Lamo Magi Nyiso Ang’o Kuom Winjruokni gi Jehova?
Lamo Magi Nyiso Ang’o Kuom Winjruokni gi Jehova?
‘A in ma iwinjo kwayo mar ji, ji duto nobi iri.’—ZAB. 65:2.
1, 2. Ang’o momiyo jotich Jehova nyalo bedo gi chir mar wuoyo kode e lamo?
KINDE duto Jehova winjo lamo mag jotichne mochung’ motegno. Wanyalo bedo gadier ni owinjowa. Kata kapo ni tara gi tara mag Joneno mag Jehova duto oyiero mar wuoyo gi Nyasaye e lamo riat, Jehova pod biro winjo kwayo margi ng’ato ka ng’ato.
2 Ka en gadier ni Nyasaye nowinjo kwayo mage, Daudi jandik-zaburi nowero niya: ‘A in ma iwinjo kwayo mar ji, ji duto nobi iri.’ (Zab. 65:2) Jehova nodwoko lamo mag Daudi nikech nomakore motegno e tiyone. Wanyalo penjore wawegi kama: ‘Be lamo maga nyiso ni aketo geno kuom Jehova, kendo ni tiyo ne Jehova e gima duong’ ahinya e ngimana? Lamo maga nyiso ang’o kuoma?’
Wuo gi Jehova e Lamo Kinyiso Bolruok
3, 4. (a) Onego wadhi ir Nyasaye e lamo ka wan gi chuny manade? (b) Ang’o monego watim kapo ni wan gi ‘parruok’ kuom richo moro mwatimo?
3 Mondo omi wayud dwoko mag lamowa, nyaka wadhi ir Nyasaye ka wabolore. (Zab. 138:6) Onego wakwa Jehova mondo ononwa, mana kaka Daudi notimo kane owacho niya: ‘A Nyasaye, ranga, ing’e chunya. Tema, ing’e weche maparo, kendo ine ka nitie gimoro marach e chunya, kendo telna e yo ma nyaka chieng’.’ (Zab. 139:23, 24) Kik wawuo awuoya gi Nyasaye e lamo kende, to bende wayie mondo ononwa kendo wayie tiyo gi puonj manie Wachne. Jehova nyalo tayowa ‘e yorno ma nyaka chieng’,’ ka okonyowa luwo kit ngima materowa e ngima mochwere.
4 To nade ka wan gi weche makelonwa ‘parruok’ kuom richo moro maduong’ mwatimo? (Som Zaburi 32:1-5.) Temo kweyo chuny ma nigi bura nyalo mayowa teko, mana kaka yath two e kinde oro nikech liet mager. Nikech richone, Daudi nolalo ilo ma ne en-go, kendo nyalo bedo kata ni nobedo matuwo. To mano kaka chunye nogonyore bang’ elo richone e nyim Nyasaye! Par ane kuom ilo ma Daudi nobedogo bang’ ng’eyo ni ‘ne owene timne marach,’ kendo ni Jehova ne oseng’wonone. Ka ng’ato ohulo ne Nyasaye richone, mano nyalo gonyo chunye e okang’ matin, kendo kony ma jodongo ma Jokristo chiwo biro konye e loso winjruokne gi Jehova.—Nge. 28:13; Jak. 5:13-16.
Sayo Nyasaye Kendo Goyone Erokamano
5. Tiend sayo Jehova en ang’o?
5 Kapo ni wan gi parruok ahinya nikech wach moro, onego wati gi puonj ma Paulo nochiwo niya: “Kik uparru e wach moro, to e weche duto umi Nyasaye ong’e gik mudwaro, kulemo, kusayo, kendo kugoyone erokamano.” (Fili. 4:6) Tiend “sayo” en “kwayo gi chuny mamuol manyiso bolruok.” To moloyo, onego wakwa kony ma Jehova chiwo e kinde chandruok kata sama wan e bwo sand.
6, 7. Gin ang’o momiyo onego wago erokamano bende e lamowa?
6 Kata kamano, kapo ni walemo mana sama wadwaro gimoro, mano biro nyiso ang’o kuom paro manie chunywa? Paulo nowacho ni onego water kwayo magwa ir Nyasaye ka ‘wagoyone erokamano’ bende. Kuom adier, nitie gik momiyo onego wago erokamano kaka Daudi ma nowacho kama: ‘A Jehova, duong’ en mari, gi teko, gi pak, gi loch, gi luor: nimar gik moko duto man e polo gi piny gin meki. A Jehova, pinyruoth en mari, kendo oting’i malo ka jatelo kuom gik moko duto. Nyasachwa, wagoni erokamano, kendo wapako nyingi maduong’.’—1 Weche 29:11-13.
