Sud Machiegni gi Jawinj Lemo

JI MANG’ENY mawacho ni giyie kuom Nyasaye ok nyal siro gimomiyo giyie kamano. Bende ok ginyal lero gimomiyo kinde mang’eny din timo gik maricho kata gimomiyo Nyasaye oweyo chandruok obedie. Kata obedo ni gilemo, gilamo Nyasaye ma gikiya.

Kata kamano, nyalore mondo wasud machiegni gi Nyasaye. Ng’eyo Nyasaye nyalo miyo ibed gi yie to mano biro miyo ihere. Yie madier nyaka bed gi gimoro sie masire. (Jo Hibrania 11:1) Ka ipuonjori adiera e wi Nyasaye, inyalo ng’eye kendo wuoyo kode kaka osiepni. Ne ane ranyisi mag joma ne osebedo ka lemo kata obedo ni ne gin gi kiawa kabe Nyasaye nitie.

▪ Patricia, ma ne owuo kuome e sula mokwongo. “Chieng’ moro kane an gi osiepe moko manyalo romo apar, mbaka nowuok e wi din. Noyudo asenyisogi ni ne aringo mbaka moro e kind wuonwa, ma ne ok oyie kuom Nyasaye, kod Janeno mar Jehova ma ne olimowa. Achiel kuom osiepena nowacho ni: ‘Nyalo bedo ni nitie gima wanyalo puonjore kuom Joneno mag Jehova.’

Machielo nowacho ni: “‘Ok wadhiuru e chokruok margi mondo wane?’ To mano e gima ne watimo. Kata obedo ni ne wan gi kiawa, moko kuomwa ne odhi nyime dhi e chokruogego mana nikech Joneno ne nyisogi hera ahinya.

“Kata kamano, Jumapil moro ne awinjo gima ne oloko pacha. Jagol-twak ne olero gima omiyo ji chandore. Ne ok ang’eyo ni ne ochwe dhano mokwongo e yo makare chuth kendo ni richo kod tho ne ochakore gi ng’at achiel kae to olandore ne dhano duto. Ne olero bende gimomiyo ne dwarore ni Yesu otho mondo eka oduok ne dhano ngima makare ma ne ng’at mokwongo olalo. * (Jo Rumi 5:⁠12, 18, 19) Kanyo gi kanyo, wang’a noyepo. Nawacho ni: ‘Kare nitie Nyasaye madewowa.’ Ne adhi nyime puonjora Muma, kendo mapiyo ne afwenyo ni anyalo wuoyo gi Nyasaye ma nitie gadier, gima ne ok ang’eyo kuom ngimana duto.”

▪ Allan, ma bende ne owuo kuome e sula mokwongo. “Chieng’ moro, Joneno mag Jehova ne olimowa, kendo chiega ne orwakogi nikech ne odwaro ng’eyo momedore e wi ngima mochwere  e piny. Iya ne owang’. Omiyo, ne aweyo welogo korka budho ma adhi gi chiega e jikon kae to awachone niya, ‘Tang’. Onge kaka inyalo yie gi gik ma kamago!’

Nodwoko niya: “‘Kare dhi ikwer ane gik ma giwacho.”

“Kuom adier ne ok anyal loyogi gi wach. Kata kamano, ne ging’won koda ahinya kendo ne giwena buk ma ne nyiso kabe gik moko ne osieko asieka kendgi koso ne ochwegi. Nikech bugno ne lero weche e yo maler kendo ne chiwo gik masiro wechego, nang’ado mar puonjora mathoth e wi Nyasaye. Ne achako puonjora Muma gi Joneno, kendo ne afwenyo ni Muma wacho weche mopogore ahinya gi weche ma din puonjo. Kaka ne amedo puonjora e wi Jehova, e kaka ne achako lemo ka aketo weche achiel kachiel. Ne an gi kido moko maok beyo, omiyo ne akwayo Nyasaye mondo okonya. An gadier ni Jehova ne odwoko lemona.”

▪ Andrew, modak Ingresa. “Kata obedo ni ne amakora motegno gi puonj moko kendo ne ahero sayans ahinya, ne ayie gi puonj ni gik moko nosieko asieka kendgi mana nikech ji ne wacho ni wechego gin adier. Nikech gik  maricho mogundho ma ne timore, ne ok ayie ni Nyasaye nitie.

“Kata kamano, seche moko ne awacho niya: ‘Kapo ni nitie Nyasaye modak e polo, daher penje tiend gik matimore. Ang’o momiyo nitie mahundu koda lweny ma tandawuoya? ’ Kane an gi chandruok, ne anyalo lemo to ne ok ang’eyo ng’ama ne awuoyogo.

