Josombwa Penjo . . .

Be piny biro rumo e higa mar 2012?

▪ Jolendo mag BBC News nolando niya: “Ji mang’eny mawacho ni ibiro tiek piny chuth, sani dar ka ng’wen ka gidhi e gweng’ moro e piny Faransa . . . Gin gi yie ni piny dhi rumo tarik 21 Desemba 2012, ma kaluwore gi kalenda machon mar Jo-Maya, en giko mar kidieny moting’o higini 5,125.”

Mopogore gi weche mibwogogo ji ni piny dhi rumo kaka ma jotend din, joma kwanore ni josayans, kata ma jokoro mamoko e senchari mar 21 lando, piny ok bi rumo e higa mar 2012 to obiro siko higini duto bang’e.

Muma nyisowa niya: “Tieng’ achiel oa kendo tieng’ moro obiro, mi piny osiko nyaka chieng’.” (Eklesiastes 1:4) Par bende tiend weche mayudore e bug Isaiah 45:18 mawacho niya: “Ni mar Jehova ma . . . nochweyo piny kendo molose; noketogo, nochweyogo ok manono, to nolose mondo ji odagie: owacho kama, An Jehova, kendo onge machielo.”

Be wuoro ma jahera nyalo kawo seche mang’eny ka oloso gir tugo ne nyathine kendo omi nyathine gir tugono ma nyathi obed mamor ahinya, kae to matin bang’e oketh gino? Donge mano dibed tim marach ahinya! E yo ma kamano bende, gimaduong’ manomiyo Nyasaye ochweyo piny ne en mondo omigo chwechne ma dhano mor. Nyasaye nowacho ne Adam gi Hawa, dichwo gi dhako mokwongo niya: “Nyuoluru, kendo medreuru, upong’ piny, kendo ubedi gi loch kuome.” Bang’e, ‘Nyasaye noneno gik moko duto ma nosechweyo, kendo ne ber ahinya.’ (Chakruok 1:27, 28, 31) Nyasaye pod dwaro chopo dwache ne piny; ok obi weyo mondo oketh piny chuth. Kuom gimoro amora ma Jehova osesingo, ojiwo niya: “Ok enoduog ira nono, to notim gi mahero, kendo nonwang’ hawi kuom tich ma naore mondo otim.”—Isaiah 55:11.

Kata kamano, dwaro mar Jehova en ‘ketho joma ketho piny.’ (Fweny 11:18) Ei Muma, osingo niya: “Jo matir nodag e piny, kendo jo makare nodong’ie. Kendo nogol jo maricho oko e piny kendo jo matimo andhoga nogol oko chuth.”—Ngeche 2:21, 22.

Mano biro timore karang’o? Onge dhano moro amora mong’eyo. Yesu nowacho ni, “kuom chieng’no gi sano onge ng’a mong’eyo, kata malaika manie polo, kata Wuowi, to mana Wuoro kende.” (Mariko 13:32) Joneno mag Jehova ok tem koro ni en karang’o ma Nyasaye biro kethoe jomaricho. Kata obedo ni gineno kaka “ranyisi” mar ndalo giko chopo kendo giyie ni dhano odak e kinde ma Muma luongo ni “ndalo mag giko,” ok ginyal ng’eyo chieng’ono sie ma “giko” nobie. (Mariko 13:4-8, 33; 2 Timotheo 3:1) Mano giweyo e lwet Wuon-gi me polo koda Wuode.

Gie sani, Joneno mag Jehova odich gi tij lando wach maber mar Pinyruodh Nyasaye, ma en sirkal manie polo mabiro locho e wi piny kendo biro loko piny obed paradis mantie kuwe, kama ‘jo matir nocham piny, mi gidagie nyaka chieng’.’—Zaburi 37:29.

[Picha credit line manie ite mar 12]

Image Science and Analysis Laboratory, NASA-Johnson Space Center