Lemo

2 Onego Odhi ne Ng’a?

BE EN adier ni Nyasaye winjo lemo mag ji duto maok odewo ni nyasaye mane ma giwuoyogo ka gilemo? E piny masani, ji mathoth paro kamano. Parono moro joma ohero lamo moriwo dinde mopogore opogore, kendo gidwaro ni Nyasaye oyie kod dindego duto kata obedo ni gipogore kamano. Kata kamano, be nyalo bedo adier ni paro ma kamano obam?

Muma puonjo ni lemo mathoth ok dhi ne Nyasaye. Chon kane indiko Muma, ji mang’eny ne hinyo lemo ne gik mopa. Kata kamano, Nyasaye nochiwo siem nyadinwoya kuom timno. Kuom ranyisi, Zaburi 115:4-6 wacho niya kuom gik mopa: “Gin gi it, to ok giwinji.” Wachni nenore maler. Ere tiende lemo ne nyasaye maok nyal winji?

Nitie gimoro ma ne otimore ei Muma malero wachno e yo matut. Elija janabi madier nowacho ne jonabi mag Baal mondo olem ne nyasachgi, kae to bang’e Elija bende ne dhi lemo kokwayo Nyasache. Elijah nowacho ni Nyasaye madier ema ne dhi dwoko lamo, to nyasaye ma miriambo to ok ne dhi timo kamano. Jonabi mag Baal noyie timo kamano, omiyo ne gilemo kuom seche mang’eny gi kinda, kendo ka giywak matek​—to ne kanono! Muma wacho niya, ne “onge dwol kata ng’a madwoko, kata ng’a madewo.” (1 Ruodhi 18:29) Kata kamano, nobedo nade ka Elija nolemo?

Bang’ ka Elija noselemo, Nyasache nodwoko kanyo gi kanyo kuom oro mach kowuok e polo mondo owang’ kendo otiek misango ma Elija noketo. Pogruok ne ni kanye? Wach maduong’ manyisowa kama pogruok ne nitie, yudore e lemo mar Elija owuon mondiki e 1 Ruoth 18:36, 37. En lamo machuok ahinya​—oting’o mana weche madirom 30 kende, e dho Hibrania ma nokwong ndikego. Kata kamano, e weche manokgo, Elija noluongo Nyasaye gi nyinge sie ma en Jehova, nyadidek.

Baal, nying matiende ni “wuon gik moko” kata “ruoth,” ne en nyasach Jo-Kanan, kendo ne gilame ka giluonge gi nyinge mamoko mang’eny. Kata kamano, Jehova to en nying makende, mitiyogo mana kuom Ng’at maduong’ e wi piny duto mangima. Ma e Nyasaye ma nonyiso joge niya: “An Jehova; ma e nyinga: duong’ maler ma ango ok anami ng’at moro.”​—Isaiah 42:8.

Be lemo mar Elija kod mar jonabi mag Baal ne odhi kamoro achiel? Lamo mar Baal ne njawo ji kod timbe mopong’ gi terruok koda nek mar dhano kaka misango. Mopogore gi mano, lamo mar Jehova to ne miyo joge ma Jo-Israel bedo joma imiyo luor, ka ketogi thuolo giwuog e timbe mag anjawo. Kuom mano, par ane wachni: Kapo ni indiko barua moro ne osiepni mimiyo luor ahinya, be iparo ni baruano biro dhi ne  ng’at machielo ma nyinge opogore kendo kite bende ong’ere ni rach kendo opogore ahinya gi mar osiepni? Ooyo ngang’!

Ka ikwayo Jehova e lemo, iwuoyo gi Jachwech ma en Wuon ji duto. * Janabi Isaya nolemo kama: “A Jehova, in wuonwa.” (Isaiah 63:16) Kare mani e Jalno ma Yesu Kristo nowuoyo kuome kane onyiso jolupne kama: “Aidho adhi ka Wuora kendo Wuonu, ka Nyasacha kendo Nyasachu.” (Johana 20:17) Jehova en Wuon Yesu. En e Nyasaye ma Yesu ne kwayo e lemo kendo en ema Yesu nopuonjo jolupne mondo olam.​—Mathayo 6:9.

Be Muma chikowa ni walem ka wakwayo Yesu, Mariam, jomaler, kata malaike e lemowa? Ooyo​—mana Jehova kende. Par ane weche ariyo momiyo onego walam Jehova kende. Mokwongo, lemo en achiel kuom yore mag lamo Nyasaye, kendo Muma wacho ni Jehova kende ema owinjore olam. (Wuok 20:5) Mar ariyo, Muma puonjowa ni en ema iluonge ni Jal “ma winjo kwayo mar ji.” (Zaburi 65:2) Kata obedo ni Jehova pogo tijene ne jomoko e yo mang’won, migawo mar winjo kwayo mag ji to ok omiyo ng’at ang’ata. En e Nyasaye masingo ni obiro winjo lemo magwa en owuon.

Omiyo, kidwaro mondo Nyasaye owinj lemo magi, ket e paro ni Ndiko jiwowa kama: “Ng’ato ka ng’ato ma luongo nying Ruoth [Jehova], norese.” (Tich Joote 2:21) Kata kamano, be Jehova winjo lemo duto maok oketo chik moro amora? Koso nitie gimachielo madwarore ni wang’e kwadwaro ni Jehova owinj lemowa?

[Weche moler piny]

[Picha manie ite mar 5]

Gima ne otimore e kind Elija gi jonabi mag Baal nonyiso ayanga ni lemo duto ok dhi kamoro achiel