Be Iseketo Tenge Kinde mar Puonjruok Muma?

HIGA mokalo, Bura Maduong’ ne olando lokruok e chenro mar chokruok mar kanyakla mondo wayud thuolo momedore mar timo puonjruok mar Muma kaka joot. Kapo ni in e wi joodi, ne ni itayo puonjruok mar Muma kaachiel gi chiegi koda nyithindi, e yo makonyogi ng’ato ka ng’ato. Joma okendore to onge nyithindo biro tiyo gi thuolono e timo puonjruok mar Muma kanyachiel. Nyimine koda owete mapok odonjo e kend kendo ma onge ting’ mag joot, biro tiyo gi thuoloni e yo maber kuom timo puonjruok mar Muma ma margi giwegi.

Ji mang’eny osenyiso ni gimor kuom chenro manyien mar bedo gi odhiambo mar timo Lamo mar Joot. Kuom ranyisi, Kevin, ma en jaduong’-kanyakla, nondiko kama: “Wacho ni ‘erokamano’ ok oromo e nyiso mor ma wan-go ei kanyakla. Kaka jodongo, wasewuoyo kuom kaka watiyo gi thuolo modhiambono e timo gino ma Bura Maduong’ ne owacho ni watim, ma en timo puonjruok gi joodwa.”

Jodi, ma chwore en jaduong’-kanyakla, nondiko kama: “Wan gi nyiri adek, ma johigini 15, 11, kod 2. Nyocha ne wadar mi wadhi e kanyakla mar joma tiyo gi dhok mar ranyisi. Wahinyo kawo thuolo mang’eny timo ikruok ne chokruok. Sani, gi lokruok ma osetimni, koro wan gi odhiambo moro man thuolo ma wanyalo tiyogo e keto pachwa kuom timo lamo mar joot!”

John kod JoAnn, ma gin joma okendore matiyo kaka painia mapile, nondiko kama: “Puonjruok marwa mar Muma kaka joot ne ok en mapile nikech ne nyaka wachune ei chenro mopogore opogore ma wan-go mag timo tije kanyakla. Chenro manyienni en mich moa kuom Jehova makonyowa bedo gi winjruok maber kode—mana kwatiyo gi thuolono kaka dwarore.”

Tony, ma en owadwa mapok odonjo e kend manie e kind higini 20-30, noketo tenge tiyo gi odhiambo mar Tich Ariyo kaka odiechieng’ mare mar timo puonjruok ma mare owuon. Otiyo gi thuolo mamoko e kor juma timo ikruok ne chokruoge mag kanyakla. Kata kamano, Tony wacho ni, “Asiko ka agombo mondo Tich Ariyo ochopi.” Nikech ang’o? “Odhiambono e kinde makende ma mara gi Jehova.” Tony lero niya: “Kuom seche ariyo kama, apuonjra weche matego winjruok e kinda gi Jehova. Bedo gi thuolo momedore mar timo puonjruok, miya thuolo mar paro matut kuom ndiko ma asesomo ei Muma.” Timo kamano osekonye nade? Owacho kama: “Puonj mag Jehova osebedo ka donjo ei chunya moloyo chon.” Be onyalo chiwo ranyisi? “E bug Insight, ne asomo wach osiep ma ne ni e kind Daudi kod Jonathan. Ne apuonjora mathoth kuom kaka Jonathan ne onyiso chuny mar chiwruok. Ranyisine ne okonya neno e yo maler moloyo, tiend bedo osiep madier. Asiko ka agombo mondo odhiambo mar Tich Ariyo ochopi, mondo afweny puonj mamoko mabeyo kaka mano!”

Onge kiawa ni, jotich duto mag Jehova biro yudo ber mogundho kuom tiyo maber gi thuolo momedoreno, e timo puonjruok mar Muma kod lamo mar joot e yo makonyogi ng’ato ka ng’ato.