Koro Ang’eyo Nyasaye Ma Atiyone

Kaka iwachonwa gi Marieta Manuel Bacudio

Jayalo mar Jo-Pentekost ma ne iwacho ni nigi teko mar chengo ne obiro e nyasi marwa mar tieko skul mar bedo pasta. Kane omula, “roho nomaka” ma agora piny ma pacha olal. Kane pacha oduogo, ne awinjo ka an gi teko mar chango ji, ma en gima ne adwaro ahinya. Ang’o momiyo ne adwaro bedo gi teko mar chango ji, to ere kaka mano ne omulo ngimana? Kapok aleronu mano, we anyisu kaka ne apon.

NE ONYUOLA Ilocos Norte, Philippines, tarik 10 Desemba, 1968, nyathi mar abiriyo e kind nyithindo apar. Mana kaka Jo-Filipino mang’eny, ne wan Jo-Katholik. Ne atieko skul mar sekondari higa mar 1986, kendo ne adwaro bedo nas. Kata kamano, mano ne ok otimore nikech ne abedo matuwo ahinya. Kendo ne aparo ni anyalo tho. Nikech luorono, ne akwayo Nyasaye mondo okonya, kendo ne anyise ni ka achango, abiro tiyone e ngimana duto.

Bang’ ywara gi tuwono ma achango, ne aparo singo ma ne aketo ne Nyasaye. Omiyo, e dwe mar Jun 1991, ne adonjo e skul mar Jo-Pentekost matiego ji bedo pasta. Nonyiswa ni tiegruok e skundno dhi miyowa “roho maler.” Ne adwaro bedo gi teko mar chango ji. Skundno ne opuonjowa ni wanyalo yudo tekono kuom lemo gi tweyo. Nikech ne adwaro ni ji opar ni an gi “roho,” chieng’ moro, seche mag lemo, ne alidhora mondo awinj lamo mar jaklaswa moro. Kane ochiegni tieko lemo, ne adok piyo piyo kuma ne alemoe. Bang’e, ne anwoyone gik ma ne owacho e lamo kendo ne oyie ni ne an gi “roho maler”!

Kata obedo ni pod ne asomo e skundno, ne an gi penjo mathoth. Kuom ranyisi, Mathayo 6:9 wuoyo kuom ‘Wuoro’ kod ‘nyinge.’ Ne apenjora penjo kaka “Wuoro ma Yesu ne wuoyoeni ne en ng’a? ” to “Nying ng’a ma ne onego obed maler? ” Kinde mang’eny, dwoko ma ne jopuonjna chiwo ne ok gin mochomo yo. Ne giwuoyo kuom Didek kendo ne giwacho ni en puonj ma ng’eyo kore tek. Mano ne en puonj ma chocha. Kata kamano, ne adhi nyime somo mondo abed pasta.

Kaka ne Aromo gi Joneno mag Jehova

E skundno, ne ipuonjowa ni Joneno mag Jehova ne gin din mar miriambo marachie moloyo. Kendo ne giluongogi ni antikristo. Mano ne omiyo ok adwargi kata matin.

E higa mar ariyo ka an e skundno, ne adhi limo jonyuolna e kinde ma ne olor skul. Kane Carmen, achiel kuom nyiminena madongo owinjo ni abiro dala, en be nobiro limbe. Noyudo osebatise kaka Janeno mar Jehova kendo ne otiyo ne Nyasaye kuom thuolone duto. Kane otemo puonja e wi Nyasaye, ne adwoke gi mirima  niya: “Ang’eyo Nyasaye ma atiyone! ” Bang’ yanye matek, ne adhire kendo ne ok amiye thuolo mar wuoyo koda kendo.

Kane adok e skul, Carmen ne oorona brosua ma wiye wacho ni Je! Uamini Utatu?  * Ne anywaso brosuano ma abole e mach. Iya ne pod owang’ kode.

Kaka ne Abedo Pasta

Kaka ne adhi nyime gi skundno, ne aloko jomoko. Ne amor ahinya kane aloko minwa gi owadwa mochako lemo koda e din mar Pentekost.

