Ng’ano ma En Jawinj Lemo?
Ng’ano ma En Jawinj Lemo?
KAPO ni nitie Jawinj lemo, nyaka obed mana Jachwech. Be nitie ng’ama nyalo somo gima nie pachi mak mana Jalno ma ne ochweyo obwongo? Be nitie ng’at mopogore kode manyalo dwoko lemo kendo konyo ji kaka dwarore? Kuom adier, ‘Be en gima nyiso rieko yie ni Jachwech nitie? ’
Ji mang’eny paro ni mondo ng’ato oyie ni Jachwech nitie, nyaka okwed sayans. Kata kamano, wacho ni yie kuom Nyasaye kwedo sayans ok en gima adier. Par ane weche maluwogi.
▪ Nonro ma ne otim machiegni kuom profese maromo 1,646 e yunivasiti 21 mag huma mayudore e piny Amerka noyudo ni mana ng’ato achiel kuom adek ema ne owacho ni: “Ok ayie kuom Nyasaye.”
Adiera en ni josayans mang’eny oyie ni Nyasaye nitie.
Gik Manyiso ni Jachwech Nitie
Be dwarore ni wayie ayiea maonge gimomiyo ni nitie Jawinj lemo? Ooyo ngang’. Ok en paro makare wacho ni bedo gi yie en rwako arwaka wach moro maonge gima sire. Muma lero ni yie “en bedo ma onge kiawa kuom gik ma ok ne.” (Jo Hibrania 11:1) Kuom ranyisi, ok inyal neno yamo, kata kamano inyalo neno gik ma yamo timo. Ka yamo kwadho it yien, mano miyo ibedo gadier ni yamo nitie. E yo ma kamano bende, kata obedo ni ok wanyal neno Jawinj lemo, wanyalo nono gik manyiso ni entie.
Ere kaka wanyalo bedo gadier ni Nyasaye nitie? Kuom ng’iyo gik molworowa. Muma lero niya: “Nimar ot ka ot ni gi jagedone, to jagedo mar gik moko duto en Nyasaye.” (Jo Hibrania 3:4) Be wechego winjoreni? Samoro kiparo chenro maber manie kor lwasi, kaka ngima ne ochakore, kata paro kuom obwongo ma en e chwech makore tekie moloyo e piny, ibedo gadier ni Nyasaye nitie. *
Kata kamano, chwech ok nyal puonjowa weche duto e wi Nyasaye. Nono gik manyiso ni Nyasaye nitie, chalo gi winjo tiend ng’at mawuotho oko to ok inene. Ing’eyo ni ng’ato ni oko, to ok ing’eyo ni en ng’a. Mondo ing’e ni en ng’a nyaka iyaw dhoot. Dwarore ni wakaw okang’ ma kamano mondo wang’e Jachwech.
Muma chalo gi dhoot mayawonwa yo mar ng’eyo Nyasaye. Ka iyawo dhoodno kendo nono moko kuom weche ma ne okor koda gi kaka ne gichopo, ibiro yudo gik manyisowa ni Nyasaye nitie. * To e wi mano, weche mondik manyiso tudruok ma Nyasaye osebedogo gi ji nyiso kido sie mar Jawinj lemo.
Jawinj Lemo En Ng’at Machalo Nade?
Muma nyiso ni Jawinj lemo en ng’at minyalo tudorigo. Ee, donge ng’at ma kamano ema nyalo winjo lemo ma okonyi? Wamor winjo weche mawacho ni: “A in ma winjo kwayo mar ji, ji duto nobi iri.” (Zaburi 65:2) Nyasaye winjo jogo malame ka oketo yie. Kendo Nyasaye nigi nyinge. Muma wacho ni: ‘Jehova bor gi ng’at marach; to owinjo kwayo mar ng’at makare.’—Ngeche 15:29.
