Ji Manyo Dwoko

“Chiegni ni ji duto nigi yo ma gikawogo [Yesu]. Katabed ni yie kata kiawa marwa ni e okang’ mane, wayudo kwapenjore niya, ‘[Yesu] en ng’a?’”​—JANDIKO STAN GUTHRIE.

JI GOMBO ng’eyo ni Yesu en ng’a. Buge mawuoyo kuome ji ng’iewo ahinya. Sinembe mawuoyo kuome bende ji ohero ahinya. Kata kamano, pod nitie gik mang’eny ma ji penjore e wi Yesu. Ji nigi paro mopogore opogore e wi Yesu.

Higni moko manok mokalo, ji ariyo mafwambo weche ne kwayo paro mar ji e Intanet kuom penjo mawacho ni: “Yesu ne en ng’a?” Moko kuom dwoko ma ne ji ochiwo ne chalo kama:

● “Nenore ni ne en rabbi (japuonj) ma ngimane nobedo ranyisi maber mar kecho ji.”

● “Ne en mana ng’at mapile ma ne odak e yo makende.”

● “Onge gima nyiso ni Yesu ne odak e pinyka.”

● “Yesu en Wuod Nyasaye, ne onyuole, ne otho, kendo ne ochier koa kuom jo motho mondo owarwa e richowa. Sani ongima, kendo noduog e piny.”

● “An gi yie ni Yesu Kristo e Wuod Nyasaye kende, en dhano chuth kendo en e Nyasaye.”

● “Yesu en mana sigana mar wuondo pach ji ka nyithindo.”

En adier ni paro mopogore opogorego duto ok nyal bedo ni nikare. Be nitie kamoro achiel ma dwoko migeno kuom penjo mwapenjore e wi Yesu nyalo yudoree? Joma ogoyo gasedni nigi yie ni Muma en Wach Nyasaye kendo ni mano kende e kama wanyalo yudoe adiera duto e wi Yesu. *—2 Timotheo 3:16.

E sula maluwo ma, wabiro nono dwoko mag Muma e wi moko kuom penjo ma ji hinyo penjore e wi Yesu. En owuon nowacho ni resruok nyalo yudore ne ng’ato ang’ata “ma oyie kuome.” (Johana 3:16) Wagweli mondo inon dwokogo kae to ine ka didwar ng’eyo weche momedore kuom Yesu koda kaka inyalo nyiso ni iyie kuome.

[Weche moler piny]