Roho Maler En Ang’o?

KINDE moro Yesu nopenjo jopuonjrene kama: ‘Ere ng’ato kuomu ma wuon nyathi, ma ka wuode okwaye rech, domiye thuol kar rech? Kata ka okwaye tong gweno, domiye okela?’ (Luka 11:11, 12) Nyithind Galili nohero chamo tong’ koda rech, omiyo ne ging’eyo kit chiemo ma ne gidwaro.

Yesu nowacho ni onego wasik ka wakwayo mondo omiwa roho maler, mana kaka nyathi makwayo chiemo sama kech kaye. (Luka 11:9, 13) Ng’eyo gima roho maler en biro miyo wang’e kaka onyalo konyowa e ngima. Omiyo weuru wanon ane mokwongo gima Muma puonjowa kuom roho maler.

“Teko mar Ng’a Mamalo Chutho”

Ndiko nyiso maler ni roho maler en teko ma Nyasaye tiyo godo e chopo dwaro mare. Kane malaika Gabriel onyiso Mariam ni ne obiro nyuolo nyathi mawuowi kata obedo ni Mariam ne pok ong’eyo dichwo, malaika nowachone niya: “Roho Maler nobi kuomi, kendo teko mar Ng’a Mamalo Chutho noumi. E momiyo nyathi mibiro nywolo bende noluong ni maler, Wuod Nyasaye.” (Luka 1:35) Kaluwore gi weche ma Gabriel nowachogo, nitie tudruok e kind roho maler kod “teko mar Ng’a Mamalo Chutho.”

Paro ma kamano bende yudore kuonde mamoko ei Muma. Janabi Mika nowacho kama: “Kuom roho mar Jehova atek chutho.” (Mika 3:8) Yesu nosingone jopuonjre mage niya: ‘Unuyud teko ka roho maler obiro kuomu.’ (Tich Joote 1:8) To jaote Paulo bende nowuoyo konyiso ni nitie ‘teko mar roho maler.’—Jo Rumi 15:13, 19.

Kuom mano, ang’o mwanyalo wacho kaluwore kod gigo mowach malo kaegi? Nitie tudruok maduong’ e kind roho maler kod teko mar Nyasaye. Roho maler e yo ma Jehova tiyogo e nyiso tekone. Kokete e yo mayot, roho maler en teko ma Nyasaye tiyogo. To mano kaka en teko miwuoro! Pachwa ok nyal ng’eyo chuth kar romb teko ma ne oti godo e chweyo piny gi polo mangima. Kokalo kuom janabi Isaya, Jehova nojiwowa mondo wapar kama: “Ting’uru wang’u malo, une ng’a mosechweyo magi, magolo ogandagi kokwano kar rombgi: oluongogi gi duto gi nying’; kuom duong’ mar tekone, kendo ni kech tek to tek, onge moro ma onge.”—Isaiah 40:26.

Omiyo, Muma nyiso ni gik moko duto e piny koda e polo kaachiel gi tudruok manie iye, en nikech ‘teko,’ mar Nyasaye Manyalo Duto. En adier ni, teko mar Nyasaye ng’eny miwuoro, kendo ngimawa otenore kuom tekono.—Ne sanduk mondik ni “Kaka Roho Maler Tiyo.”

Jehova nyalo tiyo gi roho mare maler e yo malach, mana kaka notimo kane ochweyo gik moko duto e piny gi polo. Kata kamano, onyalo tiyo kode bende e konyo  chwechne ma dhano. Muma oting’o ranyisi mang’eny manyiso kaka roho maler mar Nyasaye ne miyo jotichne me piny teko.

‘Roho mar Jehova ni Kuoma’

Tij lendo ma Yesu notimo konyowa ng’eyo kaka roho maler mar Nyasaye nyalo miyo jotichne teko. Yesu nowacho ne Jo-Nazareth kama: “Roho mar [Jehova] ni kuoma.” (Luka 4:18) Gin tije mage ma Yesu notimo kuom ‘teko mar roho’? (Luka 4:14) Ne ochango kit tuoche duto, nokweyo apaka me nam, nomiyo ji gana gi gana makate kod rech matin, kendo ne ochiero koda jo motho. Jaote Petro nowuoyo kuom Yesu  kaka ‘ng’at ma Nyasaye nonyisogi ni oyiego, kuom honni gi tije miwuoro gi ranyisi ma ne Nyasaye otimo kode e kindgi.’—Tich Joote 2:22.

Roho maler ok mi ji teko mar timo honni machalo kamago e kindegi. Kata kamano, onyalo timonwa gik mabeyo miwuoro. Jehova miyo jogo malame roho maler mana kaka Yesu nosingo ne jopuonjrene. (Luka 11:13) Omiyo, jaote Paulo ne nyalo wacho kama: “Anyalo timo gik moko duto kuom en ma miya teko.” (Jo Filipi 4:13) Be in bende roho maler nyalo timoni kamano? Sula maluwo biro dwoko penjono.

[Sanduk/Picha manie ite mar 5]

Gimomiyo Roho Maler Ok En Ng’ato

Muma pimo roho maler gi pi. Kane osingo ne joge gweth mag kinde mabiro, Nyasaye nowacho kama: “Anami pi oonj kuom piny motuwo, gi aore bende kuom lowo motuwo: anami [roho mara] odonj kuom kothi, anami nyithindi hawi moa kuoma.”—Isaiah 44:3.

Sama Nyasaye olo roho mare kuom jotichne, ‘gipong’ gi roho maler.’ Iwuoyo kuom Yesu, Johana Jabatiso, Petro, Paulo, Barnaba koda jopuonjre ma ne ochokore kanyachiel chieng’ Pentekost e higa 33 E Ndalowa, kaka joma roho maler ne opong’o.—Luka 1:15; 4:1; Tich Joote 4:8; 9:17; 11:22, 24; 13:9.

Par ane wachni: Dabed ni roho maler en ng’ato, be inyalo ‘ole’ e wi ji mang’eny mopogore opogore? Be inyalo wach ni ng’ato achiel nyalo ‘pong’o’ oganda ji mochokore? Mano ok en paro mowinjore. Muma wuoyo kanyiso ni inyalo pong’ ji gi rieko, nyalo mar ng’eyo tiend weche, kata mana pong’ogi gi ng’eyo malong’o, to kata kamano ok onyis ngang’ ni dhano inyalo pong’ gi ng’at machielo.—Wuok 28:3; 1 Ruodhi 7:14; Luka 2:40; Jo Kolosai 1:9.

Wach moloki kowuok e dho Grik ni “roho,” en pneuʹma ma bende chiwo paro mar teko ma ok ne. Kaluwore gi Expository Dictionary of New Testament Words ma ogo kod Vine, pneuʹma en wach ma “tiende masie en yamo . . . bende muya; kae to ahinya wuon en roho, ma bende mana kaka yamo, ok nyal nene gi wang’, oonge kido kendo en gi teko.”

Kuom adier, nenore maler ni roho maler ok en ng’ato. *

[Weche moler piny]

[En mar]

Photodisc/​SuperStock