Lemo

5 Be Nyasaye Dewo ni Walemo Kanye Kendo e Seche Mage?

ONGE kiawa ni iseneno ni thoth dinde jiwo ahinya gero kuonde lemo mag nyadhi, kendo giketo kinde sie e odiechieng’ monego ji olemie. Be Muma ketonwa tong’ kuom kuonde koda seche monego walemie?

En adier ni Muma nyiso ni nitie kinde ma owinjore walem. Kuom ranyisi, kane pok ochiemo gi jolupne, Yesu nolemo kogoyo ne Nyasaye erokamano. (Luka 22:17) Kendo kane jolupne ochokore kar lamo, ne gilemo kanyachiel. Omiyo, ne gidhi nyime timo mana gi gima Jo-Yahudi nosebedo ka timo e sunagokegi koda e hekalu ma ne ni Jerusalem. Nyasaye ne dwaro ni hekalu obed “od lemo mar ogendini duto.”​—Mariko 11:17.

Sama jotich Nyasaye ochokore kendo lemo kanyachiel, lemo margi nyalo bedo gi nyak moloyo. Ka giriwore e paro achiel, kendo kwayo mitimono owinjore gi Ndiko, Nyasaye yie gi kwayono. Kwayogino nyalo miyo Nyasaye otim kata gima dine ok otimo. (Jo Hibrania 13:18, 19) Joneno mag Jehova lemo ding’eny e chokruoge maggi. Orwaki gi mor ahinya mondo idhi e Od Romo man machiegni kodi mondo iwinj lemo machalo kamago in iwuon.

Kata kamano, Muma ok oketo tong’ kuom sa sie kata kamoro sie ma ng’ato onego olemie. E Muma, wayudo weche manyiso ni jotich Nyasaye ne lemo sa asaya, kendo kamoro amora. Yesu nowacho niya: “Kilemo, donji e odi maiye, to kiseloro dho ot, lam Wuoru mobet apanda; to Wuoru ma neno apanda nomiyi.”​—Mathayo 6:6.

Donge mano en wach maber ndi? Inyalo wuoyo gi Jaloch mar gik moko duto sa asaya, ka in kendi, kendo ibed gadier ni obiro chikoni ite. Nikech mano, ok kawwa gi wuoro ni kinde mang’eny, Yesu ne manyo thuolo mar bedo kar kende mondo olem! Chieng’ moro achiel ne olemo otieno mangima kodwaro mondo Nyasaye otaye e ng’ado paro kuom wach moro maduong’.​—Luka 6:12, 13.

Chwo koda mon mamoko e Muma bende ne olemo kane dwarore ni ging’ad paro kuom weche moko mapek, kata kane giromo gi chandruoge madongo. Seche moko ne gilemo gi dwol, to seche moko ne gilemo gi chunygi; ne gilemo ka gin kanyachiel, kata ng’ato achiel achiel. Gima duong’ en ni ne gilemo. Nyasaye gwelo jotichne pile ni: “Lamuru ma ok uweyo.” (1 Jo Thessalonika 5:17) Kinde duto oikore mar winjo jogo matimo dwache. Donge gwelno nyiso ni oherowa?

En adier ni e piny ma ji keto kiawa e gimoro amora, ji mang’eny penjore kabe nitie gima lemo konyogo. In bende inyalo penjori niya, ‘Be lemo biro konya gadier?’

[Weche manie ite mar 9]

Wanyalo lemo sa asaya kendo kamoro amora