7 Yesu nogoyo ne Nyasaye erokamano kuom chiemo, mkate, koda divai ma ne oti godo e nyasi mar Chiemb Odhiambo mar Ruoth. (Math. 15:36; Mari. 14:22, 23) Kaachiel gi nyiso chuny mar erokamano, onego ‘wapak Jehova’ nikech “honini mage motimo ni nyithind ji,” nikech ‘buchene mong’ado mochikore tir,’ kendo nikech wachne, kata otene masani yudore ei Muma.—Zab. 107:15; 119:62, 105.
Lem ne Jomoko
8, 9. Ang’o momiyo onego walem ne Jokristo wetewa?
8 Onge kiawa ni wahinyo lemo kuom wechewa wawegi, to kata kamano onego walem ne jomoko bende—moriwo nyaka Jokristo maok wang’eyo kata nyingegi. Kata obedo ni jaote Paulo ne ok ong’eyo Jokristo duto ma ne ni Kolosai, nondiko kama: “Wagoyo erokamano ni Nyasaye, Wuon Ruodhwa Yesu Kristo, ndalo duto kwalamonu, nikech wasewinjo ni uyie kuom Kristo Yesu, kendo ni uhero jo maler duto.” (Kol. 1:3, 4) Paulo bende nolamo ne Jokristo man Thessalonika. (2 Thes. 1:11, 12) Lamo kaka mago nyiso maler kaka chunywa chalo koda paro ma wan-go kuom owete gi nyiminewa e yie.
9 Lamowa ne Jokristo mowal koda ne jowetegi ma gin ‘rombe mamoko’ nyiso hera mwaherogo riwruok mar oganda Nyasaye. (Joh. 10:16) Paulo nokwayo Jokristo wetene mondo gilem eka gibed gi nyalo mar ‘hulo wach ma ne oumno manie wach maber.’ (Efe. 6:17-20) Be wan wawegi walemo ne Jokristo mamoko e yo machalo kamano?
10. Lemo ne jomoko nyalo konyowa nade?
10 Lemo ne jomoko nyalo loko paro ma wan-go kuomgi. Ka walemo ne ng’at maok en osiepwa ahinya, ere kaka dwawe here? (1 Joh. 4:20, 21) Lamo machalo kama gero kendo jiwo winjruokwa gi owetewa. E wi mano, lamo ma kamago nyiso ni wan gi hera kaka mar Kristo. (Joh. 13:34, 35) Kido mar hera en achiel kuom nyak mar roho mar Nyasaye. Be wawegi walamo ka wakwayo roho maler, kendo kwayo Jehova mondo okonywa nyago kido kaka hera, mor, kuwe, horuok, miwafu, ng’wono, bedo adiera, muolo, kod ritruok? (Luka 11:13; Gal. 5:22, 23) Ka en kamano, wechewa koda timbewa biro nyiso ni wawuotho kendo wadak kuom roho.—Som Jo Galatia 5:16, 25.
11. Ang’o momiyo inyalo wacho ni kwayo jomoko mondo olemnwa en gima owinjore?
11 Ka wafwenyo ni nyithindwa donjo e obadho mar kwalo penj e skul, onego walemnegi, ka watiyo bende gi Ndiko mondo omi gitim gik moko e yo ma ratiro kendo kik gitim gimoro amora maok kare. Paulo nowacho ne Jokristo man Korintho kama: “Walamo Nyasaye ni kik utim gimoro marach.” (2 Kor. 13:7) Lamo manyiso bolruok kamano moro Jehova kendo ginyiso chuny makare ma wan-go. (Som Ngeche 15:8.) Wanyalo kwayo jomoko mondo olemnwa mana kaka jaote Paulo notimo. Nondiko kama: “Meduru lamonwa, nimar wang’eyo adier ni waonge gimoro ma chunywa ketonwae bura; wadwaro wuotho makare e weche duto.”—Hib. 13:18.
Gik Mamoko ma Lamowa Nyiso Kuomwa
12. Gin weche mage monego obed motelo e lamowa?
12 Be lamowa nyiso ni wamor kendo ni wan jokinda kaka Joneno mag Jehova? Be lamowa jiwo ahinya wach timo dwaro mar Nyasaye, yalo wach Pinyruoth, nyiso kaka Jehova ema owinjore bedo jaloch, koda wach pwodho nyinge mondo obed maler? Magi gin weche monego okaw thuolo motelo e lamowa, mana kaka lamo mar ranyisi ma Yesu nochiwo konyowa ng’eyo, nimar ochako gi wechegi: “Wuonwa manie polo, nyingi mondo obed maler, pinyruodhi mondo obi, gi midwaro mondo otimre e piny kaka e polo.”—Math. 6:9, 10.
