Sud Machiegni gi Nyasaye

Ka Nyasaye Oweyo ne Ng’ato Richo, Be Wiye Wil gi Richogo?

E YO machuok, wanyalo dwoko ni ee. Kowuoyo gi jogo mohero, Jehova singo niya: “Anawenigi timbegi mamono, kendo richogi ok anapar kendo ngang’.” (Yeremia 31:34) Omiyo Jehova nyisowa ni ka oweyo ne joricho moloko chunygi richogi, ok ochak opar richogo kendo. To be mano koro nyiso ni Jachwech mar gik moko duto ok nyal paro richo moseweyo ne ji? Buk mar Ezekiel leronwa kaka Nyasaye weyo richo kendo wiye wil gi richogo.​​—⁠Som Ezekiel 18:⁠19-​22.

Kotiyo gi janabi Ezekiel kaka jal mawuoyo e loye, Jehova nong’ado bura ne Juda gi Jerusalem ma ne oseweye. Ogandano duto ne oweyo lamo Jehova kendo ne gipong’o piny gi timbe gero. Jehova ne okoro ni Jo-Babulon ne dhi ketho Jerusalem. Kata kamano, sama ne okoro wechego, Jehova ne ochiwo geno. Ng’ato ka ng’ato ne nigi thuolo mar timo yiero mare owuon kendo ting’o ting’ne owuon.​​—⁠ Kwan matindo 19, 20.

To ne dhi bedo nade ka ng’at marach olokore mobedo ng’at maber? Jehova nowacho kama: “Ka dipo ng’a marach olokore moweyo richone duto mosetimo, korito chikna, koluwo chik, kotimo gi mowinjore, nobedi mangima adier, ok enotho.” (Kwan matindo 21) Ee, Jehova ne ‘oikore weyo richo’ ne ng’at manyiso gadier ni oloko chunye moweyo yorene maricho.​​—⁠Zaburi 86:5.

To nade richo ma noyudo osetimo? Jehova ne olero niya; ‘richone duto mosetimo ok nopar kata achiel.’ (Kwan matindo 22) Wacho ni “ok nopargi kata achiel,” tiende en ni ok dhi kwanne richone. Ang’o momiyo mano en wach maber?

E Muma, wach motigo e dho Hibrania ni ‘paro’ ok en mana paro gik mosetimore. Buk moro wacho ni: “Kinde mang’eny, wachno ochung’ ne gima ng’ato dhi nyime timo.” Omiyo, tiend “paro” nyalo bedo “kawo okang’.” Omiyo, sama Jehova wacho ni ok ‘nopar’ richo mag ng’at moloko chunye, tiende en ni ok obi kawo okang’ mar kumo ng’atno nikech richo mosekalogo. *

Weche mayudore e bug Ezekiel 18:⁠21, 22, nyiso maler kaka Nyasaye weyo ne ji richo e yo malach. Ka Jehova oweyonwa richowa, ok obi tiyo kodgi kinde mabiro e kumowa. Kar mano, owito richo mag jogo moloko chunygi ka dieng’eye. (Isaiah 38:17) Chalo ka gima orucho richogo kama ne ondikgie.​​—⁠Tich Joote 3:​19.

Nikech wan dhano morem, wadwaro ng’wono mar Nyasaye. Donge watimo richo ding’eny? (Jo Rumi 3:​23) Kata kamano, Jehova dwaro ni wang’e ni ka waloko chunywa gadier, oikore mar weyonwa richowa. Kendo ka oweyonwa richowa, wiye wil gi richogo, ok nochak opar richogo kendo ngang’ mondo okumwago. Donge wachno hoyo chunywa ndi! Be ng’wono mar Nyasaye miyo igombo sudo machiegni kode?

[Weche moler piny]