“Ng’ato ne omiyo chiega trakt mogo gi Joneno mag Jehova ma wiye wacho ni Je! Ulimwengu Huu Utaokoka? Mano e penjo ma ne osebedo kachanda. Traktno ne omiyo achako penjora kabe Muma nyalo konya, ‘Dibed ni onyalo dwoko penjoga? ’ Bang’e matin kane an e rusa, ng’ato ne omiya buk miluongo ni Biblia​—⁠Neno la Mungu au la Binadamu? * Kane afwenyo ni Muma winjore gi sayans madier, ne aneno ni dwarore ni apuonjra weche momedore e wi Muma. Omiyo, kane achiel kuom Joneno mag Jehova ochiwore mar puonja Muma, ne ayie. Kaka ne amedo ng’eyo dwaro mag Jehova, ne achako ng’eye maber ka aneno ni en ng’at ma anyalo wuoyogo e lamo ka an thuolo.”

▪ Jan, nyako ma ne opon London e din mar Protestant. “Wuondruok mar din koda chandruok monya nomiyo aweyora gi din. Ne aweyo kolej mi achako tij wer gi goyo gita. Mago e kinde ma ne aromoe gi wuowi miluongo ni Pat. Ne opon kaka Ja-Katholik kendo ne oweyore gi weche din mana kaka an.

“Ne wadak e ot moro ma ne ojwang’ ka wan gi rowere mamoko ma bende ne oweyo skul, to waduto ne wadwaro ng’eyo weche e wi dinde mag Asia. Ne wajobudho nyaka chuny otieno ka wagoyo mbaka matut e wi gimomiyo ne ochwe dhano. Kata obedo ni an kaachiel gi Pat ne ok wayie ni Nyasaye nitie, ne waneno ni nyaka bedie teko moro mamiyo gik moko ngima.

“Kane wasedar mwadhi Ingresa ma masawa mondo wamany tich kaka jogo thum, ne wanyuolo nyathiwa mawuowi. Tuwo nogoye otieno moro, kendo ne apo mana ka alamo Nyasaye ma ne ok ayie kuome. Bang’e matin, osiep me kindwa gi Pat ne okethore kendo ne akawo nyathiwano ma adhigo. Ne achako alemo kendo ka ageno ni nitie Nyasaye mawinja. Gima ne ok ang’eyo en ni kare Pat bende ne lemo.

“Bang’e e odiechiengno, Joneno ariyo mag Jehova ne olimo Pat kendo ne ginyise puonj moko makonyo mag Muma. Pat ne ogona simo mopenja ka daher ni Joneno mag Jehova opuonjwa Muma an kaachiel kode. Mapiyo nono, ne wapuonjore ni mondo Nyasaye oyie kodwa, dwarore ni wariw kendwa e nyim sirkal. Mano ne nenore ka gima tek ahinya nikech winjruokwa ne nigi ng’ikni.

“Ne wadwaro ng’eyo weche momedore kuom kaka weche ma Muma koro chopo, gimomiyo dhano chandore, koda tiend Pinyruodh Nyasaye. Mos mos, ne wafwenyo ni Nyasaye dewowa kendo ne wadwaro timo kaka ochikowa. Ne wariwo kend. Rieko mayudore e Wach Nyasaye osekonyowa pidho nyithindwa adek. Waneno ni Jehova ne owinjo lemowa gadier.”

Tim Nonro Iwuon

Mana kaka ji tara gi tara mamoko, jogo mowuo kuomgi e sulani noneno wuondruok mag din mag miriambo kendo ne ofwenyo gimomiyo Nyasaye oweyo chandruok obedie. Be ne ifwenyo ni ng’ato ka ng’ato kuom jogi ne obedo gadier ni Jehova winjo lemo bang’ yudo ng’eyo makare e wi Muma?

Be diher nono gik manyiso ni Nyasaye nitie? Joneno mag Jehova biro mor ahinya konyi puonjori adiera e wi Jehova koda kaka inyalo sudo machiegni gi ‘Jawinj kwayo’ mag ji.​​—⁠Zaburi 65:⁠2.

[Weche moler piny]

[Weche e ite mar 10]

“Kaka ne amedo ng’eyo dwaro mag Jehova, ne achako ng’eye maber ka aneno ni en ng’at ma anyalo wuoyogo e lamo ka an thuolo”

[Sanduk e ite mar 9]

Yie madier nyaka bed gi gimoro sie masire kendo otenore kuom gombo mar ng’eyo adiera e wi Nyasaye