Muma Loko Kit Ngima Ji

ANG’O ma nomiyo nyako moro ochako luwo kendo puonj mag din ma noyudo opidhego? Som ane gima owacho.

“Koro sani ang’eyo ni ngimana ochomo kama ber.”​—LISA ANDRÉ

HIGA MA NE ONYUOLEE: 1986

PINY MOAE: LUXEMBOURG

CHON: NYATHI MA NE OLAL

NGIMANA MACHON: Ne adongo e taon matin machiegni gi Luxembourg miluongo ni Bertrange, ma en taon maler, mokuwe, kendo momew. Wan nyithindo abich to an e chogo. Jonyuolna gin Joneno mag Jehova, kendo ne gitiyo matek ahinya mondo an kaachiel gi owete gi nyiminega waduto wang’e kendo waluw chike matayo ngima Jokristo.

Kane eka adonjo e higini mag rawera, nachako bedo gi kiawa malich kuom gik ma Joneno mag Jehova puonjo. Mokwongo, ne ok akawo kiawago mapek ahinya, kata kamano yie mara nochako dok chien mos mos. Jonyuolna notimo duto ma ne ginyalo mondo gitaya e yo makare, kata kamano ne ok arwako konygi. Ka jonyuolna kiya, ne atudora ling’ling’ gi rowere mochayo chik. Nagombo kit ngima kaka margi ma ne nenore ni chiwo thuolo mondo ng’ato otim gimoro amora modwaro. Ne wahero nyasi mag mor, ne wadonjo e timbe mag terruok, ne wamer kendo ne watiyo gi yedhe mamero. Kane eka achako, ne amor bedo gi joma ne nenore ni chamo ngima kaka dwarore.

Kata kamano, adiera en ni ne aonge mor madier. Ngimana gi osiepego ne en ngima mothanyore; onge ng’ama ne kawo gik moko gi pek. Mopogore kodgi, achiel kuom gik ma ne chando chunya ne en timbe maricho monya ahinya ma ji timo ne jowetegi e pinyni. Kaka kinde ne medo kadho, e kaka chunya ne medo hinyore.

KAKA MUMA NOLOKO NGIMANA: Kane an jahigini 17, chieng’ moro noyudo chunya ool ahinya. Ka mamana noneno kaka ne ok amor, nokwaya mondo achak puonjra Muma kendo. Ne ojiwa mondo anon puonj mag Muma kendo, kae to an awuon ayier kabe daher dak kaluwore gi puonjgo. Mbakano ma ne wagoyo kaka nyathi gi min mare ema nobedo chakruok mar loko kit ngimana. Ne ayie mondo Caroline nyamera maduong’ gi Akif chwore opuonja Muma. Akif ok nodongo ka en Janeno mar Jehova, to nobedo Janeno ka en ng’at maduong’. Nikech ngima ma Akif nodake chon, nabedo thuolo mar wuoyo kode, to wuoyo gi ng’at ma kamano ema ne adwaro ahinya.

Ne ang’eyo ni kit ngimana ok ne owinjore gi ngima Janeno, kata kamano kane eka achako ngima marachno, naneno ni kaka atiyo gi ngimana en wachna awuon. Kaluwore gi gik ma ne apuonjora e Muma, nafwenyo ni timbena ne nyalo moro kata sino Jehova. (Zaburi 78:40, 41; Ngeche 27:11) Nafwenyo bende ni gik ma atimo ne mulo jomoko bende.

Kaka namedo puonjra Muma, nafwenyo ni nitie gik manyiso malong’o maonge kiawa ni Muma en Wach Nyasaye. Kuom ranyisi, ne apuonjora weche mang’eny mosechopi ma Muma nokoro—ne gichopo e wang’e mana kaka ne okor. Ng’eyo gigo nokonya tieko kiawa ma ne an-go chon.

Chiegni higa achiel bang’ chako puonjruok Muma, an gi jonyuolna ne wadhi limo owadwa maduong’ ma ne ochiwore konyo tich e ofis mar Joneno mag Jehova e piny Jerman. Mor ma ne owadwa nigo ne omulo chunya ahinya. Mano e mor ma ne asebedo ka amanyo! Neno Joneno mamoko ma bende ne ochiwore tiyo e ofisno, ne omora ahinya. Ne gipogore ahinya gi joma yande gin osiepena ma ne manyo mana mor kendo nohero miriambo. Matin bang’e, nakwayo Jehova gi chunya duto e lamo kasingora ni abiro tiyone e ngimana duto. Kane an jahigini 19, nanyiso chiwruokna ne Jehova e batiso.

KAKA MUMA OSEKONYA: Koro sani ang’eyo ni ngimana ochomo kama ber. Ayudo mor e puonjo jomoko Muma, ka akonyogi ng’eyo Jehova koda singo mage ne kinde mabiro. Joodwa bende osekonyore nimar sani onge kibaji magoyogi nikech an.

Ang’eyo kethona machon, kata kamano atemo golo pacha kuomgi. Kar keto pacha e kethogo, aparo kaka Jehova oweyona richo kendo kaka ohera. Ayie gi chunya duto gi weche mayudore e Ngeche 10:22, mawacho niya: “Hap Jehova e mokelo mwandu; kendo Jehova ok omiyo ji mwandu makelo parruok.”

[Weche manie ite mar 10]

“Ne wahero nyasi mag mor, ne wadonjo e timbe mag terruok, ne wamer kendo ne watiyo gi yedhe mamero”

 [Weche manie ite mar 11]

“Ang’eyo kethona machon, kata kamano atemo golo pacha kuomgi”