Josombwa Penjo . . .

Ng’ano ma Nooro ‘Sulwe’?

▪ Be iseneno piche manyiso nyuol Yesu, kata tuke manyiso ruodhi adek, kata jomariek adek malimo Yesu ka en nyathi mayom ka eka oa nyuole e kund dhok? Kaluwore gi siganano, wachore ni Nyasaye ne otiyo gi sulwe mondo ota jogo ochop e kund dhok e dala mar Bethlehem. E pinje moko, nyithindo mang’eny omako kata nyinge ruodhigo gi wigi—Melchior, Caspar, koda Baltazar. Kata kamano, be en adier ni sigana ma ji mang’eny oyiegoni, luwore kuom adier gi gima Muma wacho? Ooyo. Nitie weche mang’eny maok adier ei siganani.

Mokwongo, chwogo ne gin jomage? E dho-Grik ma ne okwong ndikie siganano, Muma ok luong-gi ni ruodhi kata jomariek. Ne gin ajuoke. Nenore ni ne gin ajuoke masomo sulwe, tim mar joma ne ok lam Nyasaye. Muma ok nyis nyinge kata kar kwan jogo.

Mar ariyo, chwogo ne otimo limbegi karang’o? Ne ok gilimo Yesu ka en nyathi mayom e kund dhok. Ere kaka wang’eyo mano? Mathayo jandik Injili wacho niya: “Ka ne gidonjo e ot, ne gineno nyathino kod Mariam min mare.” (Mathayo 2:11) Ne ni ok wach ni e kindeno Yesu ne en nyathi mayom ma eka oa nyuol, to iluonge mana ni ‘nyathi.’ Maria kod Josef ne koro ok odak e kund dhok; to ne gidak e ot.

Mar adek, ng’ano ma ne ooro ‘sulweno’ mondo ota ajuokego? Jopuonj din thoro puonjo ni Nyasaye ema ne ooro ‘sulweno.’ Be ne otimo kamano kuom adier? Ng’e ni ‘sulwe’ ne ok okwongo tero ajuokego Bethlehem. Kar mano, ne oterogi ir Ruoth Herode ma ne ni Jerusalem. Ajuokego ne onyiso janek ma jateko kendo ma janyiego ni ne onyuol Yesu kendo ne gimiyo obedo gi sigu ahinya gi nyathi ma ne dhi bedo ‘Ruodh Jo-Yahudi.’ (Mathayo 2:2) E yo mariek, Herode ne onyiso ajuokego ni gidwokne wach kuom kama nyathino nitie sie, kowuondore ni en bende nodwaro dhi miye luor. Kae to ‘sulweno’ ne otero ajuokego ir Josef kod Mariam. Omiyo kapo ni Nyasaye ne ok odonjo e wachno, wuodh ajuokego dine okelo tho ne nyathino. Gima ber en ni Nyasaye ne okawo okang’. Herode ne obedo gi mirima mager nikech ajuokego ne ok odwokone wach, mi nogolo chik ni oneg nyithindo duto ma yawuowi ma johigini ariyo kadok chien modak Bethlehem koda alworane.—Mathayo 2:16.

Bang’e Jehova ne oluongo Yesu ni ‘Wuode mohero, ma chunye morgo.’ (Mathayo 3:17) Par ane wachni: Be Wuoro ma jahera kendo makare ne nyalo yiero ajuoke maok lame—joma timo gima Chik okwero—obed jootene? (Rapar mar Chik 18:10) Be nonyalo tiyo gi sulwe mondo otagi ir janek marach moloyo kendo ma jateko moloyo e pinyno komiyogi ote ma ne dhi chwako nyiego mager mar Herode? Be Nyasaye ne nyalo tiyo gi sulwe achielno mondo onyisgo ajuoke kama wuode mayom onindoe?

Par ane ranyisini: Jatelo moro maber mar lweny oro jalwenyne molony moloyo e alwora moro mar wasigu mager. Be onyalo nyiso wasigugo kama ginyalo yudoe jalwenyneno? Ooyo ngang’! E yo ma kamano bende, Jehova ne ooro Wuode e piny marachni. Be nonyalo nyiso Ruoth Herode jal marach, kama Wuode mayom maok nyal gimoro ne nitie? Ok nonyal!

To kare, ng’ano ma ne ooro ‘sulwe,’ kata gima ne chalo gi sulwe? Ng’ano ma ne dwaro ahinya ni Yesu otho kapod en nyathi, mondo kik odong mochop gima ne okele timo e piny? Ng’ano madwaro wuondo ji kendo jiwo miriambo, mahundu, koda nek? Yesu owuon ne onyiso ni Satan Jachien—“en jamiriambo, kendo en wuon miriambo,” en e ng’at ma “ne en janek nyaka a chakruok.”—Johana 8:44.