Sud Machiegni gi Nyasaye

“A Jehova, . . . Iseng’eya”

“PEK maloyo duto en winjo e chunyi ni onge ng’ama dewi kata mong’eyo chandruogeni.” * Be isegawinjo kamano? Be isegawinjo e chunyi ni onge ng’ama odewi kata mong’eyo weche mikaloe? Ka en kamano, ber king’eyo niya: Jehova dewo ahinya chal mar jogo malame kendo oneno gik moko duto matimore e ngimagi mapile. Weche ma Daudi nondiko e Zaburi 139 nyisowa kaka mano en adier.

Konyiso ni en gadier ni Nyasaye dewe, Daudi wacho niya: “A Jehova, iserango chunya, kendo iseng’eya.” (Kwan matindo 1) Weche ma Daudi tiyogo kaendi, gin mamiyo wawinjo wechego e yo maber. E dho-Hibrania, wach moti godo ni ‘rango,’ tiende bende nyalo bedo kunyo ka ng’ato manyo kite ma nengogi tek (Ayub 28:3), nono chal mar piny moro (Jobura 18:2), kata nono adiera mar wach moro miyalo e bura (Rapar mar Chik 13:14). Ee, Jehova ong’eyowa maber ahinya, ong’eyowa iye gi oko. Kuom wacho ni ‘ing’eya,’ Daudi puonjowa ni Nyasaye dewo ahinya chal mar jotichne. Onono jotichne mong’e kaka gin ng’ato ka ng’ato.

Daudi medo lero okang’ ma Nyasaye nonowa godo, kowacho kama: “Kabet piny ing’eyo, kata kaa malo, wach maparo donjoni gi ku mabor.” (Kwan matindo 2) Wanyalo wacho ni Jehova ni “ku mabor,” nikech odak e polo. Kata kamano, ong’eyo sama wabet piny, kata ka en bang’ odiechieng’ modich, koda sama wachiew gokinyi ka wadhi loyo yorewa mapile. Bende ong’eyo paro mag chunywa, gombowa, koda gik mwadwaro timo. Be Daudi neno ni piny odiye nikech inono yorene abidha kamano? Ooyo ngang’, mopogore gi mano okwayo Nyasaye mondo onone e yo ma kamano. (Kwan matindo 23, 24) Nikech ang’o?

En nikech Daudi ong’eyo ni Jehova nono jotichne gi chuny maler. Daudi wacho mano kondiko kama: “Irango yora gi nindona, ing’eyo maber timbena duto.” (Kwan matindo 3) Odiechieng’ kodiechieng’ Jehova neno ‘timbewa duto’—kethowa kaachiel gi timbewa mabeyo. E kind kethowa gi gik mabeyo mwatimo, ere moketoe pache ahinya? Wach mitiyogo e dho-Hibrania ni ‘rango,’ tiende nyalo bedo “chungo,” kata “piedho,” mana kaka japur piedho cham kogolo yugi mondo cham obed maler. Wach moti godo ni “ing’eyo,” en wach molok kowuok e dho-Hibrania matiende nyalo bedo “hero gimoro.” Sama onono gik ma joma lame wacho kendo timo pile ka pile, Jehova mor ahinya gi gik mabeyo moneno. Nikech ang’o? Nikech omor ahinya gi kinda ma giketo mondo gimor chunye.

Zaburi 139 puonjowa ni Jehova dewo ahinya joma lame. Ononogi kendo orangogi sama gidhi nyime gi ngimagi mapile. Omiyo, ong’eyo chandruoge ma gikaloe kendo ong’eyo lit ma giwinjo e chunygi nikech pekgo. Donge chunyi gombo lamo Nyasaye madewo ji kamano? Ka iwinjo kamano, bed gadier ni: Jehova ‘wiye ok diwil kod tiji gi hera ma isenyiso ni iherogo nyinge.’—Jo Hibrania 6:10.

[Weche moler piny]