“Un Osiepena”
“Un Osiepena”
“Un osiepena kutimo mago machikou.” —JOH. 15:14.
1, 2. (a) Osiepe Yesu ne gin joma owuok e kit ngima machalo nade? (b) Ang’o momiyo bedo osiepe Yesu en gima duong’?
JOGO ma nobet kanyachiel gi Yesu e ot moluow malo, nowuok e kit ngima mopogore opogore. Petro kod Andrea ma ne gin owete, ne gin jolupo. Mathayo ne en jasol osuru chon—tich ma ne Jo-Yahudi ochayo ahinya. Moko kuomgi, kaka Jakobo kod Johana, nyaka bed ni nong’eyo Yesu chakre kane en rawera. To moko kuomgi kaka Nathaniel, nyalo bedo ni nong’eyo Yesu mana kuom higini matin kende. (Joh. 1:43-50) Kata kamano, jogo duto ma ne nitie e nyasi mar Pasaka e Jerusalem, ne nigi adier ni Yesu ema ne en Mesia ma ne osingi, Wuod Nyasaye mangima. (Joh. 6:68, 69) Nyaka bed ni ne gin gi mor e chunygi kane giwinjo Yesu ka wachonegi niya: “Aluongou osiepena nikech weche duto ma nawinjo kuom Wuora asenyisou.”—Joh. 15:15.
2 Wechego ma Yesu nowacho ne jootene ma ne ogene, bende tiyo kuom Jokristo mowal kuom roho e kindegi, kendo inyalo wach kamano koda kuom jowetegi ma gin ‘rombe mamoko.’ (Joh. 10:16) Kata obedo ni wawuok e kit ngima machalo nade, wanyalo bedo gi thuolo makende mar bedo osiepe Yesu. Osiep ma wabedo godo kode en gima duong’nwa moloyo nikech mano miyo wabedo osiepe Jehova bende. Kuom adier, ok wanyal sudo machiegni gi Jehova ka ok wasudo machiegni gi Kristo mokwongo. (Som Johana 14:6, 21.) Kare onego watim ang’o mondo wabed kendo wasik ka wan osiepe Yesu? Kapok wachako nono thuon wach maduong’no, weuru wanon ane ranyisi ma ne Yesu owuon oketo kuom wach bedo osiep maber, kendo wane gima wanyalo puonjore kuom kaka jopuonjrene ne orwako osiep ma ne nie kindgi gi Yesu.
Ranyisi ma Yesu Noketo mar Bedo Osiep Maber
3. Yesu ne ong’ere kuom timo ang’o?
3 Ruoth Suleman ma ne en ruoth mariek nondiko kama: “Jamoko ni gi osiepe mathoth.” (Nge. 14:20) Wechego nyiso kaka dhano morem kite chalo, gihero timo osiep kaluwore kod gima ginyalo yudoe, moloyo gima ginyalo chiwo. Yesu ok ne orem e yo machalo kamano. Mwandu kata huma mar ng’ato ne ok yuaye. En adier ni, Yesu nonyiso hera ne rawera moro ma ramoko mi nogwele mondo obed jalupne. Kata kamano, Yesu noluwone ng’atno mondo odhi olok gik ma ne en-go duto mondo omi jo modhier. (Mari. 10:17-22; Luka 18:18, 23) Yesu nong’ere ahinya ok nikech wach mako osiep gi jomwandu ma johuma, to kuom timo osiep gi jochan ma ji ochayo.—Math. 11:19.
4. Ang’o momiyo inyalo wach ni osiepe Yesu ne nigi nyawo?
4 En adier ni osiepe Yesu ne gin joma nigi nyawo maggi. Nitie kinde moro ma Petro ne ok oneno gik moko e yo ma Nyasaye nenogo gik moko. (Math. 16:21-23) Jakobo kod Johana nonyiso chuny mar manyo duong’ kane gikwayo mondo Yesu oketgi e kombe mag telo e Pinyruoth. Gima ne gikwayono ne ochwanyo joote mamokogo kendo wach manyo duong’ ne en wach ma ne kelo ywaruok. Kata kamano, Yesu notemo rieyo pach osiepene mos, kendo chunye ne ok ool kodgi.—Math. 20:20-28.
5, 6. (a) Ang’o ma nomiyo Yesu norito osiep ma ne nitie e kinde gi thoth jootene? (b) Ang’o momiyo Yesu nong’ado osiep ma ne nitie e kinde gi Judas?
