Be “Jokristo” Duto Gin Jokristo Madier?

NITIE Jokristo adi e piny mangima? Buk moro miluongo ni Atlas of Global Christianity, wacho ni e higa mar 2010 ne nitie Jokristo ma dirom bilion 2.3 e piny mangima. Buk achiel achielno nowacho ni Jokristogo duto a e dinde mopogore opogore mokalo 41,000 kendo moro ka moro nigi puonj kod chikege owuon. Nikech nitie ji mathoth ma luongore ni Jokristo, piny obago ji mang’eny kendo gikia ni gichak gi kanye. Ginyalo penjore ni, ‘Be ji duto ma luongore ni Jokristo gin Jokristo madier?’

We wanon ane wachni e yo moro mopogore. Ng’at manie wuoth ma dhi e piny machielo nyaka wachga ni en japiny mane, kendo obed gima nyiso ni en japiny mowachono, kuom ranyisi passport, e ka inyalo yiene donjo e piny modhiyeno. Kamano bende, Jakristo madier nyaka tim gik momedore moloyo mana wacho gi dhoge ni oyie kuom Kristo. Nyaka otim gik mamoko ma nyiso ni en Jakristo. Gigo nyalo bedo ang’o?

Jokristo mokwongo nochako tiyo gi nying mar “Jokristo” kinde moko bang’ higa mar 44. Achiel kuom jondik Muma miluongo ni Luka nowacho kama: “E Antiokia kanyo e kama ne okwong luongie jopuonjre ni Jokristo.” (Tich Joote 11:26) Weche molworo ndikono nyiso ni joma noluong ni Jokristo ne gin jolup Kristo. En ang’o ma miyo ng’ato bedo jalup Yesu Kristo? Buk moro miluongo ni The New International Dictionary of New Testament Theology wacho kama: “Ng’ato bedo jalup Yesu sama ochiwo ngimane chuth mondo oti ne Yesu . . . kendo ochiwre kamano e ngimane duto.” Kuom mano, Jakristo madier en ng’ama luwo puonj kod chike mag Yesu, ma en ng’at ma nochako yie mar Jokristo, kendo otimo kamano gi chunye duto.

Be en gima nyalore yudo joma kamago e kind joma luongore ni Jokristo e kindegi? En ang’o ma Yesu nowacho ni ibiro ng’ego jolupne madier? Wakwayi ni inon ane dwoko ma Muma chiwo e wi penjogo. E sula ma luwogi, wabiro nono weche moko abich ma Yesu nowacho ma konyowa fwenyo jolup Yesu madier. Bende, wabiro nono kaka Jokristo mokwongo nonyiso ni ne gin jolup Kristo madier. Kendo wabiro neno ni gin jomage ma gin Jokristo madier e kind joma ng’eny ma luongore ni Jokristo e ndalowagi.