Roho Maler En Teko Madwarore e Ngimani

“KIK iwita aa e nyimi; kendo kik igol kuoma roho mari maler.” (Zaburi 51:11) Mani e lamo ma Ruoth Daudi nochiwo bang’ kane osetimo richo moro maduong’.

Kinde mang’eny, Daudi ne neno kaka teko roho maler ne tiyo e ngimane. Kane pod en rawera, rohono ne okonye nego Goliath—jalweny ma ji noluoro ahinya. (1 Samuel 17:45-50) Rohono bende ne omiye teko mar ndiko moko kuom zaburi mabeyo ahinya kuom mago ma nondiki. Daudi nolero niya: “Muya [“roho,” New World Translation] mar Jehova nowuoyo kuoma, wachne e ma nobedo e dhoga.”—2 Samuel 23:2.

Yesu Kristo owuon nonyiso kaka roho maler ne otiyo e ngima Daudi. Chieng’ moro, Yesu nowacho ne jowinjone kama: ‘Daudi owuon kuom roho maler nowacho ni, “Jehova noluwo ni Ruodha niya: ‘Bed piny e bada korachwich, nyaka aket wasiki e bwo tiendi.’”’ (Mariko 12:36; Zaburi 110:1) Yesu nong’eyo ni e kinde ma Daudi nondiko zaburine, ne otelne gi roho maler. Be roho malerno konyowa wan bende?

“Kwauru, Eka Nomiu”

Nyalo bedo ni ok ibi ndiko zaburi ngang’. Kata kamano, inyalo yudo chandruoge madongo mogangore kaka Goliath. Kuom ranyisi, par ane wach Isabel. * Chwore noweye, mi chwore nodhi okawo dhako machielo mapod tin. Noweyo Isabel gi  gope madongo, kendo ne ok okonye gi pesa mondo orit godo nyigi ariyo matindo. Isabel wacho kama: “Naneno ni ondhoga kendo okawa ka nono. Kata kamano, chakre oweya, aseneno kaka roho maler mar Nyasaye oserita.”

Be Isabel ne geno yudo roho maler ka onge gimoro amora motimo? Ooyo, nosayo Nyasaye pile ka pile mondo oorne roho mare. Ne ong’eyo ni teko Nyasaye ne dwarore mondo obed gi chir mar nyagruok gi ngimane, rito nyithinde e yo maber, kendo e duogo chunye mondo kik onenre ka gima en ka nono. Noluwo weche ma Yesu nowacho niya: “Kwauru, eka nomiu; dwaruru, eka ununwang’; dwong’uru, eka noyawnu.”—Mathayo 7:7.

Roberto bende noneno ni roho mar Nyasaye ne dwarore kuome, to mak mana ni en ne odware nikech weche mamoko mopogore. Ne obedo misumba mar madho ndawa koda yedhe mamero. Kuom higini ariyo duto, ne okedo mondo owere gi gigo, to ne odokie kinde ka kinde. Roberto lero kama: ‘Sama ng’ato oweyo tiyo gi yedhe mamero, obedo gi kibaji mang’eny, kendo dende siko ka gombo madhogi pile ka pile.’

Roberto medo wacho kama: “Kata kamano, nang’ado e chunya mar loko ngimana mondo ati ne Nyasaye e yo moyie godo. Natemo pong’o pacha gi paro mabeyo mowuok ei Muma. Ne awuoyo gi Nyasaye e lamo gi chunya duto pile ka pile ka akwaye mondo omiya teko mar loko kit ngimana obed maler. Nang’eyo ni ok ne anyal timo kamano gi tekona awuon. Kendo ne aneno kaka Jehova nodwoko kwayona, to ahinya wuon e sechego ma ne chunya winjo malit bang’ dok e tim madho gigo. An gadier ni roho maler mar Nyasaye ne miya teko manyien; nimar ka dine bed ni ok omiya rohone, dine ok aweyo timno.”—Jo Filipi 4:6-8.

