“Wach Maber mar Pinyruoth Ibiro Yal”

“Wach maber mar Pinyruoth ibiro yal e piny mangima mondo obed ranyisi ne ogendni duto, eka giko nobi.”​—MATHAYO 24:14.

Tiend Wechego: Luka ma ne en achiel kuom joma nondiko buge mag Injili nowacho ni Yesu “nowuotho e dala ka dala kod gweng’ ka gweng’ koyalo kendo kolando wach maber mar Pinyruodh Nyasaye.” (Luka 8:1) Yesu owuon bende nowacho kama: “Nyaka aland wach maber mar Pinyruodh Nyasaye e mier mamoko bende nikech mano e momiyo ne oora.” (Luka 4:43) Nooro jolupne mondo oyal wach maber e taonde kod e gwenge kendo bang’e nochikogi kama: “Unubed jonenona . . . nyaka kuonde maboyo mogik e tung’ piny.”​—Tich Joote 1:8; Luka 10:1.

Kaka Jokristo ma Kinde Mokwongo Nonyiso ni Giluwo Puonjno: Jolup Yesu ne ok odigni e timo gima Yesu nochikogi. “Pile ka pile e hekalu kendo e ot ka ot, ne gidhi nyime puonjo kendo lando wach maber e wi Kristo Yesu ma ok giwe.” (Tich Joote 5:42) Tij lendo ne ok owe ne mana jomoko moyier, to ne en tich ma nitimo gi ng’ato ang’ata. Jahistori moro miluongo ni Neander wacho ni “Celsus ma ne kwedo din mar Jokristo ne ok ohero neno ka jotwang’ usi, jokwo wuoche, jonyong’ piende, kaachiel gi joma ne ok osomo ahinya ne nigi kinda e tij yalo.” Jean Bernardi bende nowacho e buge miluongo ni The Early Centuries of the Church niya: “[Jokristo] nonego odhi owuo gi ji duto kamoro amora ma ne giyudoree. Ne gilendo e nderni kod e taonde, e lela kod e mier, bed ni orwakgi kata ok orwakgi. . . . Nyaka e giko mar piny.”

Gin Jomage ma Luwo Puonjno e Kindegi? Jadolo moro mar Jo-Anglican miluongo ni David Watson nowacho kama: “Tinde ji mang’eny ok ohero tiyo ne Nyasaye nikech kanisni mathoth ok okawo mapek tij yalo kod puonjo.” José Luis Pérez Guadalupe nowacho weche moko e wi joyalo e buge mar Why Are the Catholics Leaving? Nowacho ni “joyalo kaachiel gi jomamoko ok dhiga yalo ot ka ot.” Kata kamano, nowacho kama e wi Joneno mag Jehova: “Gidhiga yalo ot ka ot e yo mochanore.”

Nitie wach moro miwuoro kendo madier ma yudore e bug Cato Supreme Court Review, 2001-2002 ma ne Jonathan Turley owacho niya: “Kiluongo aluonga nying Joneno mag Jehova, to thoth ji paro joma limogiga e utegi mondo oyalnegi e seche ma ne ok gichano. Joneno mag Jehova ok dhiga yalo ot ka ot mana mar kamano, to gineno tijno kaka tich maduong’ motudore gi yiegi.”

 [Sanduku manie ite mar 9]

Be Isefwenyo Joma Nyiso Kido Mowuoyego?

Ka luwore gi ndiko ma wasewuoyoe e sulagi, gin jomage miparo ni nyiso kido mag Jokristo madier e kindegi? Kata obedo ni nitie dinde mathoth ma luongore ni Jokristo, ber paro weche ma Yesu nowachogi: “Kik upar ni ji duto ma luonga ni, ‘Ruoth, Ruoth,’ e ma nodonj e Pinyruodh polo, to mana jo ma timo dwaro mar Wuora manie polo e ma nodonji.” (Mathayo 7:21) King’eyo joma timo gima Wuoro dwaro, tiende ni, joma nyiso kido mag Jokristo madier kendo iriwori kodgi, to ibiro yudo gueth ma nyaka chieng’ e bwo Pinyruodh Nyasaye. Inyalo kwayo Joneno mag Jehova ma nomiyi bugni mondo okonyi yudo weche momedore e wi Pinyruodh Nyasaye kod gueth mobiro kelo.​—Luka 4:43.