Gik Mwapuonjore Kuom Yesu

 Kaka Malaike Konyowa Koda Kaka Jochiende Hinyowa

Yesu nodak e polo gi Wuon mare “ka ne piny pok obetie.” (Johana 17:5) Omiyo, en gi lony maber mar dwoko penjo maluwogi.

Be malaike dewowa?

▪ Wapuonjore kuom Yesu ni malaike dewo dhano ahinya. Nowacho kama: “Mor nitie nyim malaika mag Nyasaye kuom jaricho achiel molokore.”​—Luka 15:10.

Yesu nonyiso ni omi malaike ting’ mar konyo jotich Nyasaye osik ka winjruokgi gi Nyasaye otegno. Omiyo, kane Yesu siemo jolupne mondo kik chwany jowetegi, nowacho niya: “Neuru ni kik ucha achiel kuom jo matindogi, nikech awachonu ni, e polo malaika maggi neno wang’ Wuora me polo ndalo duto.” (Mathayo 18:10) Wechego ok nyis ni Yesu ne wacho ni moro ka moro kuom jolupne ne nigi malaikane ma rite. To Yesu nonyiso ni malaike matiyo kanyachiel gi Nyasaye dewo ahinya jokanyo manie kanyakla Jokristo.

 Jachien nyalo hinyowa e yo mane?

▪ Yesu nochiwo siem ne jolupne ni Satan temo tamo ji puonjore adiera kuom Nyasaye. Yesu nowacho niya, ‘Ng’ato ka ng’ato ma owinjo wach pinyruoth, to ok odonjone, ng’a marachno biro, kendo maye gima ochwo e chunye.’​—Mathayo 13:19.

Yesu nonyiso ayanga yo achiel ma Satan wuondogo ji, kane ochiwo ranyisi mar jal ma nochwoyo kodhi mar ngano e puothe. Jachwoyono nochung’ ne Yesu, to ngano nochung’ ne Jokristo madier ma ne dhi locho gi Yesu e polo. Kata kamano, Yesu nowacho ni jasigu nobiro “mochwoyo bende ogolo e dier ngano.” Ogologo ochung’ ne Jokristo ma miriambo. “Jasiguno mochwoyo ogolo en Satan.” (Mathayo 13:25, 39) Mana kaka ogolo mapod tin nyalo chalo gi ngano, jogo maluongore ni Jokristo nyalo nenore ka gima gin Jokristo madier. Dinde mapuonjo miriambo wuondo ji mondo kik giluw chik Nyasaye. Satan tiyo gi dinde mag miriambo mondo omi ji kik bed e osiep gi Jehova.

Ere kaka wanyalo geng’o Satan kik hinywa?

▪ Yesu noluongo Satan ni “jaduong’ mar pinyni.” (Johana 14:30) Yesu nolero ayanga e lamo mare ne Nyasaye kaka wanyalo ritore Satan kik hinywa. Kolemo ne jopuonjrene, Yesu nokwayo Wuon mare me polo niya: ‘Iritgi kuom ng’a Marachno. Ok gin mag piny, kaka an ok an mar piny. Pwodhgi e adierani. Wachni en adiera.’ (Johana 17:15-17) Ng’eyo Wach Nyasaye nyalo ritowa kik piny ma Satan oteloeni ywawa.

Malaike mulo ngimawa nade e kindegi?

▪ Yesu nowacho ni ‘e giko mar ndalo, malaika nowuogi, kendo ginipog jo maricho kod jo makare.’ (Mathayo 13:49) Sani wadak e “giko mar ndalo,” kendo ji tara gi tara rwako wach maber mar Pinyruodh Nyasaye.​—Mathayo 24:3, 14.

Kata kamano, kuom jogo machako puonjore Wach Nyasaye moko kuomgi ok los winjruokgi obed maber gi Nyasaye. Malaike tayo tij jotich Jehova, kendo jogo mohero Nyasaye gadier ipogo kod jogo maok dwar tiyo kod gik ma gipuonjore. Kane owuoyo kuom jogo ma Nyasaye biro yiego, Yesu nowacho kama: “Jogi gin jo mowinjo wach gi chuny makare kendo maber, ma makogo matek, kendo nyak gi kinda.”​—Luka 8:15.

Mondo iyud weche momedore, ne sula mar 10 mar bugni, Ang’o ma Muma Puonjo Kuom Adier? mogo gi Joneno mag Jehova.

[Picha manie ite mar 16]

Malaike konyo e tij choko jogo ma chunygi kare mondo odonj e kanyakla mar Jokristo