Be Nitie Ng’ama Winjo Lemo?

“Chon ne an gi kiawa kabe Nyasaye nitie. Kata kamano, pod ne alemo. Ne ok an gadier ni ng’ato ne winjo lemona, chunya to ne ogeno ni ne nitie Nyasaye mawinja. Ne ok amor kendo ne ok ane tiend bedo mangima. Ne aluor yie ni Nyasaye nitie nikech ne aparo ni joma pachgi ok otegno ema oyie kuom Nyasaye.”​​—⁠PATRICIA, * IRELAND.

BE ISEGABEDOE gi paro kaka mag Patricia? Be ijalemo kata obedo ni in gi kiawa kabe Nyasaye nitie? Kapo ni en kamano, ng’e ni ok in kendi. Par ane weche maluwogi.

▪ Nonro moro ma ne otim ne Jo-Ingresa 2,200 ne onyiso ni ji pasent 22 kende ema oyie ni nitie Nyasaye ma nochweyo piny kendo mawinjo lemo. Kata kamano, pasent 55 kuom jogo lemo kinde ka kinde.

▪ Nonro moro ma ne otim kuom ji 10,000 e pinje mang’eny ne onyiso ni pasent 30 mar joma nowacho ni ok giyie kuom Nyasaye pod lemo.

Ang’o Momiyo Gin gi Kiawa?

Ja-Ingresa moro miluongo ni Allan nowacho niya: “Ne awachoga ni ok ayie kuom Nyasaye nikech ne aparo ni ne ochak din mondo ochikgo pach ji kendo olosgo pesa. Bende ne aneno ni ka dine bed ni Nyasaye nitie, dikoro timbe maok kare ok onya ahinya. Kata kamano, seche moko ne anyalo lemo kata obedo ni ne akiya ng’ama awuoyogo. Ne anyalo penjora niya, ‘Ng’ano ma ne ochweya?’”

Ng’ato ka ng’ato man gi kiawa kabe iwinjo lemo, nigi gimomiyo. Kinde mang’eny, kiawa ma kamago bedoe nikech penjo ma bago ji kaka maluwogi:

▪ Be nitie Jachwech?

▪ Ang’o momiyo kinde mang’eny din timo gik maricho?

▪ Ang’o momiyo Nyasaye oweyo mondo chandruok obedie?

Donge yudo dwoko mag penjogi nyalo miyo ilem ka in gadier?

[Weche moler piny]