Idho Malo “gi Buombe Kaka Ongoye”

Mana kaka Isabel gi Roberto, Joneno mag Jehova tara gi tara oseneno kaka teko mar roho maler tiyo e ngimagi. Teko ma Jehova tiyogo—ma ne otiyo godo e chweyo gik moko duto e piny gi polo—en teko ma in bende inyalo yudo ka idwaro. Nyasaye oikore mar miyi roho mare ka ikwaye gi kinda. Kata kamano, mondo iyud rohono, dwarore ni ing’e adier kuom Nyasaye, kendo imany timo dwache gi chunyi duto.—Isaiah 55:6; Jo Hibrania 11:6.

Ka in e bwo teko mar roho maler, inyalo yudo teko mar tiyo ne Nyasaye e yo maber, kendo mar nyagruok gi chandruok moro amora manyalo bironi e ngima. Mani e gima Muma singonwa: ‘Jehova miyo jo mool teko; kendo jalo ma onge gi teko omiye teko momedore. Jo marito kuom Jehova tekogi noduogi. Giniidh malo gi buombe kaka ongoye; giniring to ok gininyosre; giniwuothi to ok giniol.’—Isaiah 40:28-31.

[Weche moler piny]

[Weche manie ite mar 8]

‘Ne awuoyo gi Nyasaye e lamo gi chunya duto pile ka pile ka akwaye mondo omiya teko. Nang’eyo ni ok ne anyal timo kamano gi tekona awuon. Kendo ne aneno kaka Jehova nodwoko kwayona’

 [Sanduk/Picha manie ite mar 7]

KAKA ROHO MALER TIYO

Nyasaye notiyo gi roho maler e chweyo gik moko duto e piny koda polo. Jandik-zaburi nowacho kama: “A Jehova tije magi ng’eny ahinya! Isechweyogi duto gi rieko: mwanduni opong’o piny. . . . Ioro roho mari, mi ochwegi.”—Zaburi 104:24, 30; Chakruok 1:2; Ayub 33:4.

Roho maler notelo ne jogo ma noluoro Nyasaye e ndiko Muma. Jaote Paulo nondiko kama: “Ndiko duto mowuok kuom much Nyasaye, konyo.” (2 Timotheo 3:16) Much Jehova, tiende ni roho mare, ema notayo pach jondik-Muma, omiyo ne gindiko ‘wach Nyasaye.’—1 Jo Thessalonika 2:13.

Roho maler nomiyo jotich Nyasaye teko mar koro kinde mabiro e yo makare chuth. Jaote Petro nolero kama: ‘Weche duto mokor manie Ndiko, dhano ok lok tiendgi kaka oparo owuon, nikech wach mokor ne ok obiro kuom dwaro mar dhano ngang’, to ji ne wacho wach moa kuom Nyasaye, kaka roho maler ne telonigi.’—2 Petro 1:20, 21; Joel 2:28.

Roho maler nokonyo Yesu koda joma moko ma ne nigi yie, e lando wach maber mar Pinyruodh Nyasaye koda e timo honni. Yesu nowacho kama: ‘Roho mar Jehova ni kuoma, nikech osewira gi mo mondo ayal wach maber ni jo modhier, noora mond ahul gony ni jo motue, kendo ahul yepo mar wang’ ni muofni, mondo ogony ji misando.’—Luka 4:18; Mathayo 12:28.

 [Sanduk/Picha manie ite mar 9]

YORE MA ROHO MALER NYALO KONYOWAGO

Roho maler nyalo tegi mondo ilo tembe koda timbe manyalo hinyi. Jaote Paulo nowacho niya: “Nyasaye en Jadier, kendo ok noyie mondo otemu moloyo tekreu; to e temruokno nomiugo bende yo mar wuok, mondo unyal dhilie.”—1 Jo Korintho 10:13.

Roho maler nyalo konyi nyago kido ma moro Nyasaye. ‘Nyak mar roho en hera, mor, kuwe, horuok, miwafu, ng’wono, bedo adiera, muolo, ritruok.’—Jo Galatia 5:22, 23.

Roho maler nyalo miyi teko mar nano e bwo tembe. “Anyalo timo gik moko duto kuom en ma miya teko.”—Jo Filipi 4:13.