Jonyuolna ne owere chuth kane pod an nyathi, omiyo mama ne opidhowa ka en kende, an, owetena ariyo, koda nyaminwa achiel. Gie kindeno e piny Faransa, nyithindo ma itgi odino ne ok puonj e yo mitiyogo tinde, kendo yore ma ne ipuonjogigo samoro ne miyo nyithindogo chandore ahinya. Kata kamano, a e tinna, aseyudo ber mang’eny ma rodin mamoko ok yudi. We alernu kaka mano ne obet.

Kuom kinde, jopuonj mang’eny ne paro ni onego opuonj nyithindo ma rodin kiwuoyo kodgi e yo mapile kendo kipuonjogi somo dhog ng’at mawuoyo. E piny Faransa kama ne aponie, tiyo gi dho momni e skunde ne ogo marfuk. Moko kuom nyithindo ma rodin ne itweyo lwetegi gi kang’egi sama gin e klas.

Kuom higni mogwaro e tinna, japuonj moro ne tiyo gi seche mang’eny juma ka juma mondo opuonja wuoyo. Ne imako dhoga kata wiya kendo ne ichuna wacho gik ma ne an to ok awinj. Ne ok anyal wuoyo gi nyithindo mamoko. Ne achandora ahinya e hignigo.

Kae to kane achopo higni auchiel, ne otera e skul mar rodin ma ne en boding’. Mano e kama ne akwongo romoe gi nyithindo mamoko ma rodin. To kae bende, ne otam ji tiyo gi dho momni. Kane oyudwa kwatiyo gi dho momni e klas, ne idwong’o omuode mag lith lwetewa kata ne iywayowa gi yie wiwa. Kata kamano, ne wachuogo dho momo ma ne watiyogo apanda. Koro, ne anyalo timo gima ne asegombo ahinya—wuoyo gi nyithindo wetena. Omiyo ne amor ahinya kuom higni ang’wen ma ne an kuno.

Kata kamano, kane achopo jahigni apar, ne otera e skul mar praimari mar nyithindo maok rodin. Wachno ne oturo chunya! Ne aparo ni nyithindo duto ma itgi odino ne otho kendo ni an kenda ema ne adong’. Nikech lakteche ne neno ni tiyo gi dho momni biro rucho gik moko te ma ne osepuonja, joodwa ne ok opuonjore dho momni kendo ne itama kikora gi nyithindo mamoko ma rodin. Pod aparo maler chieng’ ma ne adhi neno laktar moro mi aneno buk mar dho momni e mesane. Kane aneno piche ma ne nie tok bugno, ne asiemo bugno ka awacho niya, “Miya bugno!” Laktarno ne opando bugno piyo piyo. *

Minwa ne otemo ahinya puonjowa dak kaluwore gi chike mag Muma a e tinwa. Ne ojaterowa e chokruoge mag Joneno mag Jehova e kanyakla mar Mérignac machiegni gi Bordeaux. Kane an nyathi, ne anyalo mana puonjora weche matin ahinya e chokruogego. Kata kamano, joma opogore opogore ne wilore bet buta mondo gindikna gik ma ne ipuonjo kuno. Ne amor ahinya gi kaka ne gihera kendo ne gidewa. Mamawa ne puonja Muma ka wan pacho, kata kamano, gik ma ne opuonja ne ok donjna malong’o. Ne awinjo mana kaka janabi Daniel nowinjo kane malaika omiye weche mokor, mowacho niya: “Nawinjo, to . . . ok nodonjona.” (Daniel 12:8) Korka kora, to “ne aneno gik moko to ne ok ang’eyo tiendgi.”

Kata kamano, adiera ma gin mise mag ng’eyo Muma ne ochako donjona mos mos. Ne ahero ahinya gigo ma ne awinjo tiendgi maler, kendo ne atemo tiyo kodgi e ngimana. Bende ne apuonjora kuom ng’iyo kaka jomoko ne timo. Kuom ranyisi, Muma nyisowa ni wabed joma hore. (Jakobo 5:7, 8) Ne ok ang’eyo maber tiend bedo ng’at ma hore. Kata kamano, kuom ng’iyo kaka owete ma Jokristo ne nyiso kidono, ne apuonjora gima tiend horuok en. Kuom adier, kanyakla mar Jokristo osekonya ahinya.

Chieng’ moro, ka an rawera, ne aneno rowere mamoko ma rodin ka tiyo gi dho momni e wang’a yo. Ne achako tudora kodgi ling’ ling’ kendo ne achako puonjora French Sign Language (FSL). Ne adhi nyime dhi e chokruoge mag Jokristo kendo Janeno moro ma rawera miluongo ni Stéphane ne omako lweta. Ne otimo kinda ahinya mondo wawinjre kode e wuoyo, kendo mano ne omiyo achako here ahinya. Kata kamano, ne ok ang’eyo ni gimoro malit ne dhi timorena. Ne otwe Stéphane e jela nikech yiene kaka Jakristo. Nikech Stéphane ne onge, chunya ne onyosore ahinya ma aweyo dhi e chokruoge.