E dwe mar Mach 1994, ne atieko skul mar Jo-Pentekost. Mana kaka ne awacho motelo, jayalo moro ne obiro e nyasino. Jopuonjre duto ma ne tieko ne dwaro bedo kode nikech ne wan gi yie ni en gi mich mar chango ji. Ne wachikore kaachiel kode e stej ka wamielo thum kendo wapamo lwetwa. Kae to ng’ato ka ng’ato ma ne omulo ne lwar piny ka ‘roho omako.’ Kane omula, an bende ne agora piny kendo pacha ne olal. Kane pacha oduogo, luoro ne omaka, kata kamano, ne awinjo ka gima an gi teko mar chango ji, omiyo ne amor.

Matin bang’ mano, ne atiyo gi tekogo e chango nyathi moro ma ne tuwo ahinya. Kane alemone, luya ne ochako wuok kuom nyathino, kendo tuwone nolal. Gikone, ne aneno ni anyalo chopo singona ne Nyasaye. Kata kamano, pod ne awinjo ka gima gimoro orema. E chunya maiye, ne an gi yie ni nitie mana Nyasaye achiel, to ne ok ang’eyo ni en ng’a. Kendo ne an gi kiawa kuom puonj mang’eny mag din.

Gik ma Nomiyo Aloko Pacha

Bang’ gik ma notimorego, ne amedo sin gi Joneno mag Jehova. Buk moro amora ma ne aromogo mar Joneno, ne awang’o. Kae to gima ne ok apar ni nyalo timore ne otimore. Minwa ne ok dwar din marwa. Carmen nosebedo ka puonjore kode Muma! Iya ne owang’ ahinya gi nyaminwano.

Bang’e, ne ayudo gaset miluongo ni Amkeni! e od minwa. Pile, ne awang’o gasedego ka anwang’ogi. To nikech ne adwaro ng’eyo ni en ang’o ma ne osomo, ne akalo e iye. Wang’a ne ogore kuom sula moro ma ne wuoyo e wi ng’at moro ma ne oyie motegno gi puonj din. Kata kamano, kane osomo buge mag Joneno kotiyo gi Mumbe, ne obedo gadier ni puonj kaka mag Didek, mach misandoe ji, kod chuny maok tho ok osir gi Ndiko. Wachno ne omako dhoga. Magi e gik ma ne oseyudo adwaro ng’eyo. A kanyo, ne agombo ng’eyo adiera mag Muma.

Bang’ somo sigana moro e gaset mar Amkeni! e wi ng’at machielo ma ne en misumba kong’o koda yedhe mamero to bang’e ne oweyo gigo nikech ne opuonjore  Muma, ne achako somo buge mathoth mag Joneno. Ne ayudo brosua miluongo ni Jina la Mungu Litakaloendelea Milele. * Kane asome, ne apuonjora ni Nyasaye iluongo ni Jehova. Brosuano ne omora nikech ne opuonja ng’eyo Nyasaye achiel kende madier!​​—⁠Rapar mar Chik 4:⁠39; Yeremia 10:10.

Ne adhi nyime somo ling’ ling’ kendo ne apuonjora adiera mamoko e wi Muma. Kuom ranyisi, e skund Jo-Pentekost, ne opuonjwa ni Yesu en Nyasaye, to Muma ne opuonja ni Yesu en “Wuod Nyasaye mangima.”​​—⁠Mathayo 16:⁠15, 16.

Ne Aloko Pacha

Kane achako aromo gi Carmen, ne obwok kane akwaye mondo omiya brosua mara awuon miluongo ni Jina la Mungu Litakaloendelea Milele, kaachiel gi buge mamoko. Ne aseketho higini mang’eny e skul ma ne atiegorae bedo pasta, ne ok opuonja adiera; kar mano, ne owuonda. Chunya koro ne opong’ gi mor nikech ne asepuonjora adiera e wi Muma. Ne aneno maler tiend weche ma ne Yesu owachogi: “Unung’e adiera, kendo adiera nomiu bedo thuolo.” (Johana 8:​32) Adieragi ne chako loko ngimana.

Kuom kinde, ne aparo ni ne anyalo lamo Jehova Nyasaye aling’ ling’ to koni adhi nyime gi bedo pasta. Mapiyo, ne afwenyo ni ne ok anyal dhi nyime puonjo thoth puonj mag din. Kata kamano, ne aluor. Ne adhi chamo ang’o ka aweyo tij bedo pasta? Mano kaka ne adhi kuodo wi kanisa ka an pasta mangima abedo achiel kuom Joneno mag Jehova! Omiyo ne adhi nyime puonjo kaka pasta, to ne ok awuo kuom puonj mag miriambo mag din.