Jehova en ng’at manyalo bedo mamor kata mokuyo nikech gik matimore. En “Nyasach hera” kendo iluonge ni “Nyasaye mamor.” (2 Jo Korintho 13:11; 1 Timotheo 1:11, New World Translation.) Muma wacho ni chuny Nyasaye “nochande” kinde ma richo ne onya ahinya e piny. (Chakruok 6:5, 6) Wacho ni Nyasaye kelo ne ji chandruok mondo otemgigo en miriambo. Muma wacho kama: “Nyasaye ok nyal timo richo.” (Ayub 34:10) Kata kamano, gima nyalo mako dhogi en ni, ‘Ka Nyasaye en Jachwech manyalo duto, ang’o momiyo oweyo chandruok mondo odhi nyime? ’
Jehova osemiyo dhano nyalo mar timo yiero, to mano nyisowa ni en Nyasaye machalo nade. Donge bedo thuolo yiero kaka wabiro tiyo gi ngimawa en gima morowa ahinya? Kata kamano, en gima lit ni thoth ji tiyo gi nyalono marach kendo mano miyo gikelo chandruok ne gin giwegi koda ne jomamoko. Koro ma e penjo maduong’ monego wapar matut: Ere kaka Nyasaye nyalo tieko chandruok maok omayo dhano thuolo mar timo yiero? Wabiro nono penjono e sula maluwo.
[Weche moler piny]
^ par. 8 Mondo iyud weche momedore manyiso ni Nyasaye nitie, ne brosua miluongo ni Maswali Matano Muhimu Kuhusu Chanzo cha Uhai koda buk miluongo ni Je, Kuna Muumba Anayekujali? mogo gi Joneno mag Jehova.
^ par. 10 Brosua miluongo ni Kitabu kwa Ajili ya Watu Wote koda buk miluongo ni Biblia—Neno la Mungu au la Binadamu? ogo gi Joneno mag Jehova mondo okony ji ng’eyo ni Muma en wach Nyasaye.
[Sanduk e ite mar 5]
Be Timbe Maricho mag Din ema Miyo Ibedo gi Kiawa Kabe Nyasaye Nitie?
En gima lit ni din ema miyo ji osebedo gi kiawa kabe nitie Jawinj lemo ma jahera. Bedo ni din osedonjore e lweny, timbe mahundu, kendo oweyo mondo ohiny nyithindo e yor nindruok, mano osemiyo joma lemo owacho ni, “Ok ayie ni Nyasaye nitie.”
Ang’o momiyo kinde mang’eny din rwako ji e timbe maricho? Kowach e yo mayot: Jomaricho osetimo gik maricho e nying din. Muma nosekoro ni ibiro ti marach gi din mar Jokristo. Jaote Paulo nonyiso jodongo ma Jokristo niya: “Kuomu uwegi bende jo moko nowuogie ma puonjo weche ma ketho adiera, ni mondo giywago jopuonjre bang’gi.”—Tich Joote 20:29, 30.
Nyasaye osin gi din mar miriambo. Kendo Muma ma en Wach Nyasaye nyiso ni din ema nigi bura mar ‘remb . . . ji duto ma nonegi e piny.’ (Fweny 18:24) Nikech din mar miriambo ok osepuonjo ji adiera e wi Nyasaye madier ma kite maduong’ en hera, dindego nigi buch remo e wang’ Nyasaye.—1 Johana 4:8.
Jawinj lemo winjo lit ne jogo ma din odiyo. Nikech Nyasaye ohero dhano, machiegnini obiro tiyo gi Yesu e kumo jogo duto mawuondore gi nying din. Yesu nowacho niya: “Ji mathoth nowachna chieng’ono niya, ‘Ruoth, Ruoth, ne ok wakoro wach e nyingi koso’ . . . Eka anawachnigi niya, ‘Ok nang’eyou ngang’: auru kuoma, un jo ma timo richo.’”—Mathayo 7:22, 23.
