Lamo mar Joot Dwarore Ahinya Mondo Wabi Watony!

PAR ane kaka “lweny mar chieng’ maduong’no mar Nyasaye Manyalo Duto” biro kelo luoro miwuoro! (Fwe. 16:14) Janabi Mika nowacho kaka gik moko nobed kama: ‘Mi gode noleny, kendo pewe nobarre, mana kaka odok kich leny e nyim mach, kendo kaka pige o kama ridore.’ (Mika 1:4) Kethruok ma nobedie ne joma ok lam Jehova nobed machalo nade? Wach Nyasaye lero kama: “Jo monegi gi luet Jehova ndalono, nobedi e kuonde duto nyaka ka ma piny ogikoe, koni gi koni.”—Yer. 25:33.

Kaluwore gi siemgo, ber ka jogo ma gin wich e udi—kendo ma thothgi gin udi ma janyuol en achiel, openjre giwegi e wi nyithindgi ma koro osebedo joma nyalo tiyo gi pachgi niya, ‘Be nyithinda notony e masira mabirono?’ Muma singonwa ni ginyalo tony gadier kapo ni gichung’ motegno e winjruokgi gi Nyasaye e okang’ mowinjore gi hikgi.—Math. 24:21.

Gimomiyo Dwarore Bedo gi Kinde mar Timo Lamo mar Joot

Kaka janyuol, tem duto minyalo mondo ine ni ipidho nyithindi ‘kirieyogi kendo puonjogi kuom Jehova.’ (Efe. 6:4) Puonjruok Muma gi nyithindi en gima dwarore ahinya. Wadwaro mondo nyithindwa obed kaka Jokristo ma ne ni e dala mar Filipi ma Paulo nopwoyo kuom yie winjo kendo luwo Jehova. Nondiko kama: “Joherana, kaka ndalo duto nuwinjo gik ma nawacho, kamano losuru warruok maru gi luoro kod kibaji, ok ka da an kodu kende, to moloyo koroni kaonge.”—Fili. 2:12.

Be nyithindi makore gi chike Jehova sama ionge? To nade ka gin e skul? Ere kaka inyalo konyo nyithindi mondo gibed gadier ni chike Jehova gin chike mabeyo moloyo, mondo chikego otagi kata e sechego ma ionge?

Lamo mar joot nyalo konyo kama duong’ ahinya e miyo nyathini oger yie mare kuom Jehova. Kuom mano, we wanon ane gik moko adek manyalo miyo puonjruok Muma ma utimo kaka joot okonyu ahinya.

Makri gi Chenro Miseketo

Muma nyiso ni malaike ma gin yawuot Nyasaye igwelo e nyime e kinde moseketi. (Ayub 1:6) In bende tim kamano gi nyithindi. Ket odiechieng’ koda sa mar timo Lamo mar Joot, kae to ine ni umakoru gi chenro ma useketono. E wi mano, yanguru kinde machielo ma unyalo timogo Lamo mar Joot, kapo ni chenro maru mapile gimoro ochocho.

Kaka dweche medo sudo, kik ichak bedo gi tim mar baruok kata weyo maok utimo lamono. Ng’e ni e kind jogo mipuonjorigo Muma, nyithindi ema gin jopuonjre magi mag Muma madongo moloyo. To ema podi Satan diher mondo ongamgi. (1 Pet. 5:8) Kapo ni iweyo timo Lamo mar Joot mana nikech idwaro ng’iyo program mag televison kata timo gik mamoko maok ochuno ahinya, mano biro nyiso ni Satan oseloyi.—Efe. 5:15, 16; 6:12; Fili. 1:10.