Kane achako aromo gi Carmen, ne ojiwa ni adhi e chokruoge Joneno mag Jehova. Nikech ne ajatero ripot ne kanisawa maduong’ ma ne nitie Laoag City, ne ajadhi e Od Romo akuo akuo mondo achokra gi Joneno kuno. Ne ang’era gi Alma Preciosa Villarin, ma ne idendo ni “Precious,” kendo ma ne tiyo ne Nyasaye kuom thuolone duto e kanyaklano. Kata obedo ni pod ne an gi paro maok kare kuom Joneno, ne ayie mondo opuonja Muma.

Carmen nosebedo ka hore mos konyisa adiera mag Muma. Precious be ne nigi chuny ma kamano. Ne okonya ahinya ng’eyo Muma kata obedo ni kinde moko ne iya wang’ kode, ne aywara kode, kata ne arogone ka amakora gi gik ma ne asepuonjora  chon e din. Hera, bolruok, koda muolo ma ne Precious kaachiel gi Joneno mamoko nyisa ne omulo chunya. Mano nomiyo agombo lamo Jehova.

Dwe mar Julai 1995, ne afwenyo ni mondo amor Nyasaye, nyaka ne awe bedo pasta. Nikech ang’o? Fweny 18:4 wacho kama e wi dinde mag miriambo: “Auru kuome, un joga; mondo kik uriwru e richone, kendo kik unwang’ masichene.” To ne adhi chamo ang’o? Ndiko mar Jo Hibrania 13:5 nopuonja ni ka watimo dwach Nyasaye, osingonwa ni: ‘Ok enojwang’wa ngang’, kendo ok enowewa ngang’.’

Jumbe ariyo kane pok obatisa kaka Janeno, ne achoko chir ma adhi dala wang’o gik ma ne atiyogo e tija machon mar pasta kata obedo ni wuonwa gi owetena ne kweda ahinya. Bang’ wang’ogi, ne awinjo ka teko mar chengo ma ne omiya orumo. Kinde mokalo, kane anindo, gimoro ne siko diya adiya. Mano be nolal. Tipo moro ma ne ajaneno e dirisa mar ot ma ne anindoe be ne olal. Puonjruok Muma ne okonya ng’eyo ni gik miluongo e kindegi ni mich, kaka mar chengo, ok oa kuom Nyasaye to oa kuom jochiende. Amor ahinya ni ogonya kowuok kuom teko jochiende mana kaka ne ogony nyako ma Paulo gi Barnaba ne ogolone “jachien ma mirieri.”​​—⁠Tich Joote 16:⁠16-​18.

Mano kaka ne en mor maduong’ kane obatisa kaachiel gi mama kaka Joneno mag Jehova e dwe mar Septemba 1996! Bang’ batiso, ne abedo Janeno mar Jehova matiyo ne Nyasaye kuom thuolone duto kendo ne atiyo tijno kuom higini mang’eny.

Sani koro osekenda, kendo chwora iluongo ni Silver. Watiyo matek kanyachiel mondo wakony nyarwa oluw adiera mag Muma. Moko kuom nyiminena bende oseriwore kodwa e tiyo ne Jehova. Kata obedo ni aywago ang’e ni kuom higini mang’eny ne ok ang’eyo Nyasaye, gie sani, amor ahinya nikech koro ang’eyo Nyasaye ma atiyone.

[Weche moler piny]

[Weche e ite mar 27]

Ne atiyo gi tekogo e chango nyathi moro ma ne tuwo ahinya

[Weche e ite mar 28]

Adierago ne chako loko ngimana

[Weche e ite mar 29]

Brosuano ne omora nikech ne opuonja ng’eyo Nyasaye achiel kende madier!

[Picha e ite mar 27]

Nyasi mar tieko tiegruok mar bedo pasta

[Picha e ite mar 28]

Precious ne opuonja Muma

[Picha e ite mar 29]

Kane obatisa kaachiel gi mama

[Picha e ite mar 29]

Ka an Janeno mar Jehova matiyo ne Nyasaye kuom thuolona duto

[Picha e ite mar 29]

Ka an gi chwora, nyathiwa, koda wedena mang’eny moseriwore kodwa e lamo madier