Lemo

6 Be Lemo Konyo?

BE LEMO konyowa e yo moro amora? Muma nyiso ni kuom adier lemo mag jotich Nyasaye mochung’ motegno konyogi gadier. (Luka 22:40; Jakobo 5:13) Kuom adier, lemo nyalo konyowa ahinya e winjruokwa gi Nyasaye, e bedo gi chuny mokuwe, kata mana konyo ringrewa. E yo mane?

Wakaw ni in gi nyathi ma oyudo mich moro. Be ibiro puonje ni winjo awinja e chunye ni omor gi michno oromo? Koso ibiro puonje wacho kaka omor e chunye? Sama wawacho kaka wawinjo e chunywa, mano miyo waparo matut kuom wechego kendo gisiko e chunywa. Be en kamano kodok korka wuoyo gi Nyasaye e lemo? Ee, onge kiawa kata matin! Non ane ranyisi moko.

Lemo mag dwoko erokamano. Sama wadwoko erokamano ne Wuonwa kuom gik mabeyo mwaneno, waketo pachwa e gweth mwayudo. Nikech mano, wanyalo medo dwaro goyo erokamano, bedo mamor moloyo, kendo bedo jogo maneno gik moko e yo makare.​​—⁠Jo Filipi 4:6.

Kuom ranyisi: Yesu nodwoko erokamano kuom kaka Wuon mare ne winjo kendo ne dwoko lemo mage.​​—⁠Johana 11:41.

Lemo mondo owenwa richowa. Sama wakwayo Nyasaye mondo owenwa richowa, watego chunywa maiye, wamedo jiwo lokruok me chunywa, kendo wamedo neno pek mar richo. Bende wayudo yweyo kuom pek ma timo richo kelo e chunywa.

Kuom ranyisi: Daudi ne olemo mondo owach lokruok koda lit ma ne nie chunye.​​—⁠Zaburi 51.

Lemo ka wakwayo mondo otawa kendo omiwa rieko. Kwayo Jehova mondo otawa kata mondo omiwa rieko madwarore mondo wang’ad weche e yo makare, nyalo konyowa bedo joma bolore gadier. Mano nyalo paronwa kaka warem kendo nyalo konyowa geno Wuonwa me polo.​​—⁠Ngeche 3:⁠5, 6.

Kuom ranyisi: Suleman nokwayo kobolore mondo otaye kendo oyud rieko mar locho e wi Israel.​​—⁠1 Ruodhi 3:⁠5-​12.

Lemo ka wan e chandruok. Ka wanyiso Nyasaye duto manie chunywa sama chunywa chandore, wayudo kuwe kendo wabiro sirore kuome moloyo geno kuomwa wawegi.​​—⁠Zaburi 62:8.

Kuom ranyisi: Ruoth Asa nolemo kane odhi monjo wasigu ma tekregi ne ng’eny moloye.​​—⁠2 Weche mag Ndalo 14:11.

Lemo ne joma nie chandruok. Lemo ma kamago konyowa paro jomamoko, kendo konyowa wamed bedo jogo mang’won kendo makecho jomoko.

Kuom ranyisi: Yesu nolemo ne jolupne.​​—⁠Johana 17:⁠9-​17.

Lemo mag pako Nyasaye. Ka wapako Jehova nikech tijene koda kido mage mabeyo, wamedo miye luor kendo wamedo here. Lemo ma kamago bende nyalo konyowa sudo machiegni gi Nyasachwa kendo Wuonwa.

Kuom ranyisi: Daudi nopako Nyasaye gi chuny mamor nikech chwech mage.​​—⁠Zaburi 8.

Gweth machielo ma lemo kelonwa en bedo gi “kuwe mar Nyasaye modhierore ng’eyo.” (Jo Filipi 4:7) Bedo gi chuny mokuwe e piny ma chandruok ng’enyieni en gweth makende gadier. Okonyo ringrewa bende. (Ngeche 14:30) Kata kamano, be mano bedoe nikech kindawa wawegi? Koso nitie gimoro machielo madwarore?

[Weche manie ite mar 10]

Lemo konyowa e yore mang’eny​—e ringrewa, bedo gi chuny mokuwe, to moloyo duto, e rito winjruokwa gi Nyasaye