Puonjreuru Gik Munyalo Tiyogo e Ngimau Mapile

Lamo mar Joot ok onego obed mana kinde mar medo ng’eyo ma wan-go. Temuru wuoyo kuom gik manyalo tiyo e ngimau. E yo mane? Seche moko, yier uru thuond weche mamulo gigo ma nyathini biro romo godo bang’ odiechienge kata jumbe matin mabiro. Kuom ranyisi, donge nyalo bedo maber ka utiyo gi kindeno  e timo tiegruok kuom kaka unyalo tiyo tij lendo? Nyithindo ohero timo gik ma gimorgo kendo ma gilonyie. Timo ranyisi mag tiyo tij lendo kendo paro yore ma ginyalo loyo godo akwede sama gilendo, biro konyogi gimed bedo gi chir kuom tiyo gi yore mopogore opogore mag lando wach Pinyruoth.—2 Tim. 2:15.

Unyalo bedo bende gi kinde mag tiegruok mabiro konyo nyithindi ong’e kaka ginyalo loyo tembe mawuok kuom mbesegi. Weche mayudore e sula mar 15 ei bug Maswali Ambayo Vijana Huuliza—Majibu Yafanyayo Kazi, Buku la 2, nyalo konyou yudo weche ma unyalo wuoyoe kaka joot. Wiye kama wacho ni “Kaka Unyalo Kedo gi Tembe mag Mbese” e ite mag 132 kod 133 chiwo paro manyalo konyo, kendo chiwo thuolo mondo nyathini onyis pache kuom gima oneno ni berne. Weche ma piny e ite mar 133 jiwo rowere kama: “Ka in gi janyuol kata osiepni moro motegno, unyalo timo ranyisi kuom kaka inyalo chiwo dwoko.” Donge nyalo bedo maber ka kinde ka kinde utimo tiegruok kamano sama utimo Lamo mar Joot?

Lamo mar joot chiwo ne jonyuol thuolo mar jiwo ne nyithindgi ber ma chenro mar tiyo ne Nyasaye e okang’ momedore kelo. Kaluwore gi wachni, bug Vijana Huuliza, Buku la 2, oting’o weche mabeyo ahinya e sula mar 38, mawacho ni “Abiro Tiyo Nade gi Ngimana?” Sama uwuoyo kuom sulani, kony nyathini mondo one ni chiwo ngimane duto mondo oti ne Jehova e ngima maberie moloyo. Ket gombo e chuny nyathini mondo oher tiyo kaka paina, tiyo e Bethel, dhi e Skul mar Tiego Owete e Tije Kanyakla (MTS), kata luwo yore mamoko mag tiyo ne Nyasaye kuom thuologi duto.

Ber keto wachni e paro: Jonyuol moko madwaro ne nyithindgi ber nyalo temo jiwo ahinya gima digiher ni nyithindgi otim, to wigi wil neno gik mabeyo ma nyithindgi timo gie sani. En adier ni jiwo nyithindi oket chenro mabeyo kaka dwaro tiyo e Bethel kata bedo jo misonari. Kata kamano, sama itimo kamano, tang’ ahinya kik ilwer nyathini kendo miyo obed gi chuny mool. (Kol. 3:21) Kinde duto ng’e ni wuodi kata nyari, nyaka her Jehova mokwongo gi chunye owuon—to ok gi chunyi. (Math. 22:37) Omiyo, many yore mag puoyo nyathini kuom gigo motimoe maber, kendo kik iket wang’i mana kuom gigo ma ok otimie maber. Konye neno kendo bedo gi chuny mar dwoko erokamano kuom duto ma Jehova osetimo. Kae to iwe chuny nyathini orwak owuon ber ma Jehova timo.

Timuru Puonjruok e Yo Mamoro Joot

Gimachielo mar adek manyalo miyo Lamo mar Joot odhi maber, en time e yo mamoro joot. Ere kaka unyalo chopo mano? Seche moko ka dichiel, unyalo winjo drama manie kaset kata wuoyo kanyachiel bang’ neno video molos gi Joneno mag Jehova. Kata unyalo somo sula moko mag Muma kanyachiel, ka ng’ato ka ng’ato kuom joot imiyo kuonde monego osom.

