Be Onego Nyithindo Opuonjre e Wi Nyasaye?

“Wan gi dinde mang’eny ndi, to ema pod ok gikonywa mondo waherre ng’ato gi ng’ato.”—JONATHAN SWIFT, JANDIKO MA JA INGRESA.

SWIFT nogolo parono e senchari mar 18, to pod ji mang’eny e kindegi nyalo yie kode. Gima timore en ni jomoko neno ni jonyuol ok onego obed gi ratiro mar puonjo nyithindgi e wi Nyasaye. Gineno ni nyithindo mopidh e ute ma ji gin Jokristo orem e yo moro.

In to iparo nade? Kuom weche maluwogi, mage miparo ni nikare moloyo?

● Ok onego oyie ne jonyuol opuonj nyithindgi e wi Nyasaye.

● Jonyuol onego orit nyaka nyithindgi obed joma dongo eka gichak wuoyo kodgi e weche mag din.

● Ka nyithindo pod tindo, jonyuol onego ochak puonjogi weche ma ging’eyo e wi Nyasaye. To kaka nyithindgi medo bedo joma dongo, jonyuol onego ojiwgi mondo ging’e kor wechego giwegi.

● Nyithindo onego oyie ayiea gi puonj mag jonyuolgi e wi Nyasaye maok gitemo tiyo gi pachgi giwegi.

Be en Adier ni Din Hinyo Nyithindo?

Onge janyuol ma jahera ma diher hinyo nyathi. Kata kamano, be weche mosene nyiso ni jogo matemo wacho ni nyithindo ok onego opuonjre e wi Nyasaye wacho adier? Kuom higini pieche, jotim nonro osetimo kinda ahinya e nono kaka yie mar jonyuol mulo nyithindo. Gikone ne giyudo nang’o?

Jotim nonro osenwang’o ni kar hinyo nyithindo, din nyalo konyo e dongo mar nyathi. E higa mar 2008, ripot ma ne ogo e gaset miluongo ni Social Science Research * nowacho kama: “Oseyudore ni din jiwo winjruok manie kind janyuol gi nyathi bed ni en janyuol ma miyo kata ma wuoro.” Ripodno nomedo wacho kama bende: “Din kaachiel gi bedo e winjruok gi Nyasaye nenore ni en gima duong’ e ngima nyithindo mang’eny kendo en gima dwarore ahinya e winjruok mar joot.” Ne ane kaka wechego chalo gi gima Yesu Kristo nowacho: “Mano mor manadi ni jo man gi chan e chunygi.”—Mathayo 5:3.

To nade paro ma jomoko nigo ni nyithindo onego okwong obed madongo eka gipuonjre e wi Nyasaye kod din? Paro ma kamano kwedo adierani: Pach nyathi chalo gi ndowo man nono monego opong’ gi pi. Kuom adier, jonyuol nigi yiero monego gitim; ginyalo yiero pong’o ‘ndowono’ e ot gi puonj ma giyiego kendo ma gineno ni owinjore kata ginyalo yiero weyo paro mag joma oko machalo kodh yamo mondo opong’ pach nyathi kod chunye.

Inyalo Chop Mano Nade?

Histori nyiso ni puonj mag din nyalo miyo ji obuon kata osin gi jowetegi. Omiyo ere kaka jonyuol nyalo timo mondo kik weche ma ne Jonathan Swift owacho oyud nyithindgi? Ere kaka ginyalo puonjo nyithindgi weche makonyogi hero jomoko?

Rieko yudore e dwoko mag penjo adekgi: (1) Ang’o ma nyithindo onego opuonjre e wi Nyasaye? (2) Ng’ano mowinjore opuonjgi? (3) Yore mage mag puonjo matiyo maber moloyo?

[Weche moler piny]