Puonjri Kuom Wach Nyasaye

Ang’o Momiyo Onego Wapuonjre Kuom Nyasaye?

Sulani nigi penjo manyalo bedo ni isepenjori, kendo onyiso kama inyalo somo e Mumbi mondo iyud dwoko mag penjogo. Joneno mag Jehova diher wuoyo kodi e wi dwokogo.

1. Ang’o momiyo onego wapuonjre kuom Nyasaye?

Nyasaye nigi wach maber ne oganda dhano kuom kinde mabiro. Onyisowa wachno e Muma. Muma chalo gi barua mondiknwa gi Wuonwa ma jahera manie polo.​—Som Jeremia 29:11.

2. Wach maberno en ang’o?

Dhano gombo bedo gi sirkal maber. E piny ka, onge jatelo mosetieko ne dhano timbe gero, timbe maok kare, tuoche, kata tho. Kata kamano, nitie wach maber. Nyasaye biro kelo ne dhano sirkal maber mabiro tieko gigo duto makelo chandruok.​—Som Daniel 2:44.

3. Ang’o momiyo dwarore ni wapuonjre kuom Nyasaye?

Nyasaye chiegni tieko joma kelo chandruok e piny. Kapok mano otimore, opuonjo jo mamuol tara gi tara mondo odag e ngima maber ma mise mare en hera. Kokalo kuom Wach Nyasaye, ji puonjore kaka ginyalo nyagore gi chandruoge mag ngima, kaka ginyalo yudo mor madier, koda kaka ginyalo moro Nyasaye.​—Som Zefania 2:3.

  4. Muma nowuok kuom Ng’a?

Muma nigi buge matindo tindo 66. Ji 40 ema nondikogi. Musa nondiko buge abich mokwongo mag Muma higini 3,500 mosekalo. Buk mogik ne ondiki gi jaote Johana higini 1,900 mosekalo. Kata kamano, joma nondiko Muma nondiko pach Nyasaye, to ok maggi giwegi. Omiyo Muma owuok kuom Nyasaye.​—Som 2 Timotheo 3:16; 2 Petro 1:21.

Wang’eyo ni Muma en buk mowuok kuom Nyasaye nikech gik mokoro timore gadier. Onge dhano manyalo timo mano. (Isaiah 46:9, 10) Bende, Muma nyiso maonge kiawa ni Nyasaye nigi kido mar hera. Muma nigi teko mar loko ngima ji obed maber. Wechegi miyo ji tara gi tara bedo gadier ni Muma en Wach Nyasaye.​—Som Joshua 23:14; 1 Jo Thessalonika 2:13.

5. Inyalo timo nang’o mondo ing’e Muma?

Yesu nong’ere kaka japuonj mar Wach Nyasaye. Kata obedo ni thoth joma ne owuoyogo nong’eyo Muma e okang’ moro, pod ne dwarore ni mondo okonygi giwinj tiende. Mondo okonygi, Yesu ne terogi e ndiko moro bang’ machielo, koleronegi “tiend weche manie Ndiko.” Sula manyienni mawiye wacho ni, “Puonjri Kuom Wach Nyasaye,” biro tiyo gi yorno mondo okonyi.​—Som Luka 24:27, 45.

Onge gima kelo ne ji mor maloyo puonjruok kuom Nyasaye e wi gimomiyo nochweyo dhano. Kata kamano, jomoko ok bi mor kodi kisomo Muma. Kik chunyi nyosre. Geno mari mar yudo ngima mochwere otenore kuom ng’eyo Nyasaye in iwuon.​—Som Mathayo 5:10-12; Johana 17:3.

Mondo iyud weche momedore, ne sula mar 2 e bugni, Ang’o ma Muma Puonjo Kuom Adier? mogo gi Joneno mag Jehova.