Yesu Kristo Kaka Wechene Mulo Ngimani

“Nabiro mondo gibed gi ngima, kendo gibed godo moloyo.”​​—⁠JOHANA 10:10.

YESU KRISTO nobiro e piny, ok ni mondo omiye gik moko, to mondo ochiw. Kokalo kuom tije mar lendo, nomiyo dhano mich ma onge minyalo pimgo, ma en wach ma nofwenyone ji adiera kuom Nyasaye kod dwaro mare. Jogo marwako wachno nyalo bedo gi ngima maber sani, mana kaka ngima Jokristo mang’eny nyiso. * Kata kamano, gima duong’ e wach ma Yesu nolando oriwo mich maber moloyo ne dhano duto, ma en ngima makare chuth ma nochiwo nikech wan. Mondo wayud ber manyaka chieng’ luwre gi kaka warwako michno.

Gima Nyasaye kod Kristo nochiwo Yesu nong’eyo ni odhi tho, tho malit e lwet wasike. (Mathayo 20:⁠17-​19) Kata kamano, e wechene mong’ere ahinya mayudore e Johana 3:⁠16, nowacho kama: ‘Nikech Nyasaye nohero piny ahinya, omiyo nochiwo Wuode ma miderma, mondo ng’a ma oyie kuome kik lal, to obed gi ngima mochwere.’ Yesu bende nowacho ni nobiro mondo ‘ochiw ngimane odok rawar ni ji mang’eny.’ (Mathayo 20:28) Ang’o momiyo nowacho ni idhi chiw ngimane kar wacho ni ne idhi kawo ngimane?

Nikech hera maduong’ ma Nyasaye nigo, noloso chenro mondo ores dhano kuom richo monyuolgigo kod gik ma richono kelo, ma en bedo morem kod tho. Nyasaye notimo mano kuom oro Wuode ma miderma e piny mondo otho tho mar misango. Yesu notimo mano kuom chiwo ngimane makare chuth nikech wan. Chenro ma Nyasaye notimoni iluongo ni rawar, e mich maduong’ie moloyo mar Nyasaye ne dhano. * En mich makelo ngima mochwere.

Gima onego itim Be ineno rawar kaka mich ma mari iwuon? Yiero en mari. Kuom ranyisi: Par ane ni ng’ato miyi mich moro mobo maber. Kuom adier, michno bedo mari mana kiyie kode mikawe. E yo machalo kamano, Jehova miyi mich mar rawar, kata kamano michni bedo mari mana kiyie kode mikawe. E yo mane?

Yesu nowacho ni jogo ‘moyie’ kuome ema biro yudo ngima mochwere. Yie oriwo kaka idak e ngimani. (Jakobo 2:⁠26) Yie kuom Yesu tiende en dak kaluwore gi gik ma Yesu nowacho kendo timo. Mondo itim mano, nyaka ing’e Yesu kod Wuon-gi e yo malong’o. Yesu nowacho kama: “Mani e ngima mochwere, ni ging’eyi, in Nyasaye makende maradier, kod jal ma nioro, Yesu Kristo.”​​—⁠Johana 17:3.

Higini madirom 2,000 mosekalo, Yesu Kristo nopuonjo wach mosemiyo ji tara gi tara e piny ngima oloko ngimagi. Be diher yudo weche momedore e wi wachno kod kaka in kaachiel gi jogi mihero nyalo yudo ber kuom wachno, ok gie sani kende, to nyaka chieng’? Joneno mag Jehova oikore mar konyou.

Sula maluwo biro medo nyisi weche moko kuom Yesu Kristo, jal ma nolando wach manyalo loko ngimani nyaka chieng’.

[Weche moler piny]