5 Yesu ne orito osiep ma ne nitie e kinde gi ji, ok nikech ne ok odew chalgi, kata nyawo maggi. Kar mano, noyiero keto pache kuom gik mabeyo ma ne gitimo gi chuny maler koda kido mabeyo ma ne gin-go. Kuom ranyisi, nindo notero Petro, Jakobo, kod Johana kar mondo gijiw Yesu e sechego makoro ne en kama tek. Wanyalo neno gimomiyo Yesu ne ok mor kod gima ne gitimono. Kata kamano, noneno ni chunygi ne gombo timo gima ber, mowacho kama: “Adier, chuny oyie, to ringruok ema nyap.”—Math. 26:41.
6 Mopogore gi mano, Yesu nong’ado osiep ma ne nie kinde gi Judas Iskariot. Kata obedo ni Judas ne temo nyiso gi kite ma oko ni pod gin osiepe, Yesu nofwenyo ni jalni ma noyudo en osiepne machiegni, noseweyo chunye mondo okethre. To nikech Judas nosebedo osiep piny, Judas notimore owuon jasik Nyasaye. (Jak. 4:4) Kuom mano, kane Yesu onyiso ayanga osiep manie e kinde gi jootene 11 ma ne omakore kode chuth, noyudo osegolo Judas e odno.—Joh. 13:21-35.
7, 8. Yesu nonyiso hera ma ne en-go ne osiepene e yo mane?
7 Yesu ok ne ng’i mana nyawo ma osiepene ne ni godo, kendo ne otimonegi gik ma ne nyalo konyogi. Kuom ranyisi, ne okwayo Wuon mare e lamo mondo obi oritgi e bwo tembe. (Som Johana 17:11.) Yesu nonyiso ni nodewo nyawo ma ne gin-go e ringregi. (Mari. 6:30-32) Kendo gima ne duong’ne ok ne en mana nyisogi gima noparo, to bende winjo kendo ng’eyo pachgi koda kaka ne giwinjo e chunygi.—Math. 16:13-16; 17:24-26.
8 Yesu notiyo gi ngimane e konyo osiepene kendo ne othonegi. En adier ni nong’eyo ni nyaka to ochiw ngimane, mondo ochop okang’ mowinjore gi dwaro mar Wuon mare kuom wach luwo chik mar bura makare. (Math. 26:27, 28; Hib. 9:22, 28) Kata kamano, Yesu nochiwo ngimane kaka yo monyiso godo hera mare. Yesu nowacho niya: “Onge ng’ato man gi hera maduong’ moloyo ma, ni ng’ato oweyo ngimane nikech osiepene.”—Joh. 15:13.
Ere Kaka Jopuonjre Yesu Norwako Osiep ma ne Nie Kindgi gi Yesu?
9, 10. Ere kaka ji norwako chuny mar chiwo ma Yesu ne nigo?
9 Yesu chunye ne oyangore mar nyiso herane, chiwo thuolone, koda gige ringruok ma ne en-go. To nikech mano, ji ne winjo ka oywayogi, kendo ne gimor sudo machiegni kode. (Luka 8:1-3) Kaluwore kod gik ma ne otimore e ngimane owuon, Yesu nowacho kama: “Chiwuru, eka nochiwnu; por mogik, modin, motiel, kendo moo oko ginichiw e koru. Nikech rapor muporogo ema nopornugo kendo.”—Luka 6:38.
10 En adier ni jomoko ne otemo mako osiep gi Yesu mana nikech gik ma ne ginyalo yudo kuome. Osiepe mag miriambogi noweyo Yesu kane ok giwinjo tiend gimoro ma nowacho. Kar mondo giket geno kuom gima Yesu ne wacho, ne girikni bedo gi paro maok kare mi gikwede. Mopogore gi jogo, joote to ne omakore kode motegno. Kinde mang’eny, osiep ma ne nitie e kindgi gi Kristo ne yudo tem, to kata kamano ne gitimo duto ma ginyalo mondo giriwe lwedo e kinde ma gik moko ne beyo kata rach. (Som Johana 6:26, 56, 60, 66-68.) E otieno mare mogik e pinyka kaka dhano, Yesu nonyiso ni ne omor gi osiepene, kowacho niya: “Un e jo mosesiko koda e temruok maga.”—Luka 22:28.
11, 12. Ere kaka Yesu nonyiso jopuonjrene ni pod ne ogenogi, to ne girwako wechene nade?
11 Mapiyo bang’ ka Yesu nosepuoyo jopuonjrene kuom chung’ kode motegno, jopuonjrenego bang’e ne ojwang’e. Ne nitie kinde moro machuok ma ne giweyo luoro mar dhano mi oloyo hera ma ne gin-go kuom Kristo. Yesu nochako ong’wononegi kendo. Bang’ thone koda chierne, ne ofwenyore ne jopuonjrene kendo nomiyo gibedo gadier ni podi ne gin osiepene. E wi mano, ne ogenogi ma omiyogi tich maler mar Nyasaye—tij timo ‘ogendini duto jopuonjre,’ kendo mondo gidok jonenone “nyaka tung’ piny.” (Math. 28:19; Tich 1:8) Ere kaka joote Yesu norwako oteno?
