo mang’eny.”—1 Pet. 4:8.
13-15. Ere kaka owete moko osenyiso hera kaka mar Kristo e kinde mago ma jomoko oyudo masira?
13 E piny mangima, Joneno mag Jehova ong’ere kaka joma nyiso hera kaka mar Kristo gi tim. Non ane ranyisi mar Joneno ma nochiwore mar konyo jowetegi bang’ kodh yamo mager ma noketho gwenge mag Amerka ma milambo e higa 2005. Nikech ranyisi mar Yesu e nyiso hera, Joneno mokalo 20,000 nochiwore, kendo moko kuomgi noweyo miechgi koda tijegi mabeyo mondo omi gikony owetegi manie chandruok.
14 E gweng’ moro, yamo mager ne omiyo pi nam otak nyaka kilomita 80 oko mar nam, ka pigno chalo kaka sisi ma borne fut 30 kama. Kane pi odok e nam, thoth mier koda ute mamoko ne odong’ kokethore chuth. Joneno ma nochiwore kowuok e pinje mogwaro, nobiro gi gige tich koda gige gedo kaachiel gi lony ma gin-go ka giikore mar timo gimoro amora ma ne dwarore. Nyimine moko ariyo ma gin joot achiel, mabende gin kata mond liete, noketo gigegi e mtoka mar pickup, mi gidhi godo nyaka kama borne en kilomita 3,000 mondo gidhi gichiw kony. Achiel kuom nyiminego osebedo kama ne gidhiyeno nyaka sani, podi okonyo komiti machiwo kony e alworano, kendo otiyo kaka japainia mapile.
15 Ute makalo 5,600 mag Joneno koda jomamoko oseger manyien kendo, kata urogi. Joneno manie alworano nokawo nade wach hera mogundho ma ne onyisgi? Nyaminwa moro ma ode ne okethore, ne oyudo osedar modhi dak e ot moro matin ma chwer, to nigi kendo mar tedo mokethore. Owete ne ogerone ot moro matin, to maber. Kane ochung’ e nyim ot majaber ma ne ogerneno, nyaminwano ne pi wang’e ochwer nikech chunye ne opong’ gi erokamano ne Jehova koda ne owetene. Ng’eny owetego ma miechgi ne okethore, ne odong’ kuonde ma ne oyudo gisedarie kuom higa mangima kata mokalo mano, bang’ ka utegi ne oseger kendo. Nikech ang’o? Mondo omi giwe utegi manyien-go ne owete ma ne obiro mondo ochiw kony. Mano en ranyisi maber ndi mar nyiso paro kaka mar Kristo!
Nyiso Paro Kaka mar Kristo ne Joma Tuwo
16, 17. Wanyalo nyiso paro kaka mar Kristo e yore mage ne jomatuwo?
16 Joma nok kuomwa ema oseyudo masiche madongo. Kata kamano, chiegni ni waduto wakedo gi chandruoge mag tuoche, nyalo bedo wan wawegi kata joodwa. Paro ma Yesu ne nigo kuom joma tuwo ketonwa ranyisi maber. Hera ma ne en-go nomiyo okechogi. Kane oganda okelone joggi ma tuwore, ‘nochangogi giduto.’—Math. 8:16; 14:14.
17 Kindegi, Jokristo ok nigi teko mar timo hono mar chango ji, to kata kamano ginyiso paro koda kido kaka mar Yesu mar kecho joma tuwo. Ere kaka ginyiso mano? Kaka ranyisi achiel, jodongo nyalo nyiso ni gin gi paro kaka mar Kristo ka giloso chenro mar neno ni okony joma tuwo ei kanyakla, ka giluwo puonj miwuoyoe e Mathayo 25:39, 40. * (Som.)
18. Ere kaka nyimine moko ariyo nonyiso hera madier ne nyaminwa moro, to ang’o ma notimore bang’e?
18 En adier ni ok ochuno ni ng’ato nyaka bed jaduong’-kanyakla eka mondo okony jomoko. Ne ane ranyisi mar Charlene ma jahigini 44, ma ne nigi tuwo mar kansa kendo noyudo osewachne ni en mana gi odiechienge apar kende mag dak. Nikech ne ging’eyo chandruok ma ne en-go koda pek ma chwore ne yudo kuom rite, nyimine ariyo ma Jokristo, Sharon gi Nicolette, nochiwore kuom thuologi duto mar konye e ndalone mogikgo. Odiechienge apargo nomedore mochopo jumbe auchiel, to kata kamano nyiminego nonyiso heragi nyaka giko. Sharon wacho ni: “Ok yot rito ng’at ming’eyo ni ok bi chango. Kata kamano, Jehova ne otego chunywa. Konyo nyaminwano nomiyo wamedo sudo machiegni gi Jehova koda e kindwa wawegi.” Chwor Charlene wacho kama: “Wiya ok bi wil gi ng’wono koda kony ma nyiminego ne ochiwonwa. Chuny maler ma ne gin-go koda wechegi majiwo chuny nomiyo jaoda Charlene okalo e tem mogikno e yo mayotie matin, kendo mano nokonya yudo yweyo ma ne dwarore ahinya e ringra koda e pacha. Nasiki ka adwokonegi erokamano. Chiwruok margi nojiwo yie mara kuom Jehova, koda herana kuom riwruokwa mar owete.”
19, 20. (a) Gin yore abich mage mag paro mar Kristo ma wasenono? (b) In ing’ado mar timo ang’o?
19 E sula adekgi, wasenono yore abich manyiso paro mar Yesu koda kaka wanyalo bedo gi paro kaka mare kendo luwo kaka notimo. Weuru wabed ‘mamuol kendo wadembore e chuny,’ kaka Yesu ne chalo. (Math. 11:29) Mad watem matek timo ne jomoko gik moko e yo mang’won, kata mana e kinde ma richogi koda nyawo ma gin-go nenore ayanga. Weuru wanyis chir kuom mako chike duto mag Jehova, kata mana sama wan e bwo tembe.
20 Mogik, weuru wanyis hera kaka mar Kristo ne owetewa duto, mana kaka Kristo owuon notimo, “nyaka giko.” Hera ma kamano, fwenyowa kaka jolup Yesu madier. (Joh. 13:1, 34, 35) Ee, ‘herau mar owete mondo osiki.’ (Hib. 13:1) Kik iwe gimoro omoni nyiso herano ngang’! Ti gi ngimani e pako Jehova kendo e konyo jomoko! Jehova biro gwedho kinda mitimo gi chuny maler.
[Weche moler piny]
^ par. 17 Ne sula mawacho ni, “Fanya Zaidi ya Kusema Tu: ‘Ukaote Moto na Kushiba’” e Mnara wa Mlinzi mar Oktoba 15, 1986.
Be Inyalo Lero?
• Ere kaka jodongo nyalo nyiso paro kaka mar Kristo ne joma odonjo e ketho?
• Ang’o momiyo nyiso hera kaka mar Kristo en gima dwarore moloyo e kinde mag gikogi?
• Ere kaka wanyalo nyiso paro kaka mar Kristo ne jomatuwo?
[Penjo mag Puonjruok]
[Picha manie ite mar 19]
Jodongo dwaro ni mondo joma odonjo e ketho oduog ir Jehova
[Picha manie ite mar 21]
Ere kaka Jokristo ma nodak Jerusalem nonyiso paro kaka mar Kristo?
[Picha manie ite mar 22]
Joneno mag Jehova ong’ere kaka joma nyiso hera kaka mar Kristo gi timgi