13, 14. Lamowa nyiso ang’o kuomwa?
13 Weche ma wakwayo Nyasaye e lamo nyiso paro ma wan-go, gigo mwahero, koda gombo manie chunywa. Jehova ong’eyo ni wan joma chalo nade e chunywa ma iye. Ngeche 17:3 wacho niya: “Agulu mar theth iyienyogo fedha, mach mager ilenyee dhahabu; to Jehova e [“ma nono,” NW] chuny ji.” Nyasaye neno gigo manie chunywa. (1 Sam. 16:7) Ong’eyo paro ma wan-go kuom chokruogewa, tijwa mar lendo, koda kuom owete gi nyiminewa. Jehova ong’eyo paro ma wan-go kuom ‘owete’ Kristo. (Math. 25:40) Ong’eyo ka gadier wagombo bedo gi gino ma wakwayo e lamo, kata ka wanwoyo anwoya weche goyiem. Yesu nowacho niya: “Kulemo, kik uthor wacho weche manono, kaka jo ma ok oyie; ma paro [e yo maok kare] ni nowinjgi nikech wechegi ng’eny.”—Math. 6:7.
14 Weche mwawacho e lamo bende nyiso okang’ mwagenogo Nyasaye. Daudi nowacho kuom Jehova niya: “Isebedona kar geng’ruok, ot matek ma idho malo e nyim wasigu. Anadag e i tabanakel mari nyaka chieng’: anabwog e tipo mar buombeni.” (Zab. 61:3, 4) E yor ranyisi, sama Nyasaye ‘umowa gi duong’ne,’ wayudo rit mare majaber. (Fwe. 7:15) Mano kaka sudo machiegni gi Jehova e lamo ka wan gadier ni obiro ‘doknwa’ ka wan e bwo tem moro amora mar yiewa, en gima hoyo chunywa!—Som Zaburi 118:5-9.
15, 16. Lamo nyalo konyowa ng’eyo weche mage e wi gombowa mar yudo migepe moko e tij Nyasaye?
15 Wuoyo gi Jehova e lamo e yo matir kuom gombo ma wan-go e chunywa, nyalo konyowa ng’eyo adiera kuomgi. Kuom ranyisi, be en adier ni gombo mar bedo gi migawo mar tayo oganda Nyasaye en gombo manyiso chuny mar konyo, kendo timo duto mwanyalo e tij lendo koda ei kanyakla? Koso dibed ni wadwaro mana bedo ‘jotelo’ kata “tiyo gi loch” kuom jomoko? Mano ok e kaka weche onego obed e kind jogo ma gin oganda Jehova. (Som 3 Johana 9, 10; Luka 22:24-27.) Kapo ni wan gi gombo maok kare, wuoyo gi Jehova Nyasaye e lamo e yo ma ratiro nyalo elo gombogo kendo konyowa lokogi kapok gigurore motegno e chunywa.
16 Mon ma Jokristo nyalo bedo gi gombo mar mondo chwogi oti e migawo mar jokony-tich e kanyakla, kata gikone tiyo e migawo mar jorit, tiende ni jodong-kanyakla. Nyiminego nyalo timo gik moko kaluwore gi gombo ma gihulo e lamo maggi giwegi, kuom bedo gi timbe mabeyo e ngimagi. Mani en gima dwarore ahinya nimar weche koda timbe jood ng’ato, chiko yo ma kanyakla nenego.
Lemo e Lela e Lo Jomoko
17. Ang’o momiyo ber bet kama okuwe sama wadwaro lemo kar kendwa?
17 Kinde mang’eny, Yesu ne weyo oganda, mondo odhi owuo gi Wuon mare e lamo ka en kar kende. (Math. 14:13; Luka 5:16; 6:12) Wan bende onego wabed gi kinde ma wan kendwa. Wuoyo gi Nyasaye e lamo ka wan kama okuwe nyalo miyo wabed joma ng’ado paro mamoro Jehova, kendo nyalo miyo wachung’ motegno e lame. Kata kamano, Yesu bende ne lemo e lela, omiyo ber nono kaka wanyalo timo mae e yo makare.