12 Jopuonjre notimo duto ma ne ginyalo mondo giland wach Pinyruoth. Kokalo kuom kony mar roho maler mar Jehova, mapiyo nono ne gipong’o Jerusalem gi puonjgi. (Tich 5:27-29) Ne ok giweyo luwo chik ma Yesu nomiyogi mar timo ji jopuonjre, kata mana e kinde ma ne isiemogi gi wach tho. Higini matin bang’ kane Yesu osechikogi ni gitim jopuonjre, jaote Paulo ne nyalo ndiko ni wach maber ne oselandi ne “chuech duto e bwo polo.” (Kol. 1:23) Kuom adier, jopuonjregi nonyiso ni ne gimor gi osiep ma ne nie kindgi gi Yesu!
13. Jopuonjre Yesu noyie mondo puonjne ochikgi e yore mage?
13 Jogo ma nobedo jopuonjre noyie mondo puonj Yesu ochik bende kit ngimagi ng’ato ka ng’ato. Kuom joma thoth, mano ne dwaro ni gitim lokruok madongo e timbegi koda e kitgi ma iye. Moko kuom jopuonjre manyien-go noyudo gin chwo ma terore gi chwo, joterruok, jomer, kata jomecho. (1 Kor. 6:9-11) Nochuno moko kuomgi timo lokruok e chunygi kuom kaka ne gineno jomoko mawuok e oganda machielo. (Tich 10:25-28) Kata kamano, pod ne giluwo kaka Yesu nochiko. Ne gilonyo dhano machon, mi girwako dhano manyien. (Efe. 4:20-24) Ne ging’eyo “paro mar Kristo,” ka gimedo lony kendo luwo kaka ne oparo koda kaka notimo gik moko.—1 Kor. 2:16.
Osiep Manie e Kindwa gi Kristo Ndalogi
14. Yesu nosingo ni ne odhi timo ang’o e kinde “giko mar ndalo”?
14 Thoth Jokristo mokwongogo nong’eyo Yesu gin giwegi kapok notho, kata noyudo gisenene bang’ chierne. En adier ni wan to pok wabedo gi thuolo ma kamano. To kare ere kaka wanyalo bedo osiepe Kristo? Yo achiel en luwo kaka jatichno mogen kendo mariek tayowa, ma gin kweth mar owete Yesu mowal kuom roho mapod nie piny. Yesu nosingo ni, e kinde “giko mar ndalo,” ne odhi keto jatichno e wi “gige duto.” (Math. 24:3, 45-47) Ndalogi, thoth jogo ma manyo bedo osiepe Kristo ok gin jokanyo maloso kweth mar jatichno mogen. Ere kaka luwo yore ma kweth mar jatichno mogen tayogi godo, konyogi loso osiep manie kindgi gi Kristo?
15. En ang’o mamiyo ikwano ng’ato e kweth mar rombe kata diek?
15 Som Mathayo 25:31-40. Yesu noluongo jogo ma ne dhi loso kweth mar jatichno mogen ni owetene. E ranyisi mar pogo rombe kod diek, Yesu nonyiso maler ni kaka watimo ne owetene, chalo ka gima watimone en owuon. Kuom adier, nowacho ni gima biro miyo ng’ato obed rombo kata diel, biro luwore kod kaka ng’ato timo ne achiel kuom ‘ng’at matinie moloyo kuom owetenego.’ Omiyo, yo maduong’ moloyo ma jogo ma nigi geno mar dak e piny nyiso godo gombo ma gin-go mar bedo osiepe Kristo, en kuom riwo lwedo kweth mar jatichno mogen.
16, 17. Ere kaka wanyalo nyiso osiep manie kindwa gi owete Kristo?
16 Ka in gi geno mar dak e piny e bwo Pinyruodh Nyasaye, ere kaka inyalo nyiso ni in osiep owete Kristo? We wanon ane yore adek kende sani. Mokwongo, en kuom tiyo tij lendo gi chunyi duto. Kristo nochiko owetene mondo oland wach maber e piny mangima. (Math. 24:14) Kata kamano, owete Kristo modong’ e piny sani ok nyal tiyo tijni ka ok okonygi gi owetegi ma gin rombe mamoko. Kuom adier, kinde moro amora ma jokanyo mag rombe mamoko tiyo tij lendo, gikonyo owete Kristo chopo tich maler mar Nyasaye ma ne omigi. Kweth mar jatichno mogen kendo mariek mor ahinya gi osiep minyisogi e yo ma kama, mana kaka Kristo bende.
