Gima Yesu Nopuonjo e Wi Nyasaye

“Onge ng’ama ong’eyo Wuowi mak mana Wuoro ema ong’eye, bende onge ng’ama ong’eyo Wuoro, mak mana Wuowi kod joma Wuowi omiyo ong’eye.”​​—⁠LUKA 10:⁠22, THE BIBLE IN LUO, 1976.

KAPOK obiro e piny kaka dhano, Wuod Nyasaye makayo notieko higini mang’eny ka en gi winjruok machiegni gi Wuon-gi. (Jo Kolosai 1:⁠15) Omiyo Wuowi nong’eyo paro, yore kod kaka Wuon-gi ne winjo. Bang’ Wuowini biro e piny kama koro ne iluonge ni Yesu, nodwaro ahinya puonjo adiera e wi Wuon-gi. Wanyalo puonjore gik mang’eny kuom Nyasaye ka wawinjo gima Wuowini nowacho.

Nying Nyasaye Yesu nokawo mapek nying Nyasaye ma en Jehova. Omiyo Wuowi ma Nyasaye oheroni ne dwaro ni jomoko ong’e kendo oti gi nying Wuon-gi. Tiend nying Yesu owuon en ni “Jehova en Warruok.” E otieno mogik kapok otho, Yesu nowacho ne Jehova e lamo kama: “Nanyisogi nyingi.” (Johana 17:26) Ok en gima kawowa gi wuoro ni Yesu notiyo gi nying Nyasaye kendo nonyiso jomoko nyingno. Par ane, ere kaka jowinjo mag Yesu ne nyalo ng’eyo adiera e wi Jehova ka ok ging’eyo kata mana nyinge kod gima nyingno ochung’ne? *

Hera maduong’ mar Nyasaye Nitie kinde ma Yesu nowacho ne Nyasaye e lamo kama: “Wuora, . . . nihera ka pok ochak chue piny.” (Johana 17:24) Bang’ ka Yesu noseneno hera mar Nyasaye e polo, notemo ahinya nyiso herano e yore mabeyo mopogore opogore kane en e piny.

Yesu nonyiso ni Jehova nyiso hera e yo malach. Yesu nowacho kama: “Nikech Nyasaye nohero piny ahinya, omiyo nochiwo Wuode ma miderma, mondo ng’a ma oyie kuome kik lal, to obed gi ngima mochwere.” (Johana 3:⁠16) E dho Grik, wach motigo ni “piny” ok en “piny ma dhano odakie.” Kaluwore gi kaka oti kode e ndikono, wachno ochung’ne dhano duto. Hera ma Nyasaye nigo kuom dhano duong’ ahinya ma nomiyo ochiwo Wuode mohero moloyo mondo omi dhano ma nigi yie obed thuolo a e twech mar richo kod tho kendo gibed gi geno mar ngima mochwere. Ok wanyal pimo bor kata tut mar hera maduong’no.​​—⁠Jo Rumi 8:⁠38, 39.

Yesu nojiwo adiera migeno: Jehova ohero ahinya ng’ato ka ng’ato malame. Yesu nopuonjo ni Jehova chal gi jakwath mong’eyo rombene kendo ogeno moro ka moro kuomgi. (Mathayo 18:⁠12-​14) Yesu nowacho ni kata oyundi achiel ok nyal lwar piny ma Jehova ok ong’eyo. Nomedo wacho kama: “Kata mana yie wiu osekwan duto.” (Mathayo 10:⁠29-​31) Ka Jehova nigi nyalo mar ng’eyo ni oyundi achiel onge, donge mano nyiso ni orango kendo orito ahinya ng’ato ka ng’ato malame? Ka Jehova ong’eyo kwan yie wiwa duto, be nitie gimoro e ngimawa​​—⁠obed dwachwa, gigo ma wanyagore timo, kod gigo ma chandowa⁠—⁠maok onyal ng’eyo?

Wuoro me Polo Mana kaka ne waneno e sula motelo, Yesu en Wuod Nyasaye ma miderma. Ok en gima buogowa ka kinde duto Wuowi moherni ne luongo Jehova kendo wuoyo kuome kaka ‘Wuon-gi.’ Kuom adier, e weche Yesu ma nokwong ndiko ma nowacho  ka ojahigini 12, noluongo Jehova ni “Wuonwa.” (Luka 2:49) Wach mar “Wuoro” yudore chiegni ndalo 190 e buge mag Injili. Yesu nowuoyo kuom Jehova e yore mopogore opogore kaka “Wuonu,” “Wuonwa,” kod “Wuora.” (Mathayo 5:⁠16; 6:9; 7:⁠21) Kuom tiyo gi wachno e yore mopogore opogore kamano, Yesu nonyiso ni dhano ma joricho kendo morem nyalo bedo gi winjruok maber gi Jehova.

Ong’won kendo oikore mar weyo richo Yesu nong’eyo ni dhano morem dwarore ni oyud ng’wono mogundho mar Jehova. E ngero ma nogoyo kuom wuowi molal, Yesu noporo Jehova gi wuoro mang’won, moikore weyone wuode moloko chunye richone. (Luka 15:⁠11-​32) Omiyo weche Yesu nyisowa ni Jehova oikore ng’wonone jaricho matimo duto monyalo mondo owe richone. Jehova oikore ng’wonone jaricho moloko chunye. Yesu nolero wachno kama: “Akonu niya, kamano bende mor nobedi e polo kuom jaricho achiel molokore, moloyo kuom ji mabeyo piero ongachiel gi ongachiel ma ok dwar lokruok.” (Luka 15:7) Be nitie ng’ama ok diher sudo machiegni gi Nyasaye mang’wonni?

Jawinj kwayo mag ji E kinde ma ne Yesu pok obiro e piny, noneno owuon ni Jehova en ‘Jawinj kwayo mar ji’ kendo ni omor gi kwayo mag jogo malame. (Zaburi 65:2) Omiyo, kane en e tije mar lendo, Yesu nopuonjo jowinjone kaka onego gilem kod gik ma ginyalo kwayo e lamo. Nowacho kama: “Kik uthor wacho weche manono.” Nojiwo jowinjone mondo olam ni dwaro mar Nyasaye “otimre e piny kaka e polo.” Bende wanyalo kwayo e lamo gik ringruok mochuno, mondo owenwa richowa kendo mondo kik wadonj e tem. (Mathayo 6:⁠5-​13) Yesu nopuonjo ni Jehova winjo lamo mag jotichne kaka wuoro ma jahera kendo omiyogi gigo ma gikwaye gi chunygi duto kendo kuom yie.​​—⁠Mathayo 7:⁠7-​11.

Kuom adier, Yesu notimo matek mondo opuonj adiera e wi Jehova kendo lero ni en Nyasaye machalo nade. Kata kamano ne nitie gimachielo e wi Jehova ma Yesu ne dwaro ahinya nyiso ji​​—⁠yo ma Jehova biro tiyogo e kelo lokruok e piny ngima mondo ochop dwache ne piny kod dhano modak e piny. Kuom adier, mae e wach maduong’ ma Yesu ne lando.

[Weche moler piny]