Gimomiyo ji penjo penjono en nikech Yesu ne osingo ne jamahundu ma ne ogur bathe ngima e Paradiso kinde mabiro. Yesu nokone ni: “Adier awachoni niya, tinende inibed koda e Paradis.” (Luka 23:43) Ne ni Yesu ne ok owacho kama Paradisono ne dhi bedoe. Be mano nyiso ni Yesu ne wacho ni jarichono ne dhi bedo kode e polo?

Mokwongo, we wanon ane kabe jarichono ne nigi kido ma ne dwarore ne jogo madhi dak e polo. Jogo ma nigi geno mar dhi dak e polo ibatiso e pi kendo gi roho maler kendo mano miyo gibedo jopuonjre Yesu mowal gi roho. (Johana 3:3, 5) Gimachielo madwarore kuomgi en ni gidag kaluwore gi chike Nyasaye kendo ginyis kido kaka bedo jo adier, joma tir, koda joma kecho ji. (1 Jo Korintho 6:9-11) Bende nyaka gisik ka gimakore chuth gi Nyasaye koda gi Kristo nyaka giko ngimagi e pinyka. (Luka 22:28-30; 2 Timotheo 2:12) Chopo wechegi ema nyalo nyiso ni owinjore ochiergi kendo ni giromo gi migawo mapek mar tiyo kaka jodolo koda ruodhi kaachiel gi Kristo ka gilocho e wi dhano kuom higni gana achiel.—Fweny 20:6.

Mopogore gi mano, jaricho ma ne nie bath Yesu ne en jamahundu kendo notho ka en jamahundu. (Luka 23:32, 39-41) En adier ni nonyiso Yesu luor kane owachone niya: “Para chieng’ midonjo e pinyruodhi.” (Luka 23:42) Kata kamano, ne pok obatise mobedo japuonjre mowal kuom roho, bende ne pok onyiso kido mar bedo ng’at matir kendo moluoro Nyasaye. Be Yesu ne nyalo singo ni jamahunduno bende noloch e polo kaachiel gi jolupne ma ne osenyiso e ngimagi ni gichung’ motegno kendo giluoro Nyasaye?—Jo Rumi 2:6, 7.

Kuom ranyisi: Ka ng’ato okwayi ni ing’wonne nikech nokwalo pesani, inyalo ng’ado mar weyo maok inyise ni ochuli. Kata kamano, be ibiro miye ting’ mar chung’ ne ohandi kata rito joodi? Ooyo. Migepe ma kamago imiyo mana jogo ma in-go gadier chuth. E yo ma kamano bende, jogo ma osingnegi dhi e polo nyaka nyis maler e ngimagi ni gin joma biro makore chuth gi chike makare mag Nyasaye kinde ma giniloch e wi dhano. (Fweny 2:10) Kata obedo ni jamahunduno nokwayo gi chuny maler ni owene, onge gima nyiso ni ne owinjore gi migawo mar locho e polo.

Kata kamano, donge Yesu nonyiso jarichono ni nobed kode e polo e odiechiengno? Mano ne ok nyalre nikech Yesu owuon ne ok odhi e polo gie odiechiengno. Kar mano, ne en “e i piny” kata e liel kuom ndalo adek. (Mathayo 12:40; Mariko 10:34) Kata bang’ chierne, pod ne odong’ e piny kuom ndalo 40 kapok odhi e polo. (Tich Joote 1:3, 9) Omiyo, jarichono ne ok nyal bedo gi Yesu e polo gie odiechiengno.

To kare jarichono ne dhi bedo e Paradiso mane? Bang’ kosechiere, nodag e Paradiso me pinyka, ma Yesu nolochie. (Tich Joote 24:15; Fweny 21:3, 4) Mondo iyud weche momedore e wi Paradisono koda gima Nyasaye dwaro mondo itim, wuo gi moro amora kuom Joneno mag Jehova.