Bang’ dweche apar gachiel, ne ogony Stéphane moduogo pacho. Par ane kaka piny ne ogoya nyang’eng’ kane Stéphane owuoyo koda kotiyo gi dho momni. Ne ahum nono! Ne awuoro ahinya kaka ne opuonjore dhokno. Kare kinde ma ne Stéphane nie jela, ne opuonjore FSL. Neno ka Stéphane tiyo gi lwetene koda wang’e kowacho dho momni nomiya mor ahinya nikech mano ne nyiso ni ne odhi konya kama duong’.

Stéphane nochako timo puonjruok mar Muma koda. Gie kindeno, ne achako neno kaka puonj mag Muma ma ne asepuonjora otudore. Kane an nyathi, ne ahero ahinya ng’iyo piche mabeyo mayudore e bugewa malero Muma, kendo ne anono pichego ahinya mondo omi gigurre e pacha. Ne oyudo ang’eyo wach Ibrahim, ‘kothe,’ koda “oganda mang’ongo,” kata kamano, ne awinjo tiendgi maler mana ka ne opuonjagi e dho momni. (Chakruok 22:15-18; Fweny 7:9) Anyalo wacho ni koro ne ayudo dhok mowinjore koda chuth, dhok madonjo e chunya.

Nikech koro ne awinjo tiend gik mipuonjo e chokruoge, wechego koro ne mulo chunya kendo ne amedo bedo gi siso mar puonjruok weche momedore. Kaka Stéphane ne medo konya, ne amedo ng’eyo gik ma Muma puonjo, kendo e higa mar 1992, ne achiwora ne Jehova Nyasaye ma obatisa. Kata obedo ni ne asetimo dongruok e okang’ moro, ne pod aluor kendo wuoyo gi ji ne tekna nimar ne en gima ne ok atim a e tinna.

Bang’e, grup matin mar rodin ma ne antiere ne oriw gi kanyakla mar Pessac, ma ne ni Bordeaux. Mano ne okonya ahinya, kendo ne atimo dongruok e winjruokna gi Nyasaye. Kata obedo ni pod ne anyagora gi wuoyo gi ji, osiepena ma ne ok rodin ne timo matek mondo gine ni awinjo gik moko duto e chokruok. Dichwo moro miluongo ni Gilles gi chiege Elodie, notimo duto ma ginyalo mondo giwuo koda. Ne gijorwaka kinde ka kinde mondo wachiem kanyachiel kendo mano ne omiyo wabedo osiepe machiegni ahinya. Mano kaka bedo e kind joma nyiso hera kaka mar Nyasaye en gimaber!

Kanyaklani ema ne aromoe gi jaber miluongo ni Vanessa. Gimomiyo ne ahere en ni nodewo ji ahinya kendo nohero timbe makare. Kar neno ni bedona radin en gima pek, noneno mano kaka thuolo maber mar puonjruok wuoyo gi ng’at ma radin. Omiyo ne ahere ahinya mi wakendore e higa mar 2005. Kata obedo ni ok an ng’at ma jawuoyo, Vanessa osekonya timo kinda mondo alo luorona kendo abed thuolo wuoyo. Amor ahinya gi kaka otega e chopo migepena.

Higa ma ne wakendoreno, ne oluonga e ofis mar Joneno mag Jehova kama iluongo ni Louviers e piny Faransa mondo otiega kuom dwe achiel e tij loko dhok. Kuom higni, ofisno nosebedo ka timo kinda ahinya mar loso DVD mang’eny mag dho FSL. To nikech pod ne nitie tich mang’eny ma ne dwarore ni otim, ne idwaro jolok-dhok momedore.

Kata obedo ni an kaachiel gi Vanessa ne waneno ni tiyo e ofis mar Joneno ne en migawo makende kendo ni ne en mich moa kuom Jehova Nyasaye, pod ne wawinjo ka waluor matin. Ne dhi bedo nade ne grubwa mar dho momni? Ne wadhi timo odwa nade? Be Vanessa ne dhi yudo tich e alworano? Jehova ne oloyonwa pekgo duto e yo maber miwuoro. Ne aneno gi wang’a kaka Jehova ne oherowa gadier kendo kaka ohero joma rodin.

Nikech atiyo tij loko dhok, ang’eyo kaka iketo kinda mang’eny mondo okony joma rodin ng’eyo Nyasaye. To mano kaka amor neno ka jotich wetena temo wuoyo koda! Amor ahinya sama giwuoyo koda gi weche matin ma gisetemo puonjore e dho momni. Ok awinj ni oweya oko. Hera ma kama nyiso e yo malach kaka oganda mar Jehova nie winjruok achiel.—Zaburi 133:1.

Adwoko ne Jehova erokamano ni kinde duto ei kanyakla mar Jokristo, nomiya ng’at makonya. Amor ahinya bende gi thuolo matin ma asebedogo e konyo rodin wetena ng’eyo kendo sudo machiegni gi Jachwechwa ma jahera. Arito gi siso kinde ma ji duto nodag kaka joot achiel ma nigi winjruok kendo mawacho “dhok maler,”—ma en adiera e wi Jehova Nyasaye koda dwaro mage.—Zefania 3:9.