Gik Maricho Duto Norum!

NYASAYE osemiyowa Wachne manyisowa gimomiyo ji timo gik maricho. Bende osemiyowa thuolo mar timo yiero koda nyalo mar ritruok, mamiyo wanyalo yiero mondo kik watim gik maricho. (Rapar mar Chik 30:15, 16, 19) Nikech oikwa maber kamano, wanyalo fwenyo paro maok kare ma wan-go kendo wanyalo kawo okang’ mar timo lokruok madwarore. Gikone, tamruok timo gik maricho biro kelo mor ne wan koda ne jogo manie alworawa.​—Zaburi 1:1.

Kata kamano, kata watem maromo nade mondo kik watim gik maricho, chandruok  medore e piny nikech timbe maricho ma dhano wetewa timo. Muma chiwo siem niya: “Ng’e wachni maler, ni kinde mag chandruok nobi e ndalo mag giko.” Konyiso gimomiyo magi gin “kinde mag chandruok,” Muma medo wacho kama: “Ji nobed jo moherore giwegi, kendo jo mohero mwandu, jo ma wuorore, jong’ayi, kendo jojaro; jo ma ok winj jonywolgi, jo ma ok go erokamano, jo ma ok luor Nyasaye, jo ma ok ohero owetegi, jo ma jendeke, jojig wach, jo moowore, jo mager, jo ma ok ohero gik mabeyo; joandhoga, jorikni, josunga, kendo jo mohero mor mar piny moloyo hero Nyasaye. Kitgi maoko nenore ka jo moluoro Nyasaye, to ngimagi odagi tekone. Aye kuom jo ma kamago.”​—2 Timotheo 3:1-5.

Nyalo bedo ni ineno kama wacho ni “kinde mag giko” e ndiko moket malo kae. Tiend wachno en ang’o? Mana kaka ji mang’eny ong’eyo, wacho ni “kinde mag giko” nyiso ni nitie gimoro machopo e giko. Ang’o madhi chopo gikone? Ne ane gima Nyasaye singo e Wachne.

Jo maricho nogol chuth.

“Podi kinde matin, kendo ng’a marach obiro onge: Ee, iniket chunyi kuom paro kar bet mare, kendo obiro onge. To jo mamuol ginicham piny; kendo ginimor moloyo kuom kwe mang’eny.”​—ZABURI 37:10, 11.

“Jehova geng’o richo ni jogo duto ma here; to noneg jo maricho duto.”​—ZABURI 145:20.

Ng’ato ok nosand nyawadgi kendo.

“Nogol jachan e chandrwok koywak; kendo ng’a modhier ma onge gi jakony. Nowar chunygi kuom dicho kendo kuom tim mager; kendo rembgi nobed gi nengo matek e nyime.”​—ZABURI 72:12, 14.

“Chuech duto nogony oa e tuech mar top, mondo oyud thuolo gi duong’ mar nyithind Nyasaye.”​—JO RUMI 8:21.

Ibiro mi ji gik ringruok madwarore.

“Ginibed piny ng’ato ka ng’ato e tiend yadhe mar mzabibu kendo e tiend ng’ope; kendo onge ng’ama nobwoggi.”​—MIKA 4:4.

“Giniger udi, ginidagie; ginipidh puothe mag muzabibu, ginicham olembgi. Giniger udi, to ng’at machielo ok nodagie; ginichuo, to ng’at machielo ok nochamgo; ni mar kaka ndalo mag yath obet e kaka ndalo mag joga nobedi, kendo jogo mayiedho nomor gi tich luetegi ndalo mang’eny.”​—ISAIAH 65:21, 22.

Weche duto nobed makare.

“To Nyasaye donge nong’ad bura makare ni joge moyier, ma ywakne otieno godiechieng’? . . .  Akonu ni nong’adnigi bura makare piyo.”​—LUKA 18:7, 8.

“Jehova ohero rieko ma pogo wach kare, kendo ok ojwang’o joge maler. Okungogi nyaka chieng’.”​—ZABURI 37:28.

Timbe makare nokaw kar guondo.

“Jo madak e piny gipuonjore tim makare.”​—ISAIAH 26:9.

“Kaka singruokne obet, warito polo manyien, gi piny manyien, ka ma wach makare odakie.”​—2 PETRO 3:13.

 Ji Timo Lokruok​—Kata Gie Sani

Onge kiawa ni waduto wamor gi singogo. Kata kamano, ang’o momiyo wanyalo bedo gadier ni singogo biro chopo? Kata gie sani, waneno gigo manyiso ni singo mag Nyasaye biro timore. En ang’o manyiso mano? Ji tara gi tara e kindegi e piny mangima osetimo lokruok e ngimagi, ma giweyo bedo joguondo, jo anjawo, joma ger, kendo gipuonjore bedo joma wacho adier, mohero kuwe kendo mang’won. E kindegi, Joneno mag Jehova ma kwan-gi okalo milion abiriyo, gin riwruok mar owete mawuok e piny mangima kendo giseloyo pogruok mabedoe e kind joma opogore e dhok kata oganda, pogruok mabedoe nikech siasa, koda wach yuto, ma osemiyo dhano osin gi jowetegi, kendo osekelo gero koda nek e histori duto mar dhano. * Bedo ni lokruok ma kamago timore e kindegi miyo wabedo gadier chuth ni singo mag Nyasaye biro chopo e okang’ maduong’.