17 Yo machielo ma jogo manie kweth mar rombe mamoko nyalo konyo godo owete Kristo, en kuom chiwo mwandugi e riwo lwedo tij lendo. Yesu nojiwo jolupne mondo omak osiep ka gitiyo gi ‘mwandu ma ok kare.’ (Luka 16:9) Mano ok nyis ni wanyalo ng’iewo osiep e kindwa gi Yesu kata Jehova. Kar mano, ka watiyo gi mwanduwa mondo wakonygo e tije mag Pinyruoth, wanyiso hera koda osiep ma wan-go, ok mana e wach, to koda “gi tich, kendo gi adiera.” (1 Joh. 3:16-18) Wachiwo kony ma kamano sama watiyo tij lendo, sama wachiwo mich mag pesa ne tije mag gedo kendo uro kuondewa mag romo, koda ka wagolo chiwo mag pesa ne tij lendo madhi nyime e piny mangima. Kata bed ni chiwo marwa tin kata duong’, kuom adier Jehova kaachiel gi Yesu mor gi chiwo mwatimo gi chuny mamor.—2 Kor. 9:7.
18. Ang’o momiyo onego waluw weche ma jodong-kanyakla chikowago koa e Muma?
18 Yo mar adek ma waduto wanyalo nyiso godo ni wan osiepe Kristo, en kuom riwo lwedo yore ma jodong-kanyakla tayowago. Jodongogi gin joma Kristo oketo e migepegi kokalo kuom roho maler. (Efe. 5:23) Jaote Paulo nondiko kama: ‘Winjuru joma tayou, kendo migiuru duong’.’ (Hib. 13:17) Seche moko wanyalo yudo ka tek luwo wach moro moa e Muma ma omiwa gi jodongo manie kanyaklawa. Nyalo bedo ni wang’eyo nyawo ma gin-go, kendo mano nyalo miyo kik wakaw puonj ma gimiyowa e yo makare. Kata kamano, Kristo ma e Wi kanyakla, pod mor ahinya tiyo gi jodongogo ma gin dhano morem. Kuom mano, kaka waluwo yore ma gichikowa godo, nyalo loso kata ketho osiep manie kindwa gi Kristo. Ka ok wang’i mana nyawo ma jodongo ni godo, kendo luwo gi mor yore ma gitayowago, wanyiso gadier ni kare wan osiepe Kristo.
Kama Wanyalo Yudoe Osiepe Mabeyo
19, 20. Gin osiepe machalo nade mwanyalo yudo ei kanyakla, to ang’o mwabiro nono e sula maluwo?
19 Yesu pod dhi nyime ritowa ok mana kokalo kuom jokwath matayowa e yor hera, to bende kuom chiwonwa mine, owete koda nyiminewa ei kanyakla. (Som Mariko 10:29, 30.) Kane eka ichako chokori gi oganda Jehova, ere kaka wedeni ne okawo wachno? Wageno ni ne giriwi lwedo kuom kinda mari mar sudo machiegni gi Nyasaye kod Kristo. Kata kamano, Yesu nochiwo siem ni seche moko “wasik ng’ato nobed mana joode owuon.” (Math. 10:36) Mano kaka en gima kelonwa hoch, ng’eyo ni ei kanyakla wanyalo yudo jogo mabiro padore kodwa maloyo kata mana owadwa masie!—Nge. 18:24.
20 Mana kaka mos ma Paulo nooro e giko barupe ne kanyakla mar Rumi nyiso, ne en gi osiepe mang’eny. (Rumi 16:8-16) Jaote Johana notieko barua mare mar adek kowacho kama: “Mosna osiepewa ng’ato ka ng’ato gi nyinge.” (3 Joh. 14) Nenore maler ni en bende ne obedo gi osiep masiko gi ji mathoth. Ere kaka wanyalo luwo ranyisi mar Yesu koda jopuonjre mokwongo kuom wach gero kendo rito osiep maber manie kindwa gi owete koda nyiminewa ma Jokristo? Sula maluwo mae biro chiwo dwoko kuom penjoni.
Inyalo Dwoko Nade?
• Yesu noketo ranyisi mane kuom bedo osiep maber?
• Ere kaka jopuonjre ne orwako osiep ma ne nie kindgi gi Yesu?
• Ere kaka wanyalo nyiso gadier ni wan osiepe Kristo?
[Penjo mag Puonjruok]
[Picha manie ite mar 21]
Yesu ne dewo paro ma osiepene ne nigo, koda kaka ne giwinjo e chunygi
[Picha manie ite mar 23]
Ere kaka wanyalo nyiso ni wagombo bedo osiepe Kristo?