“Ubed gi . . . Hera e Kindu Uwegi”

“Amiyou chik manyien, ni ubed gi hera e kindu; mana kaka aseherou, un bende herreuru e kindu. Ma e ma nomi ji duto ong’e ni un jopuonjrena ka un gi hera e kindu uwegi.”​—JOHANA 13:34, 35.

Tiend Wechego: Kristo nonyiso jolupne ni mondo giherre mana kaka noherogi. Ere kaka Yesu nonyiso ni oherogi? Yesu nohero ji duto kata bed ni joma ne odak e kindeno nochayo joma wuok e oganda machielo kod mon bende. (Johana 4:7-10) Hera nomiyo Yesu otiyo gi thuolone, tekone, kendo noweyo gik ma nogombo timo mana ni mondo okony jomamoko. (Mariko 6:30-34) Gikone, Yesu nonyiso hera e yo moro makende. Nowacho kama: “An e jakwath maber; jakwath maber chiwo ngimane ne rombe.”​—Johana 10:11.

Kaka Jokristo ma Kinde Mokwongo Nonyiso ni Giluwo Puonjno: Jokristo mokwongo ne luongo Jokristo wetegi ni “owadwa” kata “nyaminwa.” (Filemon 1, 2) Ji duto moa e ogendni mopogore opogore norwak e kanyakla mar Jokristo nikech ne giyie ni “onge pogruok e kind Ja-Yahudi gi Ja-Grik. Nitie Ruoth achiel e wi duto.” (Jo-Rumi 10:11, 12) Bang’ Pentekost ma higa 33, jopuonjre ma ne ni Jerusalem ‘nouso gigegi kod mwandugi kae to ne gipogo yutogo ne ji duto kaluwore gi kaka ng’ato ka ng’ato ne ochando.’ Ne gitimo kamano nikech ang’o? Ne gitimo kamano mondo Jokristo ma ne eka oa batisi odong’ Jerusalem, mondo “gidhi nyime luwo puonj mag joote.” (Tich Joote 2:41-45) Ang’o ma nochwalogi mondo gitim kamano? Higni 200 kama bang’ ka joote ne osetho, Tertullian nonwoyo weche moko ma jomoko nowacho e wi Jokristo mokwongo. Nowacho kama: “To mano kaka jogo oherore gadier . . . kendo ng’ato oikore kata mana tho ne nyawadgi.”

Gin Jomage ma Luwo Puonjno e Kindegi? Buk moro miluongo ni The History of the Decline and Fall of the Roman Empire (1837) nowacho ni kuom higni mang’eny, joma luongore ni Jokristo “e ma osebedo ka timo gik maricho ahinya ne jowetegi moloyo kata joma [ok oyie].” Nonro moro ma notim e piny Amerka nofwenyo ni jodin, ahinya-ahinya joma luongore ni Jokristo, ochayo joma ma wuok e oganda mopogore gi margi. Thoth joma ni e dindego ok dewga joma gilemogo ma a e piny machielo kata ma wacho dhok machielo. Omiyo, kata sama chandruok moro oneno, ok ginyalga konyogi.

E higa mar 2004, ahiti moro mager nogoyo kamoro miluongo Florida nyading’wen moluwore kuom dweche ariyo. Jatelo moro ma nochung’ ne komiti ma chiwo kony e kinde masira e Florida kono, ne dwaro ng’eyo ka be nitiyo maber gi kony ma ne gisechiwo. Nowacho ni kuom grube duto ma ne gimiyo kony, onge joma nochanore maber kaka Joneno mag Jehova, kendo nowacho ni ne giikore chiwo kony moro amora ma Jonenogo ne nyalo dwaro. E chak higa mar 1997, grup moro mar Joneno mag Jehova ma chiwo kony e kinde masira, nodhi e piny Democratic Republic of Congo ka giting’o yedhe, chiemo, kod lewni mondo gikony Jokristo wetegi ma ne ni kuno. Jokristo wetegi mamoko ma wuok piny Europe nochiwo kony ma dirom dola milion achiel mag Amerka.