Gima Yesu Nopuonjo Kuome Owuon

“Yesu nong’eyo malong’o ni ne en ng’a, noa kanye, gimomiyo nobiro e piny, kod kaka ndalone mabiro ne dhi bedo.”​​—⁠JANDIKO HERBERT LOCKYER.

KAPOK waketo yie kuom gik ma Yesu nopuonjo, onego wang’e gimoro kuome. Yesu ne en ng’a kuom adier? Noa kanye? Ang’o ma noketo mokwongo e ngimane? Buge mag Injili, ma gin Mathayo, Mariko, Luka, kod Johana, konyowa yudo dwoko mag penjogo kokalo kuom weche ma Yesu owuon nowacho.

Ne entie kapok onyuole e piny Kinde moro Yesu nowacho kama: “Ka ne Ibrahim pok obetie, antie.” (Johana 8:⁠58) Ibrahim nodak higini madirom 2,000 kapok onyuol Yesu. Kata kamano, Yesu ne nitie kapok onyuol Ibrahim jal ma ne nigi yie motegno. To kara Yesu nodak kanye? En owuon nowacho kama, “Nalor a e polo.”​​—⁠Johana 6:⁠38.

Wuod Nyasaye Nitie yawuot Jehova mang’eny ma gin malaika. Kata kamano, Yesu to en wuode makende. Yesu nowuoyo kuome owuon kaka “Wuowi ma miderma mar Nyasaye.” (Johana 3:⁠18) Mano nyiso ni Yesu kende ema Nyasaye owuon nochweyo achiel kachiel. Nyasaye nochweyo gik mamoko duto kokalo kuom Wuowi ma midermano.​​—⁠Jo Kolosai 1:⁠16.

“Wuod dhano” Yesu noluongore gi nyingni ding’eny moloyo nying moro amora. (Mathayo 8:⁠20) Omiyo nonyiso ni ok en malaika morwako ringruok mar dhano kata gimoro maok en dhano madier. Kar mano, ne en dhano madier. Kokalo kuom rohone maler, Nyasaye ne odaro ngima Wuode a e polo nyaka e pinyka, momiyo Mariam, nyako mapok nong’eyo dichwo omako ichne. Kuom mano, Yesu nonyuol ka en ng’at makare chuth, ma onge richo.​​—⁠Mathayo 1:⁠18; Luka 1:⁠35; Johana 8:⁠46.

Mesia manosingi Chi Samaria nowacho ne Yesu ni, “Ang’eyo ni Mesia biro.” Yesu nodwoke ni: “An mawuoyo kodi, an e en.” (Johana 4:⁠25, 26) Tiend wach mar “Mesia,” chalo gi mar “Kristo,” matiende ni “Jal Mowir.” Nyasaye owuon ema nowiro Yesu kata yiere mondo oti tich makende e chopo singo mag Nyasaye.

Gima duong’ ma nobiro timo Kinde moro Yesu nowacho kama: “Onego ayal Wach Maber mar pinyruodh Nyasaye e mier moko bende, nikech ma e momiyo noora.” (Luka 4:⁠43) Kata obedo ni notimo ne ji gik mang’eny mabeyo, tij lando Pinyruodh Nyasaye e gima noketo mokwongo e ngimane. Gima nopuonjo e wi Pinyruodhno ibiro wuoye bang’e.

Kuom adier, Yesu ne ok en mana dhano adhana. * Kaka wabiro neno, ngima ma ne en-go e polo nomedo jiwo tiend weche ma nowacho e pinyka. Be en gima onego okawwa gi wuoro ka waneno kaka wach ma nolando mulo ngima ji mang’eny?

[Weche moler piny]