Penjo Moa Kuom Josombwa

En puonj mane ma wayudo kuom Ngeche 24:27?

Kochiwo puonj moting’o rieko ne ng’ama rawera, jandik bug Ngeche wacho kama: “Los tichni maoko; obedi tich moyikore, mikonyorigo, e puodho; eka bang’e ger odi.” En puonj mane michiwo e ngerono mokudh gi much Nyasaye? Dwarore ni dichwo obed moikore maber kapok odonjo e kend kendo bedo gi joode, koketo e pache ting’ mabedoe kuom donjo e ngima ma kamano.

E kinde mosekalo, oseti gi ndikoni e lero ni dichwo kendo wuoro nyaka rit, ok mana tije mar yuto kende, to bende onego oger kendo ojiw joode, kuom ranyisi, onego otim kamano korka puonjogi e wi Nyasaye koda Muma. Kata obedo ni parono en adier kendo otenore kuom Ndiko, nenore ni ok en e gima ndikoni jiwo ahinya. Ang’o momiyo ok en kamano? We wanon ane gik moko ariyo manyiso mano.

Mokwongo, ndikono ok wuo kuom wach gero kata jiwo joot ma osebedo ka nitie. Kar mano, gima iwuoyoe sie, en gero ot. Wach moti godo ni “ger,” inyalo ti godo bende e yor ranyisi kiwuoyo kuom gero, kata chako ngima joot, tiendeni donjo e kend kendo bedo gi nyithindo.

Mar ariyo, ndikono jiwo timo gik moko kiluwo chenro mochan maber, ochalo kaka wacho ni, “Mokwongo tim mae; kae to itim machielo.” Omiyo, kuom mano, be dibed ni ngerono temo wacho ni ting’ mag ringruok onego oket motelo ne ting’ ma Nyasaye omiyowa? Ok en kamano ngang’!

E kinde ma ne indiko Muma, ka dichwo ne dwaro ‘gero ode,’ tiendeni chako ngima joot kuom donjo e kend, ne dwarore ni openjre kama, ‘Be aikora ne ting’ mar rito chiega gi nyithindo ma wanyalo yudo bang’e?’ Kapok dichwo ochako ngima joot, ne en gi tich ma ne nyaka otim, rito puothene kata chambe. Omiyo, loko mar The Bible in Luo, 1976 wacho kama e ndikono: “Kik igo dala, mi iger ot maber kapok iloso puotheni ma miyi chiemo moromi.” Be puonj manie ndikono tiyo e kindegi?

Ee. Dichwo ma dwaro donjo e kend dwarore ni obed moikore maber ne ting’no. Ka en gi nyalo, nyaka to oti. Kuom adier, tich matek ma dichwo onego otim mondo oritgo joode ok onego obed mana kuom wach chiwo gige ringruok kende. Wach Nyasaye nyisowa ni dichwo maok rit joode kuom chiwonegi gige ringruok, koda rito winjruok margi gi Jehova, rach moloyo ng’at ma onge yie! (1 Tim. 5:8) Kuom mano, jal ma rawera ma ikore donjo e kend kendo chako ngima joot, onego openjre penjo kaka magi: ‘Be aseikora moromo mar chiwo ne jooda gige ringruok? Be aikora kawo ting’ mar telo ne jooda e weche mag lamo? Be abiro chopo ting’ mar tayo puonjruok mar Muma mapile gi chiega koda nyithindwa?’ Onge kiawa ni Wach Nyasaye jiwo ahinya wach chopo ting’go, ma gin ting’ madwarore.—Rapar 6:6-8; Efe. 6:4.

Omiyo, ng’ama rawera ma manyo nyako modwaro kendo, onego opar matut kuom puonj manie Ngeche 24:27. Kamano bende, nyako biro timo maber ka openjore kabe oikore mar kawo ting’ mar bedo chi ng’ato, kata miyo. Joma osedonjo e kend bende onego openjre penjo kaka mago kapo ni giparo wach pidho nyithindo. (Luka 14:28) Dak kaluwore gi puonj ma kamano mokudh gi much Nyasaye, nyalo konyo oganda Nyasaye geng’o chandruok mang’eny kendo bedo mamor e ngima mar joot.

[Picha manie ite mar 10]

Gin penjo mage e wi wach donjo e kend ma dichwo ma rawera onego openjre?