“Wakwayi, Iyienwa Waduog Pacho”
Sud Machiegni gi Nyasaye
“Wakwayi, Iyienwa Waduog Pacho”
Be dibed ni ne itiyo ne Jehova kinde moro to koro ok itine? Be dibed ni iseparo duogo tiyone kendo to ineno ni ok onyal rwaki? Yie isom adimba sulani kaachiel gi maluwe. Ondikgi sie mondo gikonyi.
“NE ALEMO ka akwayo Jehova mondo oyiena duogo pacho kendo owena richona nikech ne achwanye.” Mano e kaka miyo moro ma ne obayo yo moweyo ngima mar Jokristo ma ne opidhee, nowacho. Be iwinjone lit? Be ipenjori niya: ‘Nyasaye neno nade joma nosetiyone e kinde mokalo to koro ok tine? Be oparogi? Be odwaro ni “giduog pacho”?’ Mondo wadwok penjogo, we wanon ane weche ma ne Jeremia ondiko. Onge kiawa ni dwokogo biro mori.—Som Yeremia 31:18-20.
Ne ane chal ma Jeremia nowachoe wechego. E higa 740 Ka Ndalowa Podi, higni pieche kane pok onyuol Jeremia, Jehova noweyo mondo dhoudi apar mag Israel oter e twech e Assuria. * Nyasaye noweyo masira ma kamano okum joge nikech ne gichako timo richo madongo ka gikwedo siem ma nyadinwoya ma jonabi ne chiwo. (2 Ruodhi 17:5-18) Be chunygi noboch nikech chandruoge ma ne giyudo e twech, kinde ma ne winjruokgi gi Nyasaye okethore, kendo kane gin mabor gi pinygi? Be wi Jehova nowil kodgi chuth? Be ne onyalo chako rwakogi pacho kendo?
“Nalokora”
Jogo ne oyudo puonj ka gin e twech ma giloko chunygi. Jehova noneno ni chunygi ne otur. Winj ane kaka Jehova lero paro koda chuny ma Jo-Israel ma ne oter twech nigo, ka oluongogi giduto ni Efraim.
“Adier, asewinjo Efraim koyuagore,” Jehova owacho. (Kwan matindo 18) Nowinjo Jo-Israel kaywago chandruok ma ne giyudo nikech richogi. Kaluwore gi jasomo moro, wach motigo ni “yuagore” tiende nyalo bedo “kino wich.” Ne gichalo gi wuowi mong’anjo ma yiengo kata kino wiye koparo chandruok mathoth mosekelo kuome owuon kendo ogombo ngima ma yande odakie pacho. (Luka 15:11-17) Ang’o ma jogo ne wacho?
“Isechwada . . . kaka rwath ma pok ong’iyo gi majoko.” (Kwan matindo 18) Jogo noyie ni ne owinjore okumgi. Donge noyudo gichal gi rwath mapok ong’iyo gi jok? Nonro moro wacho ni ngeroni nyalo nyiso ni ne gichalo gi rwath ma ‘riwi dine ok ochwowo kadine ok ong’anjo e jok.’
“Lok chunya in, mi nabedi kamano; ni mar in Jehova Nyasacha.” (Kwan matindo 18) Gi chuny mobolore, jogo nokwayo Nyasaye okonygi. Ne giselal e richo, to koro ne gisayo mondo Nyasaye okonygi dok ire. Loko moro mar Muma wacho niya: “In e Nyasachwa—Wakwayi, iyienwa waduog pacho.”—Contemporary English Version.
“Nalokora. . . . Wiya nokuot, ee, wach nomako dhoga.” (Kwan matindo 19) Jogo nowinjo malit nikech richo ma ne gisetimo. Ne giyie ketho margi. Ka gima gimako wigi, ne gineno wichkuot kendo wach nomako dhogi.—Luka 15:18, 19, 21.