E Ohinga mar Jarito kod Amkeni!, nitie sula mabeyo mowinjore gi puonjruok mar joot. Kuom ranyisi, unyalo tiyo gi sula manie ite mar 31 e gaset mar Amkeni! mar dwe ka dwe mawachoni “Inyalo Dwoko Nade?” Kinde ka kinde, sula mag Mnara wa Mlinzi (gocho mar ji  duto) nigi kuonde mag puonjruok mawacho ni “Ne Rowerewa.” Kuonde mag puonjruokgo wilore kinde ka kinde gi wich mawacho ni “Puonj Nyithindi,” mag konyo yawuowi koda nyiri matindo.

Sula mag “Rowere Penjore” mayudore e Amkeni! nyalo konyo ahinya jonyuol ma nigi rowere ma ndhowe mana kaka buk miluongo ni Vijana Huuliza, Buku la 2. Sama utiyo gi bugni, kik uwe maok uwuoyo kuom sanduk mondiki ni “Ineno Nade?” e giko sula ka sula. Sandugno oting’o weche mathoth maok mana mag nwoyo. Penjo mayudore e sandugno inyalo tigo kaka weche mag puonjruok kaka joot.

Kata kamano, tang’ mondo kik ilok puonjruok mar joot obed kaka kinde mar nono nyithindo ahinya. Kuom ranyisi, kik item chuno nyathini mondo osom gi duol maduong’ dwoko ma osendiko kuom penjo manie bugno. Bugno jiwo jonyuol e ite mar 3 kama wacho ni “Gima Jonyuol Onego Otim,” niya: “Mondo omi nyithindi ma rowere ondik weche manie chunygi gadier, wenegi thuologi. Bang’e ginyalo bedo thuolo mar nyisi weche ma gisendiko.”

Ka umakoru gi chenro ma useketo mar lamo mar joot, kupuonjoru gigo manyalo konyou e ngimau mapile, kendo kutime e yo mamoro joot duto, Jehova biro gwedho ahinya kinda ma utimo. Kinde majaber ma joot bedogo kaka ma, biro konyo ahinya e miyo joodu chung’ motegno e winjruokgi gi Nyasaye.

[Sanduk manie ite mar 31]

Ti gi Yore Mopogore Opogore

“Sama wapuonjore gi nyiwa matindo, an kaachiel gi chwora, wajatimo ikruok motelo ne gigo ma wabiro puonjore e romo mag kanyakla, kae to wanyiso nyiwago mondo ogor picha malero machuok gima ne wapuonjore. Seche moko watimo drama kuom gigo ma wasomo ei Muma, kata timo ranyisi kuom yore mwanyalo wuoyogo gi ji e tij lendo. Kinde duto ne waketo puonjruok owinjre kod hikgi, obed mamorogi.”—J.M., e piny Amerka.

“Mondo omi akony nyathi japuonjrena moro mondo ong’e kaka ne ok en tich mayot tiyo kod buk modol e kinde ma ne indiko Muma, ne wagoyo kopi mar weche manie bug Isaiah bang’ golo oko nambe manyiso sula kod kwan matindo. Ne wariwo kalatese kae to wamakogi gi gima idologie. Kae to wuowino notemo timo gima Yesu notimo e sunagogi e Nazareth. Weche manie Luka 4:16-21 nyiso ni Yesu ‘noelo [buk modol mar Isaya] monwang’o’ ka ma noyudo omanyo. (Isa. 61:1, 2) Kata kamano, kane wuowini otemo timo kamano, nonwang’o katek yudo Isaiah 61 kotiyo gi buk modol ma onge sula koda kwan matindo. Ka onyiso kaka Yesu ne olony kuom tiyo gi buk modol, wuowino nokok kama: ‘Yesu ne en ng’ama riek miwuoro!’” —Y.T., e piny Japan.

[Picha manie ite mar 30]

Bedo gi kinde mag tiegruok nyalo konyo nyithindi ong’e kaka ginyalo kedo gi tembe mag mbese

[Picha manie ite mar 31]

Tem mondo itim Lamo mar Joot e yo mamoro joot duto