18. Gin weche mage ma owete onego oket e paro sama giwuoyo gi Nyasaye e lamo mitimo e lela e lo jomoko?
18 E chokruogewa, chwo mowinjore wuoyo gi Nyasaye e lamo mitimo e lela e lo kanyakla. (1 Tim. 2:8) E giko mar lamo ma kamano, Jokristo wetegi onego owach ni “amin,” tiende ni “obed kamano.” Kata kamano, mondo omi giwach kamano, nyaka giyie gi weche mowachi. E lamo ma Yesu nochiwo kaka ranyisi, ok wayudie weche manyalo bwogo kata chwanyo ng’ato. (Luka 11:2-4) E wi mano, ok nowuoyo kuom weche duto mamulo ng’ato ka ng’ato kuom jowinjo. Ber hulo weche ma korka ka ng’ato, sama wawuoyo gi Nyasaye e lamo kar kendwa, to ok e lamo mitimo e lela. Kendo sama wawuoyo gi Nyasaye e lela e lo jomoko, ok onego wawuo kuom weche mowinjore owach ling’ling’.
19. Ere kaka onego wabed sama ichiwo lamo mitimo e lela?
19 Sama itelonwa e lemo mitimo e lela, dwarore ni wanyis kido mar ‘luoro Nyasaye.’ (1 Pet. 2:17) Nitie gik manyalo bedo kare ka otimgi kamoro machielo mopogore gi kar chokruok mar Jokristo. (Ekl. 3:1) Kuom ranyisi, wawach ni ng’ato dwaro ni jomoko obed kanyachiel ka ng’ato ka ng’ato kuomgi omako lwet nyawadgi e sama itimo lamo ma kamano. Mae nyalo chwanyo jomoko kata golo pachgi kuom lamo michiwo, moriwo koda welo mobiro. Nitie jomoko mokendore manyalo mako lwetegi ling’ling’, to kapo ni gikwakore sama ichiwo lamo mitimo e lela, joma oneno tim ma kamano nyalo chwanyore. Ginyalo paro ni joma okendorego ne keto pachgi kuom osiep margi kaka dichwo gi dhako, to ok kuom luor monego gimi Jehova. Nikech luor matut monego wami Jehova, weuru mondo watim “duto ni duong’ mar Nyasaye,” kendo wawere gi tim manyalo bwogo kata chwanyo ng’ato.—1 Kor. 10:31, 32; 2 Kor. 6:3.
Onego Walam ka Wakwayo Ang’o?
20. Inyalo lero nade weche manie Jo Rumi 8:26, 27?
20 Nitie seche maok wanyal ng’eyo weche monego wati godo e lamo mwatimo kendwa wawegi. Paulo nondiko niya: ‘Nikech ok wang’eyo lemo kaka owinjore; to roho owuon kwayonwa kochur ahinya matamore wacho. Kendo Nyasaye ma ema nono chuny ong’eyo paro mar roho.’ (Rumi 8:26, 27) Jehova nomiyo ondik lamo mang’eny e Ndiko. Sama watiyo gi lamogo, Jehova yie kodgi kendo okawogi kaka kwayo ma wan wawegi wachiwo, omiyo ochopogi. Nyasaye ong’eyowa kaachiel gi weche ma nomiyo jondiko mag Muma ondiko kokalo kuom muche. Jehova dwoko lamowa seche ma roho “kwayonwa.” Kata kamano, kaka wamedo ng’eyo Wach Nyasaye e yo maber, e kaka weche monego wati godo e lamo biro bironwa e paro e yo mayot.
21. En wach mane mwabiro nono e sula maluwo?
21 Mana kaka wasepuonjore, lamowa nyiso weche mang’eny kuomwa. Kuom ranyisi, lamowa nyalo nyiso okang’ ma wasesudogo machiegni gi Jehova koda lony ma wan-go kuom Wachne. (Jak. 4:8) E sula maluwo, wabiro nono lamo moko koda weche ma ne oti godo e lamo mondiki ei Muma. Timo nonro ma kamano ei Ndiko biro konyowa nade e wach wuoyo gi Nyasaye e lamo?
Inyalo Dwoko Nade?
• Onego wadhi ir Jehova e lamo ka wan gi chuny manade?
• Ang’o momiyo onego walem ne Jokristo wetewa?
• Lamo magwa nyalo nyiso ang’o kuomwa koda kuom paro manie chunywa?
• Ere kaka onego wabed sama ichiwo lamo e lela e lo jomoko?
[Penjo mag Puonjruok]
[Picha manie ite mar 11]
Be pile ipako kendo goyo erokamano ne Jehova?
[Picha manie ite mar 13]
Kaka wabet e seche michiwo lamo mitimo e lela onego omi Jehova duong’