Kata kamano, en ang’o makelo lokruok ma kamago? Dwoko yudore e singo machielo ma janabi Isaya nondiko e Muma. Nondiko niya:

“Ondieg sidhe, nodag gi nyarombo, kendo kwach nonind kod nyadiel; kendo roya kod nyathi sibuor kod dhiang’ mamiyo nobedi kaachiel; to nyathi notelnigi. . . . Kendo sibuor nocham lum kaka dhiang’ mabuoch. Kendo nyathi madhoth notug e bur thuol, mi nyathi moseduono noket luete e bur mar u. Ok ginitim marach kata ketho gi moro e goda maler ngima: ni mar ng’eyo Jehova nopong’ piny, kaka pige opong’o nam.”​—Isaiah 11:6-9.

 Be weche mokorgi nyisowa mana kaka le gi dhano biro dak e winjruok? Ooyo, ok mano kende. Ne ni e giko wechego inyisowa gima kelo lokruok ma kamago, iwachonwa niya: “Ng’eyo Jehova nopong’ piny.” Be en adier ni ng’eyo Nyasaye loko timbe mag le? Ooyo ngang’. Kata kamano, ng’eyo Jehova nyalo loko timbe dhano! Weche mokorgi nyiso kaka dhano manyalo bedo ni nikod timbe machalo gi mag le, biro lokore ma giwe timbego kendo gibed gi kido kaka mar Kristo nikech gisepuonjore kendo gitiyo gi gima Muma puonjo.

Kaw ane ranyisi mar Pedro. * Noparo ni onyalo kelo lokruok makare ka oriwore gi grup mar joma timo mahundu ne oganda. Bang’ kosetiege, ne oore mondo owit bom e barak mar polise. Kane oikore mar timo kamano, ne omake. Pedro nobedo e jela kuom dweche 18, kendo nodhi nyime gi timbe mag ketho chik. Gie kindeno, jaod Pedro nochako puonjore Muma gi Joneno mag Jehova. Kane osegonye, Pedro bende nochako puonjore Muma, kendo gigo ma ne opuonjore kuom Jehova Nyasaye nomiyo otimo lokruok madongo e yo ma ne oneno godo gik moko, koda kaka noneno ngima. Pedro wacho niya: “Adwoko ne Jehova erokamano ni ne ok anego ng’ato e higini ma ne an e grubno. Sani atiyo gi Muma ma en ligangla mar roho e lando ne ji wach mar kuwe madier​—ma en wach  maber mar Pinyruodh Nyasaye.” Pedro ne odhi kata e barak ma ne rik odwaro ketho mondo oland ne jogo wach makelo kuwe koda wach singo mar piny maonge gero.

Lokruok maduong’ ma Muma kelo e ngima ji miyo wabedo gadier ni singo mar Nyasaye ni gik maricho duto biro rumo, nochopi. Ee, ji ok notim gik maricho kinde duto, kar mano, gibiro lokore chuth ma gibed jo mabeyo. Jehova chiegni golo jalno ma nochako timbe maricho, ma en Satan Jachien, jal ma chiko gik matimore e piny. Muma wacho niya: “Piny duto obedo e teko mar Ng’a Marachno.” (1 Johana 5:19) Kata kamano, ibiro gol Satan e kinde mokayo machiegni. Jogo matamore gi wich teko weyo timbegi maricho bende ibiro gol oko. Mano kaka enobed gimaber miwuoro dak e kindeno!

Ang’o madwarore ni ng’ato otim mondo obi odag e piny maber kamano? Ne ni “ng’eyo mar Jehova” ema kelo lokruok kuom ji e kindegi, kendo mano ema biro kelo lokruok e piny mangima e kinde mabiro machiegni. Ka ipuonjori adiera mag Muma kendo kitiyo kodgi​—mana kaka Pedro notimo—​in bende inyalo bedo gi geno mar dak e piny kama ‘wach makare nodagie.’ (2 Petro 3:13) Omiyo wajiwi ni iti gi thuolo mapod yudore sani, mondo ipuonjri e wi Nyasaye gi Yesu Kristo, nikech mano nyalo miyo iyud ngima mochwere.​—Johana 17:3.

[Weche moler piny]

[Weche manie ite mar 9]

In bende inyalo bedo gi geno mar dak e piny kama ‘wach makare nodagie.’​—2 PETRO 3:13