Josombwa Penjo . . .

 Be Yesu e Mikael Malaika Maduong’?

▪ Koket e yo machuok, dwoko en ee. Tim mar luongo ji gi nying mokalo achiel en gima onya kuom oganda mang’eny. Mano e gima timore gi nyinge mayudore e Muma. Kuom ranyisi, Jakobo jal ma ne oluoro Nyasaye bende iluongo ni Israel. (Chakruok 35:10) Jaote Petro bende nigi nyinge abich mopogore opogore​​—⁠Simeon, Simon, Petro, Kefa, kod Simon Petro. (Mathayo 10:2; 16:16; Johana 1:⁠42; Tich Joote 15:⁠7, 14) Ere kaka wanyalo bedo gadier ni Mikael en nying machielo mar Yesu? Non ane gima Ndiko nyiso.

Nitie kuonde abich ma Muma wuoyoe kuom Mikael, malaika ma nigi teko. Oti kode didek e bug Daniel. E Daniel 10:⁠13, 21, wasomo kuom malaika moro moor ma Mikael konyo, kanyo iluongo Mikael ni “ruodh, jomalaika maduong’,” kendo iluonge ni “ruodhu.” E Daniel 12:⁠1 bende wapuonjore ni e kinde mag giko, “Mikael nochungi, ruoth maduong’ni mobedoe mondo orit jogi.”

Kamachielo ma nying Mikael yudore en Fweny 12:⁠7, mawuoyo kuom “Mikael gi malaikane” ka jokedo e lweny kendo gikone gigolo Satan Jachien kod malaikane maricho e polo.

E weche mowach malogo, ne ni moro ka moro wuoyo kuom Mikael kaka malaika ma jalweny ma kedo ne jo Nyasaye, okedo nyaka gi Satan ma en jasigu maduong’ mar Jehova.

Bug Juda kwan matindo 9 luongo Mikael ni “malaika motelo.” Wach mar “malaika maduong’ ” ok otigo e Muma e yo manyiso ni nitie malaika ma kamago mang’eny. Kamachielo kende e Muma mawuoyo kuom malaika maduong’ yudore e 1 Jo Thessalonika 4:⁠16, ma Paulo wuoyoe kama kuom Yesu mosechier: “Ruoth [Yesu] owuon biro lor koa e polo gi luong matek, gi dwond malaika maduong’, ka tung’ Nyasaye oywak.” Omiyo kae ifwenyo Yesu Kristo owuon ni en e malaika maduong’ kata malaika motelo.

Kuom weche ma wasenenogo, en paro mane ma wanyalo ng’ado? Yesu Kristo e Mikael, malaika maduong’. Nying ariyogo, ma gin Mikael (tiende ni “Ng’ano Machalo gi Nyasaye? ”) kod Yesu (tiende ni “Jehova En Warruok”), nyiso migawo ma en-go kaka jal motelo e nyiso ratiro ma Nyasaye nigo mar bedo jaloch. Jo Filipi 2:⁠9 wacho kama: “Nyasaye ne oting’e [Yesu ma omi duong’] malo ahinya, kendo ne omiye nying’ moloyo nying’ duto.”

En gima ber ng’eyo ni nyuol mar Yesu kaka dhano e piny ok e kama ngimane nochakore. Kane pok onyuol Yesu, malaika nolimo Mariam kendo nonyise ni odhi mako ich kokalo kuom roho maler kendo ni ne onego oluong nying nyathino ni Yesu. (Luka 1:⁠31) E tije mar lendo e pinyka, kinde mang’eny Yesu nowuoyo kuom kinde ma ne pok obiro e piny.​​—⁠Johana 3:⁠13; 8:⁠23, 58.

Kuom mano Mikael, malaika maduong’ en Yesu kane pok obiro e piny. Bang’ chierne modok e polo, Yesu nodok e migawone kaka Mikael, malaika maduong’, “mondo Nyasaye Wuoro omi duong’.”​​—⁠Jo Filipi 2:⁠11.