Jo-Israel noloko chunygi. Ne gikuyo, ne gihulo ne Nyasaye richogi, ma giweyo timbegi maricho. Be lokruokgino ne dhi miyo Nyasaye okechgi? Be ne odhi yienegi duogo pacho?
“Adier, Anakeche”
Jehova nohero Jo-Israel e yo makende. Nowacho niya: “An kod Israel kaka wuon nyathi, kendo Efraim en wuoda makayo.” (Yeremia 31:9) Ere kaka wuoro ma jahera ne nyalo tamore rwako wuode moseloko chunye kuom adier kamano? Ne ane kaka Jehova nyiso joge hera mana kaka Wuoro hero nyathine.
“Efraim en wuoda mahero koso? en rawera malong’o koso? ni mar ndalo duto kawache kamon kode, pod apare ahinya.” (Kwan matindo 20) Mano kaka wechego gin manyiso hera! Mana kaka janyuol ma jahera maok mbek chik, nochuno Nyasaye wuoyo gi nyithinde ‘komon kodgi,’ kosiemogi nyadinwoya kuom timbegi mamono. Kane gitamore winje, noweyo ma otergi e twech—chalo ka gima ne ochunogi a pacho. To kata obedo ni nyaka ne okumgi, wiye ne ok owil kodgi. Mano ne ok nyal timore. Wuoro ma jahera dak wiye wil gi nyithinde. Kata kamano, Jehova nowinjo nade kane oneno ni nyithinde oloko chunygi gadier?
“Chunya lit ni kech en; adier, anakeche.” (Kwan matindo 20) Jehova nowinjo kogombo nyithinde ahinya. Nikech ne giloko chunygi gadier, mano nomulo chunye kendo nogombo ahinya ni giduog ire. Mana kaka wuoro e ranyisi mar Yesu, Jehova ‘nopong’ gi kech kuomgi’ kodwaro ni nyithinde oduog pacho.—Luka 15:20, The Bible in Luo, 2003.
“Jehova ne Oyiena Duogo Pacho!”
Weche manie Yeremia 31:18-20 miyowa ng’eyo matut e wi ng’wono koda kech mar Jehova. Nyasaye wiye ok wil gi joma nosetiyone to sani ok tine. To nade ka joma kamago dwaro duogo ire? Nyasaye ‘oikore weyo richo.’ (Zaburi 86:5) Ok obi riembo ngang’ joma duogo ire gi chuny molokore moweyo richo. (Zaburi 51:17) Kar mano, oikore rwakogi pacho.—Luka 15:22-24.
Miyo ma ne owuo kuome e chak sulani nokawo okang’ mokwongo en owuon mar duogo ir Jehova, ma odhi e kanyakla mar Joneno mar Jehova me alworagi. Mokwongo, nyaka ne olo paro maricho ma ne en-go kuome. Owacho kama: “Naneno ni an ng’at manono.” Kata kamano, jodong-kanyakla nojiwe kendo nokonye loso winjruokne gi Nyasaye. Ka en gi chuny mamor, owacho niya: “En gimaber matamre gi nono ni Jehova ne oyiena duogo pacho!”
Ka dipo ni ne itiyo ne Jehova kinde mosekalo kendo diher mar duogo tiyone kendo, wagweli mondo ilim kanyakla mar Joneno mag Jehova manie alworau. Ng’e ni Jehova rwako ji gi ng’wono kendo okecho joma chunygi olokore moweyo richo ka giywakne ni: “Wakwayi, iyienwa waduog pacho.”
SOMO MAR MUMA MOCHAN NE DWE MAR APRIL:
[Weche moler piny]
^ par. 5 Senchari moko motelo, e higa 997 K.N.P., Jo-Israel nopogore mobedo pinje ruodhi ariyo. Moro ne en man milambo moting’o dhoudi ariyo mag Juda. Machielo ne en man nyandwat moting’o dhoudi apar mag Israel, mabende ne iluongo ni Efraim nikech Efraim ema ne en dhoot maduong’ kuomgi moloyo.
